ସୁବର୍ଣ୍ଣପୁର ଜିଲ୍ଲାରେ ଧାନ କ୍ରୟ ପ୍ରକ୍ରିୟା ଏବେ ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡିଛି। ଜିଲ୍ଲାର ୯୨ଟି ପ୍ୟାକ୍ସ (PACS) ରେ ହଜାର ହଜାର କ୍ଵିଣ୍ଟାଲ ଧାନ ପଡି ରହିଥିବା ବେଳେ ମିଲର୍ସଙ୍କ ଅସହଯୋଗ କାରଣରୁ ଚାଷୀ ଏବେ ହତାଶ ହୋଇପଡିଛନ୍ତି। ଟୋକନ ଅବଧି ସରି ଆସୁଥିଲେ ମଧ୍ୟ ମଣ୍ଡିକୁ ଗାଡ଼ି ଆସୁନଥିବାରୁ ଧାନ ଉଠାଣ ବାଧାପ୍ରାପ୍ତ ହୋଇଛି।
ମିଲର୍ସମାନେ ଗାଡ଼ି ପଠାଉ ନଥିବାରୁ ଖୋଲା ଆକାଶ ତଳେ, ଶୀତ ଓ କାକରରେ ଚାଷୀ ନିଜର କଷ୍ଟଅର୍ଜିତ ଧାନକୁ ଜଗି ରହିଛି। ଅନେକ ସ୍ଥାନରେ ଧାନ ନଷ୍ଟ ହେବାକୁ ବସିଲାଣି। ଚାଷୀଙ୍କ ଅଭିଯୋଗ ଅନୁଯାୟୀ, ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା କରାଯାଇଥିବା ଦାବି କରାଯାଉଥିଲେ ହେଁ ବାସ୍ତବରେ ମିଲର୍ସମାନେ ମଣ୍ଡିରୁ ଧାନ ଉଠାଇବାକୁ ଆଗ୍ରହ ଦେଖାଉନାହାନ୍ତି।
ଏପଟେ ଖରିଫ୍ ଧାନ ବିକ୍ରି ସରିନଥିବା ବେଳେ ରବି ଋତୁ ପାଇଁ ଚାଷ କାମ ଆରମ୍ଭ ହୋଇଗଲାଣି। ଖରିଫ୍ ଧାନ ବିକ୍ରି କରି ସେହି ଟଙ୍କାରେ ରବି ଚାଷ କରିବାକୁ ଯୋଜନା ରଖିଥିବା ଚାଷୀ ଏବେ ଦ୍ୱନ୍ଦ୍ୱରେ। ହାତରେ ପଇସା ନାହିଁ, ଅନ୍ୟପଟେ ମଣ୍ଡିରେ ଧାନ ପଡି ରହିଛି। ଯଦି ଶୀଘ୍ର ଧାନ ଉଠା ନଯାଏ, ତେବେ ଆଗାମୀ ଦିନରେ ଜିଲ୍ଲା ଚାଷୀ କୁଳ ଆନ୍ଦୋଳନ ପାଇଁ ସଜବାଜ ହେଉଛନ୍ତି।