ଓଡ଼ିଶା ରାଜନୀତିରେ ଏକ ନୂଆ ବିକଳ୍ପର ସନ୍ଧାନରେ ଥିବା ବରିଷ୍ଠ ନେତା ମହମ୍ମଦ ମୋକିମ ନିଜର ନୂଆ ଆଞ୍ଚଳିକ ଦଳ ଗଠନ ନେଇ ପ୍ରସ୍ତୁତି ଜୋରଦାର କରିଛନ୍ତି। ପୂର୍ବରୁ ଜାନୁଆରୀ ୧୨ ତାରିଖରେ ଦଳ ଘୋଷଣା ହେବା ନେଇ ଚର୍ଚ୍ଚା ହେଉଥିବା ବେଳେ, ଏବେ ଏହି ତାରିଖରେ ପରିବର୍ତ୍ତନ କରାଯାଇଛି। ମୋକିମଙ୍କ ସୂଚନା ଅନୁଯାୟୀ, ଆସନ୍ତା ମାର୍ଚ୍ଚ ୨୬ କିମ୍ବା ଏପ୍ରିଲ ୮ ତାରିଖରେ ନୂଆ ଦଳର ନାମ ଓ ଆଭିମୁଖ୍ୟ ସମ୍ପର୍କରେ ବିଧିବଦ୍ଧ ଘୋଷଣା କରାଯାଇପାରେ। ବର୍ତ୍ତମାନ ଦଳର ନାମକରଣ ଓ ଅନ୍ୟାନ୍ୟ ବୈଷୟିକ ଦିଗ ଉପରେ ବିଚାର ବିମର୍ଶ ଚାଲିଛି।
ଦଳ ଘୋଷଣା ଘୁଞ୍ଚିଥିଲେ ମଧ୍ୟ ଜାନୁଆରୀ ୧୨ (ଜାତୀୟ ଯୁବ ଦିବସ) ରେ ଭୁବନେଶ୍ୱରଠାରେ ଏକ ବଡ଼ ଧରଣର ଯୁବ ସମାବେଶ ଆୟୋଜନ କରାଯାଉଛି। ଏହି ସମ୍ମିଳନୀରେ ସାରା ଓଡ଼ିଶାରୁ ପ୍ରାୟ ୧୦୦୦ରୁ ଅଧିକ ଯୁବ ନେତା ଯୋଗ ଦେବାର କାର୍ଯ୍ୟକ୍ରମ ରହିଛି। ୨୦୩୬ ମସିହାରେ ଓଡ଼ିଶା ସ୍ୱତନ୍ତ୍ର ପ୍ରଦେଶ ଗଠନର ୧୦୦ ବର୍ଷ ପୂରଣ କରିବାକୁ ଯାଉଥିବା ବେଳେ, “ଶତାବ୍ଦୀର ଓଡ଼ିଶା” କିପରି ହେବ ଏବଂ ରାଜ୍ୟର ବିକାଶରେ ଯୁବକମାନଙ୍କର ଭୂମିକା କଣ ରହିବ, ସେ ନେଇ ଏହି ସମାବେଶରେ ଗୁରୁତ୍ୱପୂର୍ଣ୍ଣ ଆଲୋଚନା କରାଯିବ।
ସାମ୍ପ୍ରତିକ ରାଜନୈତିକ ସ୍ଥିତିକୁ ଦୃଷ୍ଟିରେ ରଖି ମୋକିମ କହିଛନ୍ତି ଯେ ଓଡ଼ିଶାରେ ଏକ ଶକ୍ତ ଆଞ୍ଚଳିକ ବିକଳ୍ପର ଆବଶ୍ୟକତା ରହିଛି। ତାଙ୍କର ନୂଆ ଦଳ ମୁଖ୍ୟତଃ ନିଶା ନିବାରଣ, ଯୁବ ନେତୃତ୍ୱକୁ ପ୍ରାଧାନ୍ୟ ଏବଂ ମାଗଣା ଯୋଜନା ବଦଳରେ ରୋଜଗାରକ୍ଷମ ଶିକ୍ଷା ଉପରେ ଫୋକସ କରିବ। ବିଶେଷ କରି ଆସନ୍ତା ଏପ୍ରିଲରେ ହେବାକୁ ଥିବା ରାଜ୍ୟସଭା ନିର୍ବାଚନରେ ମଧ୍ୟ ଏହି ନୂଆ ଗୋଷ୍ଠୀ ଏକ ନିର୍ଣ୍ଣାୟକ ଭୂମିକା ଗ୍ରହଣ କରିପାରେ ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି।