ଦୀର୍ଘ ପ୍ରତିକ୍ଷାର ହେବ ଅନ୍ତ । ଆସନ୍ତା ୨୦୨୭ ମାର୍ଚ୍ଚ ବେଳକୁ କାର୍ଯ୍ୟକ୍ଷମ ହେବ ତାଳଚେର ଥର୍ମାଲର ପ୍ରଥମ ୟୁନିଟ୍। ଏଠାରୁ ପ୍ରଥମ ପର୍ଯ୍ୟାୟରେ ୬୨୦ ମେଗାୱାଟ୍ ବିଦ୍ୟୁତ୍ ଉତ୍ପାଦନ ଆରମ୍ଭ ହେବ। ଏନେଇ ଏନ୍ଟିପିସିର ଇଡି ବିଜୟ ଚାନ୍ଦ ସୂଚନା ଦେଇଛନ୍ତି। ତାଙ୍କର ଏହି ସୂଚନା ସହ ଟିଟିପିଏସ୍ ନେଇ ଲାଗି ରହିଥିବା ଦ୍ବନ୍ଦ୍ବ ଦୂର ହୋଇଛି।ତାଳଚେର ଟିଟିପିଏସ୍ ବନ୍ଦ ହୋଇଯିବା ପରେ ଏହାର ନବୀକରଣ କାମ ଜୋର୍ସାର୍ରେ ଚାଲିଛି। ଏଠାରେ ୧୩ ଶହ ମେଗାୱାଟ୍ ବିଦ୍ୟୁତ୍ ଉତ୍ପାଦନ ପାଇଁ ପ୍ରକଳ୍ପ କାମ ଚାଲିଛି। ଏହି ପ୍ରକଳ୍ପର ପ୍ରଥମ ୟୁନିଟ୍ ଆସନ୍ତା ୨୦୨୭ ମସିହା ମାର୍ଚ୍ଚ ମାସ ଶେଷ ସୁଦ୍ଧା କାର୍ଯ୍ୟକ୍ଷମ କରିବାକୁ ଲକ୍ଷ୍ୟ ରଖାଯାଇଥିଲା ବେଳେ ଦ୍ବିତୀୟ ୟୁନିଟ୍ ୨୦୨୭ ଡିସେମ୍ବର ଶେଷ ସୁଦ୍ଧା କାର୍ଯ୍ୟକ୍ଷମ ହେବ ବୋଲି ଇଡି ଶ୍ରୀ ଚାନ୍ଦ କହିଛନ୍ତି। ଏଠାରୁ ହେବାକୁ ଥିବା ବିଦ୍ୟୁତ୍ ଉତ୍ପାଦନରୁ ୫୦ ପ୍ରତିଶତ ଓଡ଼ିଶା ସରକାରଙ୍କୁ ଦିଆଯିବାର ବ୍ୟବସ୍ଥା ରହିଛି। ବଳକା ୫୦ ପ୍ରତିଶତ ଭାରତ ସରକାରଙ୍କୁ ପ୍ରଦାନ କରାଯିବ। ଏହି ଦୁଇଟି ୟୁନିଟ୍ ପାଇଁ ପ୍ରାୟ ୧୨,୫୦୦ କୋଟି ଟଙ୍କା ଖର୍ଚ୍ଚ ହେବ। ଆଞ୍ଚଳିକ ପାରିପାର୍ଶ୍ବିକ ଉନ୍ନତି ପାଇଁ ୨୦ କୋଟି ଟଙ୍କାର ପ୍ରକଳ୍ପ ହାତକୁ ନିଆ ଯାଇଥିବା ବେଳେ ପ୍ରଦୂଷଣ ନିୟନ୍ତ୍ରଣ ଉପରେ ଗୁରୁତ୍ବ ଦିଆଯାଇଥିବା ସେ କହିଛନ୍ତି। ତାଳଚେର ଥର୍ମାଲ ପାୱାର ପ୍ଲାଣ୍ଟ ଏବଂ ଆଖପାଖ ଅଞ୍ଚଳରେ ବୃକ୍ଷରୋପଣ ପାଇଁ ବନ ବିଭାଗକୁ ୯୦ ହଜାର ଟଙ୍କା ପୈଠ କରିଥିବା କତ୍ତୃପକ୍ଷଙ୍କ ପକ୍ଷରୁ ସୂଚନା ଦିଆଯାଇଛି ।ତେବେ ପ୍ଲାଣ୍ଟ ସମ୍ପୂର୍ଣ୍ଣ କାର୍ଯ୍ୟକ୍ଷମ ହେବାପରେ ୯୦ ପ୍ରତିଶତ ସ୍ଥାନୀୟ ଯୁବକଯୁବତୀ ଯୋଗ୍ୟତାଭିତ୍ତିକ ନିଯୁକ୍ତି ପ୍ରଦାନ କରାଯିବ। ବର୍ତ୍ତମାନ ଏକ ଠିକାସଂସ୍ଥା କାମ କରୁଥିବା ବେଳେ ସେଥିରେ ୫ ହଜାର ଶ୍ରମିକଙ୍କ ମଧ୍ୟରେ ସ୍ଥାନୀୟ ଅଞ୍ଚଳର ପ୍ରାୟ ୬୦ ପ୍ରତିଶତ ଲୋକ କାମ କରୁଥିବା ସେ କହିଛନ୍ତି।