ରାଜଧାନୀରେ ଜଣେ ୧୧ ବର୍ଷର ନାବାଳିକା ଦୁଷ୍କର୍ମ ଶିକାର ହୋଇଛନ୍ତି । ଗୁରୁତର ଅବସ୍ଥାରେ ନାବାଳିକାକୁ ହସ୍ପିଟାଲରେ ଭର୍ତ୍ତି କରାଯାଇଛି । ଅଭିଯୋଗ ପାଇ ମହିଳା ଥାନା ପୁଲିସ ଏକ ମାମଲା ରୁଜୁକରି ଦୁଷ୍କର୍ମକାରୀକୁ ଗିରଫ କରିବା ପାଇଁ ତନାଘନା ଆରମ୍ଭ କରିଦେଇଛି ।
ମିଳିଥିବା ଅଭିଯୋଗ ମୁତାବକ, ଗଞ୍ଜାମ ଅଞ୍ଚଳର ନାବାଳିକା ଜଣକ ବାପା-ମା’ ସହ ଭରତପୁର ଥାନା କଳିଙ୍ଗନଗର ଅଞ୍ଚଳରେ ଏକ ଭଡ଼ା ଘରେ ରହୁଥିଲେ । ବାପା-ମା’ କାମକୁ ଯିବା ପରେ ଘରେ ଝିଅ ଏକୁଟିଆ ରହୁଥିଲା । ଗତ ୪ ତାରିଖରେ ଉକ୍ତ ଅଞ୍ଚଳରେ ପାନ ଦୋକାନ କରିଥିବା ନରେଶ ନାମକ ଜଣେ ଯୁବକ ନାବାଳିକାକୁ ଏକୁଟିଆ ପାଇ ଦୁଷ୍କର୍ମ କରିବା ପାଇଁ ଉଦ୍ୟମ କରିଥିଲା । ତେବେ ନାବାଳିକା ପାଟି କରିବାରୁ ନରେଶ ସେଠାରୁ ଖସି ପଳାଇଥିଲା ।
ଗତକାଲି ନାବାଳିକାର ବାପା-ମା’ ଘରେ ନଥିବା ବେଳେ ନରେଶ ପୁଣି ନାବାଳିକାକୁ ଏକୁଟିଆ ପାଇ ଜୋର ଜବରଦସ୍ତ ଦୁଷ୍କର୍ମ କରିଥିଲା । କାହାରିକୁ କହିଲେ ଜୀବନରୁ ମାରିଦେବାକୁ ଧମକ ମଧ୍ୟ ଦେଇଥିଲା ନରେଶ । ନାବାଳିକା ଜଣକ ବାପା-ମା’ କାମରୁ ଫେରି ଝିଅ କାନ୍ଦୁ ଥିବା ଓ ତା’ର ରକ୍ତସ୍ରାବ ହେଉଥିବାର ଦେଖି ତାକୁ ପଚରାଉଚରା କରିଥିଲେ । ନାବାଳିକା ଜଣଙ୍କ ବାପା-ମା’ଙ୍କ ଆଗରେ ସବୁକଥା କହିଥିଲା । ବାପା-ମା’ ଝିଅକୁ ଧରି ମହିଳା ଥାନାରେ ପହଞ୍ଚି ଅଭିଯୋଗ କରିଥିଲେ । ମହିଳା ଥାନା ପୁଲିସ ମାମଲା ନଂ-୩୮୪/୨୫ ରୁଜୁ କରିବା ସହ ପ୍ରଥମେ ନାବାଳିକାକୁ ନେଇ ହସ୍ପିଟାଲରେ ଭର୍ତ୍ତି କରିଛି । ଅଭିଯୁକ୍ତ ନରେଶକୁ ଗିରଫ କରିବା ପାଇଁ ପୁଲିସ ଚଢ଼ଉ ଜାରି ରଖିଥିବା ମହିଳା ଥାନା ସୂତ୍ରରୁ ଜଣାପଡ଼ିଛି ।