ରୁଷ୍ କ୍ରମାଗତ ଭାବରେ ରବିବାର ଦିନ ମଧ୍ୟ ଦ୍ୱିତୀୟ ଦିନ ପାଇଁ ରୁଷ ୟୁକ୍ରେନ ଉପରେ ଏକ ବଡ଼ ଆକ୍ରମଣ କରିଛି। ରୁଷ ସେନା ରାତାରାତି ଡ୍ରୋନ୍, କ୍ଷେପଣାସ୍ତ୍ର ଏବଂ ବୋମା ଆକ୍ରମଣ କରିଛି । ଏଥିରେ ୫ଶହରୁ ଅଧିକ ଡ୍ରୋନ୍ ଏବଂ ୫୦ ବାଲିଷ୍ଟିକ୍ କ୍ଷେପଣାସ୍ତ୍ର ରହିଛି । ଏହି ଆକ୍ରମଣରେ ଅତି କମରେ ୫ ଜଣ ସାଧାରଣ ନାଗରିକଙ୍କ ମୃତ୍ୟୁ ହୋଇଛି ଏବଂ ନାଗରିକ ଭିତ୍ତିଭୂମି ଗୁରୁତର ଭାବରେ କ୍ଷତିଗ୍ରସ୍ତ ହୋଇଛି। ରୁଷର ଏହି ଭୟଙ୍କର ଆକ୍ରମଣ ୟୁକ୍ରେନରେ ବ୍ୟାପକ ଧ୍ୱଂସ ଘଟାଇଛି।
ୟୁକ୍ରେନୀୟ ରାଷ୍ଟ୍ରପତି ଭୋଲୋଡିମିର୍ ଜେଲେନ୍ସକି ରୁଷର ଏହି ବିଶାଳ ଆକ୍ରମଣରେ କ୍ରୋଧିତ ହୋଇଛନ୍ତି । ରବିବାର ସକାଳେ ସେ କହିଛନ୍ତି ଯେ, ରୁଷ ୟୁକ୍ରେନର ନଅଟି ଭିନ୍ନ ଭିନ୍ନ ଅଞ୍ଚଳରେ ଏହି ଆକ୍ରମଣ ଜାରି ରଖିଛି, ଯେଉଁଥିରେ ୫୦ ରୁ ଅଧିକ ବାଲିଷ୍ଟିକ୍ କ୍ଷେପଣାସ୍ତ୍ର ଏବଂ ପ୍ରାୟ ୫୦୦ ଡ୍ରୋନ୍ ନିକ୍ଷେପ କରିଛି । ଜେଲେନ୍ସକିଙ୍କ ଅନୁଯାୟୀ, ଆକ୍ରମଣ ଅତ୍ୟନ୍ତ ସଂଗଠିତ ଏବଂ ବ୍ୟାପକ ଥିଲା, ଯାହାର ଲକ୍ଷ୍ୟ ନାଗରିକ ଅଞ୍ଚଳରେ ଭୟ ବିସ୍ତାର କରିବା ଏବଂ ମୌଳିକ ସେବାକୁ ବାଧା ଦେବା। ଏହି ଆକ୍ରମଣ ୟୁକ୍ରେନର ସୁରକ୍ଷା ବ୍ୟବସ୍ଥା ପାଇଁ ଏକ ବଡ଼ ଚ୍ୟାଲେଞ୍ଜ ପ୍ରମାଣିତ ହୋଇଛି।
ରୁଷ ଆକ୍ରମଣରେ ୟୁକ୍ରେନର ଲବିବ ସହର ସବୁଠାରୁ ଅଧିକ କ୍ଷତି ହୋଇଛି। ସ୍ଥାନୀୟ କର୍ତ୍ତୃପକ୍ଷ ଏବଂ ଜରୁରୀକାଳୀନ ସେବାର ରିପୋର୍ଟ ଅନୁଯାୟୀ, ଲବିବ୍ ଉପରେ ଡ୍ରୋନ୍ ଏବଂ କ୍ଷେପଣାସ୍ତ୍ର ବର୍ଷା ହେବା ଫଳରେ ୪ ଜଣ ଲୋକ ପ୍ରାଣ ହରାଇଛନ୍ତି ଏବଂ ଅନେକ ଆହତ ହୋଇଛନ୍ତି। ଲବିବ୍ ମେୟର ଆଣ୍ଡ୍ରି ସାଡୋୱି କହିଛନ୍ତି ଯେ, ଆକ୍ରମଣ ଯୋଗୁଁ ସହରର ଦୁଇଟି ଜିଲ୍ଲାରେ ବିଦ୍ୟୁତ୍ ଯୋଗାଣ ବାଧାପ୍ରାପ୍ତ ହୋଇଛି ଏବଂ ସାଧାରଣ ପରିବହନ ମଧ୍ୟ ପ୍ରଭାବିତ ହୋଇଛି। ସେ ଏହା ମଧ୍ୟ କହିଛନ୍ତି ଯେ ଆକ୍ରମଣ ସମୟରେ ସହର ଉପକଣ୍ଠରେ ଥିବା ଏକ ବାଣିଜ୍ୟିକ କମ୍ପ୍ଲେକ୍ସରେ ନିଆଁ ଲାଗିଥିଲା, ଯାହାକୁ ଅଗ୍ନିଶମ ବିଭାଗ କିଛି ଘଣ୍ଟାର ପ୍ରୟାସ ପରେ ଲିଭାଇ ଦେଇଛି ।
ଋଷର ଆକ୍ରମଣରେ ଜାପୋରିଝିଆ ସହରରେ ମଧ୍ୟ ଯଥେଷ୍ଟ କ୍ଷତି ହୋଇଛି। ଜାପୋରିଝିଆ ଗଭର୍ଣ୍ଣର ଇଭାନ୍ ଫେଡୋରୋଭ କହିଛନ୍ତି ଯେ ବିମାନ ଆକ୍ରମଣରେ ଜଣେ ମହିଳା ପ୍ରାଣ ହରାଇଛନ୍ତି ଏବଂ ଜଣେ ୧୬ ବର୍ଷୀୟା ଝିଅ ସମେତ୯ ଜଣ ଆହତ ହୋଇଛନ୍ତି। ଏହି ଆକ୍ରମଣ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଭୟ ଏବଂ ଅସୁରକ୍ଷାର ଭାବନା ବୃଦ୍ଧି କରିଛି। ୟୁକ୍ରେନର ଜରୁରୀକାଳୀନ ସେବା ରିପୋର୍ଟ କରିଛି ଯେ, ଆକ୍ରମଣରେ ଆହତଙ୍କ ସଂଖ୍ୟା ସାରା ଦେଶରେ କ୍ରମାଗତ ଭାବରେ ବୃଦ୍ଧି ପାଉଛି ଏବଂ ପ୍ରଭାବିତ ଅଞ୍ଚଳରେ ଉଦ୍ଧାରକାରୀ ଦଳ ରିଲିଫ୍ କାର୍ଯ୍ୟରେ ନିୟୋଜିତ ଅଛନ୍ତି।