ଜୋରଦାର ପ୍ରସ୍ତୁତି କରିଥିଲେ । ବରଫ ପେଟିରେ ଭାକୁର, ରୋହି, ଚିଙ୍ଗୁଡ଼ି, କଙ୍କଡ଼ା ଭର୍ତ୍ତ ହୋଇଥିଲା । ଖାସି ବି ମାଳମାଳ ବନ୍ଧା ହୋଇଥିଲେ । କୁକୁଡ଼ା ଗାଡ଼ିର ଲମ୍ବା ଲାଇନ୍ ଲାଗିଥିଲା । ରାତି ୪ଟାରୁ ବେପାରୀମାନେ ଆସି ହାଟରେ ବସି ଆମିଷ ପସରା ଖୋଲିଥିଲେ । ଲୋକେ ବି ଭିଡ଼ ଜମାଇଲେ । ହେଲେ ଯେତିକି ଆଶା ଥିଲା ସେତିକି ଟଙ୍କାର ବେପାର ହୋଇନି । ଛାଡ଼ଖାଇରେ ୭ କୋଟିର ବେପାର ହେବ ବୋଲି ଆକଳନ କରାଯାଉଥିଲା, ମାତ୍ର ୪ କୋଟି ହିଁ ଛୁଇଁପାରିଛି । ଭୁବନେଶ୍ୱରରେ ଶୁକ୍ରବାର ଛାଡ଼ଖାଇ ସ୍ଥିତି ଏଭଳି କିଛି ଥିଲା । ଛାଡଖାଇରେ ମୋଟ ୧ କୋଟି ୩୦ଲକ୍ଷ ଟଙ୍କାର ମାଛ, ୧କୋଟି ୨୭ଲକ୍ଷ ୫୦ହଜାର ଟଙ୍କାର ମଟନ୍ ଓ ୧ କୋଟି ୧୧ଲକ୍ଷ ୨୫ହଜାର ଟଙ୍କାର ଚିକେନ୍ ବେପାର ହୋଇଛି ।
ମାଛ ମଧ୍ୟରେ ଇଲିଶିର ସବୁଠୁ ଅଧିକ ଦର ଥିଲା । ୟୁନିଟ-୪ ହାଟରେ କିଲୋ ପ୍ରତି ୧୮୦୦ରୁ ନେଇ ୨୦୦୦ ଟଙ୍କା ପର୍ଯ୍ୟନ୍ତ ଇଲିଶି ଦର ଥିବା ବେଳେ ପାମ୍ପ୍ରେଟ୍ ୬୦୦ରୁ ୯୦୦, ଭେକ୍ଟି ୫୦୦, ରୋହି ୨୦୦ରୁ ୨୪୦, ଭାକୁର ୩୦୦, ମିରକାଳି ୨୨୦ରୁ ୨୪୦, ମହୁରାଡ଼ି ୨୨୦, ଚିଙ୍ଗୁଡ଼ି ୨୦୦ରୁ ୫୦୦, ଟାଇଗର ଚିଙ୍ଗୁଡ଼ି ୭୦୦, ବାଗଦା ଚିଙ୍ଗୁଡ଼ି ୬୦୦ରୁ ୧୦୦୦, କିଙ୍ଗ୍ ଫିସ୍ ୬୦୦, ପାଣିଆଖିଆ ୨୦୦, ଚିଲିକା ପାଟୁଆ ୧୫୦, ଖଇଁଗା ୫୫୦, ଜଳଙ୍ଗ ୧୫୦ ଓ ରୁପଚାନ୍ଦି ୧୭୦ ଟଙ୍କା ରହିଥିଲା । ୫୦୦ରୁ ୨୫୦୦ ଟଙ୍କା ପର୍ଯ୍ୟନ୍ତ ଦରରେ କଙ୍କଡ଼ା ବିକ୍ରି ହେଉଥିଲା । ମୋଟ ୧୦୦୦ କୁଇଣ୍ଟାଲ ମାଛ ବିକ୍ରି ହୋଇଥିବା ବେଳେ ୪୨୫ କୁଇଣ୍ଟାଲର ମଟନ ଓ ୧୫୦ କୁଇଣ୍ଟାଲର ଚିକେନ୍ ବେପାର ହୋଇଛି । ଖାସି କିଲୋପ୍ରତି ୮୦୦, ବ୍ରଏଲର ୨୪୦, ଦେଶୀ ମୟୁରଭଞ୍ଜ କୁକୁଡ଼ା ୫୦୦ରୁ ୬୦୦, ସୋନାଲି ୪୦୦, କଲରବାର୍ଡ ୨୫୦, ଅଣ୍ଡା ଡଜନ୍ ୯୦ ଟଙ୍କା ରହିଥିଲା । ତେବେ ଯାହା ବଳିଛି ତାହା ରବିବାରରେ ଦୋ-ଛାଡଖାଇରେ ପୋଛିଦେବୁ ବୋଲି ବେପାରୀମାନେ କହିଛନ୍ତି ।
ତେବେ ଚାହିଦା ଅନୁସାରେ ଆଜି ଦାମ୍ ମଧ୍ୟ ପୂର୍ବ ଅପେକ୍ଷା ଅଧିକ ରହିଥିଲା । ଅଲ ଓଡିଶା ନନ୍ଭେଜ୍ ଟ୍ରେଡର୍ସ ଫେଡେରେସନ୍ ପକ୍ଷରୁ ମିଳିଥିବା ସୂଚନା ଅନୁସାରେ, ଏଥରକ ପଶ୍ଚିମବଙ୍ଗର ନରଖୁଲଡଙ୍ଗା, ମାଲ୍ଦା, କ୍ଷେତ୍ରୀପୁରରୁ ୭୦ ପ୍ରତିଶତ ଓ ବଲାଙ୍ଗିର, ନୟାଗଡ଼, ଦଶପଲା, କାକଟପୁର ଓ ନିମାପଡ଼ାରୁ ୩୦ ପ୍ରତିଶତ ଛେଳି ଆସିଥିଲା । ଆନ୍ଧ୍ରପ୍ରଦେଶ ବ୍ୟତୀତ ପିପିଲି ଅଞ୍ଚଳରୁ ବ୍ରଏଲର ଆସିଥିଲା । ହେଲେ ଏମାନଙ୍କ ମଧ୍ୟରେ ବାଜି ମାରିଛି ମାଛ । ଫେଡେରେସନ୍ର ସଭାପତି କହିଛନ୍ତି, ମୋଟ ୪ କୋଟି ୧ଲକ୍ଷ ୩୦ହଜାର ଟଙ୍କା ବ୍ୟବସାୟ ହୋଇଛି । ଯେମିତି ବେପାର ହେବା କଥା ହୋଇଛି । ହେଲେ ମାର୍ଗଶିର ମାସ ଚାଲିଥିବା ସହ ଶୁକ୍ରବାର ସନ୍ତୋଷୀ ମାଙ୍କ ପୂଜା ପାଇଁ ଗ୍ରାହକଙ୍କ ସଂଖ୍ୟା କିଛି ମାତ୍ରାରେ କମିଛି । ତଥାପି ରବିବାର ପର୍ଯ୍ୟନ୍ତ ବେପାର ହେବ ବୋଲି ସେ କହିଛନ୍ତି ।