କୁଖ୍ୟାତ ଗଞ୍ଜେଇ ମାଫିଆ ଘରେ ରେଡ୍। ବୌଦ୍ଧ ଜିଲ୍ଲା ଶଗଡ଼ ସରପଞ୍ଚଙ୍କ ସ୍ବାମୀ ସୁବ୍ରତ କର୍ମୀଙ୍କ ଘରେ ଚଢାଉ ହୋଇଛି। ଜିଲ୍ଲା ପ୍ରଶାସନ ଚଢ଼ାଉ କରି ତାଙ୍କ ସମସ୍ତ ସମ୍ପତ୍ତି ବ୍ୟାଜାପ୍ତି କରିବା ପ୍ରକ୍ରିୟା ଜାରି ରଛି । ସୁବ୍ରତ କର୍ମୀ ଓ ତାଙ୍କ ସହଯୋଗୀମାନେ ଗତ କିଛିବର୍ଷ ମଧ୍ୟରେ ଅବୈଧ ନିଶା ବ୍ୟବସାୟ କରି ଆୟ ବହିର୍ଭୂତ ସମ୍ପତ୍ତି ଅର୍ଜନ କରିଥିବା ଅଭିଯୋଗ ହୋଇଥିଲା। ଏଥିପାଇଁ ଏହି ଅର୍ଥନୈତିକ ତଦନ୍ତ ପାଇଁ ବୌଦ୍ଧ SDPOଙ୍କ ନେତୃତ୍ବରେ ଏକ ଟିମ୍ ଗଠନ କରାଯାଇ ଅଭିଯୁକ୍ତ ଓ ତାଙ୍କ ସମ୍ପର୍କୀୟମାନଙ୍କ ବିଭିନ୍ନ ଠିକଣାରେ ତଦନ୍ତ ଜାରି ରହିଛି। ଅଭିଯୁକ୍ତ ସୁବ୍ରତ ଓ ତାଙ୍କ ସହଯୋଗୀମାନଙ୍କ ଘରେ ଯାଞ୍ଚ ସମୟରେ ବହୁ ଗୁରୁତ୍ଵପୂର୍ଣ୍ଣ ଜମିଜମା ଦଲିଲପତ୍ର, ଅଳଙ୍କାର ଓ ଅନ୍ୟାନ୍ୟ ସାମଗ୍ରୀ ଜବତ କରାଯାଇଥିବା ଜଣାପଡ଼ିଛି।
ତେବେ ପୂର୍ବରୁ ମନମୁଣ୍ଡା ଥାନା ଶଗଡ଼ା ଅଞ୍ଚଳରୁ ପୁଲିସ ଗତ ମାର୍ଚ୍ଚ ୭ ତାରିଖରେ ୨ କ୍ଵିଣ୍ଟାଲ ୯୩ କେଜି ଗଞ୍ଜେଇ ଜବତ କରି ସୁବ୍ରତ କର୍ମୀଙ୍କ ସହ ତାଙ୍କ ୩ ଜଣ ସହଯୋଗୀଙ୍କୁ ଗିରଫ କରି ଜେଲ୍ ହାଜତକୁ ପଠାଇଥିଲା। ଏହି ଅର୍ଥନୈତିକ ତଦନ୍ତ ସମୟରେ ଏସଡିପିଓ ଲରେନ ରାଉତରାୟ, ବୌଦ୍ଧ ତହସିଲଦାର ଅନିତା ସାହୁ, ମନମୁଣ୍ଡା ଥାନାଧିକାରୀ ସସ୍ମିତା ମଗର, ଟେକ୍ନିକାଲ୍ ଟିମ୍ ଓ ପୁଲିସ କର୍ମଚାରୀ ସାମିଲ ହୋଇଛନ୍ତି। ତଦନ୍ତ ପ୍ରକ୍ରିୟା ଜାରି ରହିଥିବା ବେଳେ ଏସଡିପିଓ ଆଇନ ଅନୁସାରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ନିଆଯିବ ବୋଲି ସୂଚନା ଦେଇଛନ୍ତି। ସୂଚନଯୋଗ୍ୟ ଯେ, ସୁବ୍ରତ କର୍ମୀ ଜଣେ ଆଗଧାଡ଼ିର ବିଜେପି କର୍ମୀ ଓ ଶଗଡ଼ା ସରପଞ୍ଚଙ୍କ ସ୍ବାମୀ । ଅନେକ ବର୍ଷ ହେଲା ସେ ଗଞ୍ଜେଇ ବେପାର କରି କୋଟିକୋଟି ଟଙ୍କାର ଅଧିକାରୀ ହୋଇଥିଲେ ।