ଭିଏସଏସ ନଗରରେ ମାତିଛନ୍ତି ପାଣି ମିଟର ଚୋର । ପ୍ରତିଦିନ ରାତିରେ ବାହାରେ ଲାଗିଥିବା ନୂଆ ପାଣି ମିଟର କାଟି ନେଉ ଯାଉଛନ୍ତି । ଗତ ୧୫ ଦିନ ଭିତରେ ୨୨ଟି ମିଟର ଚୋରି ହୋଇଗଲାଣି । ସହିଦ ନଗର ଥାନାରେ ଏତଲା ପରେ ପୁଲିସ ତନାଘନା ଆରମ୍ଭ କରିଛି । ଚୋରି ପଛରେ ନିଶାଖୋରଙ୍କ ସମ୍ପୃକ୍ତି ରହିଥିବା ଜଣାପଡ଼ିଛି । ୱାଟ୍କୋ ପକ୍ଷରୁ ଭିଏସଏସ ନଗରର ବିଭିନ୍ନ ବସ୍ତି ଓ କଲୋନିକୁ ଜଳ ଯୋଗାଣ ପାଇଁ ଘର ବାହାରେ ମିଟର ଲଗାଯାଇଛି । ମିଟର ରିଡିଂ ଅନୁଯାୟୀ ଲୋକେ ମାସିକ ଟଙ୍କା ପୈଠ କରୁଛନ୍ତି। ହେଲେ ଏହି ମିଟର ଉପରେ ଦୁର୍ବୃତ୍ତଙ୍କ ନଜର ପଡିଛି । ରାତିରେ ଚୋରମାନେ ମିଟର କାଟି ନେଇ ଯାଉଛନ୍ତି ।
ମିଟର ଭିତରେ ୮୦୦ରୁ ୯୦୦ ଗ୍ରାମର ପିତ୍ତଳ ଯନ୍ତ୍ରାଂଶ ରହୁଥିବାରୁ ଚୋରି ପରେ ବିକ୍ରି କରି ଦେଉଛନ୍ତି । ଗତ ୩୧ ତାରିଖରେ ଭିଏସ୍ଏସ ନଗର ବାସିନ୍ଦା ସନାତନ କିସ୍କୁଙ୍କ ଘର ବାହାରେ ଲାଗିଥିବା ପାଣି ମିଟର ଭଙ୍ଗା ଅବସ୍ଥାରେ ମିଳିଥିଲା । ତା ପରଦିନ ତାଙ୍କ ପଡ଼ୋଶୀ ବିକାଶ ରାଉତଙ୍କ ମିଟର ମଧ୍ୟ କିଏ ନେଇ ଯାଇଥିଲା । ଘର ବାହାରେ ଲାଗିଥିବା ସିସିଟିଭି ଯାଞ୍ଚ କରିବା ପରେ ଚୋରି ହୋଇଥିବା ଜଣାପଡ଼ିଥିଲା । ପରେ ପରେ ସ୍ଥାନୀୟ ତ୍ରିନାଥ ବସ୍ତିର ସୁଷମା ବଡ଼ପଣ୍ଡା, କମଳି ନାୟକ, ଅନୁପମା ମଲ୍ଲିକ ଓ ସଞ୍ଜୁଲତା ଦାଉରଙ୍କ ମିଟର ମଧ୍ୟ ଚୋରି ହୋଇଥିଲା ।
ୱାଟକୋ ସଂସ୍ଥାକୁ ଜଣାଇବା ପରେ ଥାନାରେ ଏତଲା ଦେଲେ ନୂଆ ମିଟର ମିଳିବ ବୋଲି କୁହାଯାଇଥିଲା । ଚୋରି ହୋଇଥିବା ଲୋକେ ଥାନାରେ ଏତଲା ଦେଇଛନ୍ତି । ତେବେ ସିସିଟିଭିରେ ସ୍ଥାନୀୟ କିଛି ନିଶାଖୋରଙ୍କ ସମ୍ପୃକ୍ତି ମିଳୁଛି । ସେମାନେ ପ୍ରାୟତଃ ଟ୍ରେନ୍ କଡ଼ରେ ବୁଲାବୁଲି କରନ୍ତି । ଜରି, ପ୍ଲାଷ୍ଟିକ ଗୋଟାଇ ବିକ୍ରି କରି ନିଶା ଖାଇ ଦିଅନ୍ତି । ସେମାନେ ଏହିସବୁ ମିଟର ଚୋରି କରି କବାଡ଼ିଆ ଦୋକାନରେ ବିକ୍ରି କରୁଛନ୍ତି । ଏନେଇ ସ୍ଥାନୀୟ ବାସିନ୍ଦା ଦୟାନନ୍ଦ ହେମ୍ବ୍ରମ୍ କହିଛନ୍ତି ଯେ ପୁଲିସ ପାଟ୍ରୋଲିଂ ଢିଲା ପାଇଁ ଚୋରି ବୃଦ୍ଧି ପାଉଛି । ଶୀତ ଦିନ ପାଇଁ ଲୋକେ ଘର ଭିତରେ ରହୁଛନ୍ତି । ଚୋରମାନେ ଆରାମରେ ଚୋରି କରି ଖସି ଯାଉଛନ୍ତି ।