ତାଳଚେର ହାଣ୍ଡିଧୂଆଁ ଛକ ନିକଟରେ ଥିବା ଏକ ଜିମ୍ ରୁ ବାହାରିବା ବେଳେ ଭୁଜାଲି ଓ ଖଣ୍ଡାରେ ଯୁବକଙ୍କୁ ଗୋଡ଼ାଇ ଗୋଡ଼ାଇ ହାଣିଲେ ପାଞ୍ଚଜଣ ମୁଖା ପିନ୍ଧା ଦୃବୃତ୍ତ । ଜୀବନ ବିକଳରେ ଦୌଡ଼ି ପଳାଇବା ଆସିବା ପରେ ଗୁରୁତର ଅବସ୍ଥାରେ ସ୍ଥାନୀୟ ଲୋକେ କଲେ ହସ୍ପିଟାଲରେ ଭର୍ତ୍ତି ।
ସୂଚନା ଅନୁସାରେ ଘଣ୍ଟପଡ଼ା ଗ୍ରାମର ଦେବାଶିଷ ସାହୁ ଆଜି ସକାଳୁ ହାଣ୍ଡିଧୂଆଁ ଛକ ନିକଟରେ ଥିବା ବଜରଙ୍ଗି ଜିମ୍ ସେଣ୍ଟରକୁ ଜିମ କରିବାକୁ ଆସିଥିଲେ। ସେଠାରୁ ସେ ଜିମ ସାରି ଘରକୁ ବାହାରୁଥିବା ବେଳେ ହଠାତ ପାଞ୍ଚ ଜଣ ଯୁବକ ମୁଖା ପିନ୍ଧି ଆସି ଯୋଜନା ବଦ୍ଧ ଭାବେ ତାଙ୍କୁ ଖଣ୍ଡା ଭୂଜାଲି ଏବଂ ଲୁହା ରଡ଼ରେ ଆକ୍ରମଣ କରିଥିଲେ। ଜୀବନ ବିକଳରେ ଦେବାଶିଷ ଦୁର୍ବୁତଙ୍କ କବଳରୁ ଖସିଆସିବାରେ ସକ୍ଷମ ହୋଇଥିଲେ। ପରେ ସ୍ଥାନୀୟ ଲୋକେ ତାଙ୍କୁ ରାସ୍ତାରେ ପଡ଼ିଥିବା ଦେଖି ରକ୍ତଯୁଡ଼ୁବୁଡୁ ଅବସ୍ଥାରେ ଉଦ୍ଧାର କରି ତାଳଚେର ପବିତ୍ର ମୋହନ ପ୍ରଧାନ ସରକାରୀ ଡାକ୍ତରଖାନାରେ ଭର୍ତ୍ତି କରିଥିଲେ। ତେବେ ତାଙ୍କ ମୁଣ୍ଡ, ପିଠି, ହାତ ସହିତ ଶରୀର ବିଭିନ୍ନ ସ୍ଥାନରେ ଗଭୀର ଆଘାତ ଲାଗିଥିବା ଜଣାପଡିଛି । ତେବେ ସେଠାରେ ତାଙ୍କ ଅବସ୍ଥା ଶଙ୍କଟାପନ୍ନ ହେବାରୁ ତାଙ୍କୁ ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ତେବେ ଘଟଣା ଘଟିବାର ଦୁଇ ଘଣ୍ଟା ବିତିଯାଇଥିଲେ ମଧ୍ୟ କୋଲିୟାରୀ ପୁଲିସ୍ ପାଖରେ କୌଣସି ଖବର ନଥିବା ପରିବାର ପକ୍ଷରୁ ଅଭିଯୋଗ ହୋଇଛି।