କଟକର ସାଲେପୁରରୁ ଚୋରା ଦେଶୀ ମଦ ଜବତ। ମଦ ବ୍ୟବସାୟୀକୁ ଗଛରେ ବାନ୍ଧି ପୁଲିସ ଜିମାଦେଲେ ଗ୍ରାମବାସୀ। ଗିରଫ ବ୍ୟକ୍ତି ଜଣକ ସାଲେପୁର ଅଞ୍ଚଳର ଜୟନ୍ତ ବେହେରା ବୋଲି ଜଣାପଡିଛି।
ସୂଚନା ମୁତାବକ, ଆଜି ସକାଳ ପ୍ରାୟ ୮ଟା ସମୟରେ ସାଲେପୁର ଅଞ୍ଚଳର ଜୟନ୍ତ ବେହେରା ସ୍ଥାନୀୟ ଶଙ୍କରପୁର ଗ୍ରାମରେ ୧୦ ପେଟି ଦେଶୀ ମଦ ଚୋରାରେ ବିକ୍ରୟ କରିବା ଉଦ୍ଦେଶ୍ୟରେ ବଟ କାଣ୍ଡୀଙ୍କ ଘରେ ଦେବାକୁ ଯାଉଥିଲେ। ଏନେଇ ସେହି ଅଞ୍ଚଳର ସ୍ଥାନୀୟ ଲୋକେ ଓ ମହିଳାମାନେ ଚୋରା ମଦ ବ୍ୟବସାୟୀ ଜୟନ୍ତ ବେହେରାକୁ କାବୁ କରିଥିଲେ। ମଦ ବୋତଲଗୁଡ଼ିକ ଭାଙ୍ଗି ନଷ୍ଟ କରିଦେବା ସହ ଜୟନ୍ତକୁ ଗଛରେ ବାନ୍ଧି ସାଲେପୁର ପୁଲିସକୁ ଖବର ଦେଇଥିଲେ। ଏନେଇ ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ଜୟନ୍ତ ବେହେରାକୁ ଗିରଫ କରି ଥାନାକୁ ନେଇଛି। ତେବେ ଏହି ଦେଶୀ ମଦ ବେପାରକୁ ନେଇ ସ୍ଥାନୀୟ ଲୋକଙ୍କ ଭିତରେ ଅସନ୍ତୋଷ ଦେଖାଦେଇଥିବା ବେଳେ ଏ ଅଞ୍ଚଳରେ ଦେଶୀ ମଦ ବେପାରକୁ ସମ୍ପୁର୍ଣ୍ଣ ବନ୍ଦ କରିବାକୁ ଅଞ୍ଚଳବାସୀଙ୍କ ପକ୍ଷରୁ ଦାବି ହୋଇଛି ।