ନୟାଗଡ଼ ଜିଲ୍ଲା ଦଶପଲ୍ଲା ବ୍ଳକ ଡହଗାଁ ଗ୍ରାମ ପଞ୍ଚାୟତରେ ଷଣ୍ଢ ଆତଙ୍କ । ମାଳିସାହି ଠାରେ ଷଣ୍ଢ ଆକ୍ରମଣରେ ଜଣେ ବୃଦ୍ଧଙ୍କ ମୃତ୍ୟୁ ଘଟିଛି। ଯାହାକୁ ନେଇ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି। ଆତଙ୍କ ଖେଳାଇଥିବା ଶଣ୍ଢକୁ ଧରିବାକୁ ସାଧାରଣରେ ଦାବି ହୋଇଛି।
ସୂଚନା ଅନୁଯାୟୀ, ମଙ୍ଗଳବାର ସକାଳ ପ୍ରାୟ ୧୦ ଟା ସମୟରେ ବାଉରିଆ ରଣା ହାତରେ ବାଙ୍କୁଲି ବାଡ଼ି ଧରି ନିତ୍ୟକର୍ମ ପାଇଁ ପୋଖରୀକୁ ଯାଉଥିଲେ। ଏହି ସମୟରେ ସେଠାରେ ଶୋଇଥିବା ଏକ ଷଣ୍ଢ ହଠାତ୍ ଦୌଡ଼ି ଆସି ବାଉରିଆଙ୍କୁ ଆକ୍ରମଣ କରିଥିଲା । ଫଳରେ ବୃଦ୍ଧ ଜଣକ ତଳେ ପଡି ରକ୍ତାକ୍ତ ହୋଇଥିଲେ। ଏହା ଦେଖି ପରିବାର ଲୋକେ ତାଙ୍କୁ ଉଦ୍ଧାର କରି ସଙ୍ଗେ ସଙ୍ଗେ ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ । ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ତାଙ୍କ ମୃତ୍ୟୁ ଖବରପାଇ ଗ୍ରାମରେ ଶୋକାକୁଳ ପରିବେଶ ସୃଷ୍ଟି ହୋଇଛି।