ଚଣ୍ଡିଖୋଲ, ୨୯/୮(ଜେବିଆର ସମାଚାର) : ଚୋରା ମଦ ବେପାରୀଙ୍କୁ ମହିଳାମାନେ କାବୁ କରି ପୋଲିସ ହସ୍ତାନ୍ତର କରିଥିବା ଘଟଣା ଚଣ୍ଡିଖୋଲରେ ସୃଷ୍ଟି କରିଛି ଚର୍ଚ୍ଚା।
ବାଲିଚନ୍ଦ୍ରପୁର ଥାନା ଅନ୍ତର୍ଗତ ଖଡ଼ିଅଙ୍ଗ ଗ୍ରାମର ଜ୍ଞାନରଞ୍ଜନ ବରାଳ (୪୨), ଏକ ବାଇକ୍ରେ ୫୦ରୁ ଅଧିକ ବୋତଲ ବିଦେଶୀ ଚୋରା ମଦ ନେଇ ମହାଦେଇପୁର ଦଳେଇ ସାହି ଦେଇ ଯାଉଥିବା ସମୟରେ ସ୍ଥାନୀୟ ମହିଳାମାନେ ତାଙ୍କୁ କାବୁ କରିଥିଲେ।
ଖବର ପାଇଥିବା ପରେ, ପୋଲିସ ଘଟଣାସ୍ଥଳରେ ପହଞ୍ଚି ବାଇକ୍ ସହିତ ଚୋରା ମଦକୁ ଜବତ କରି, ଜ୍ଞାନରଞ୍ଜନଙ୍କୁ ଗିରଫ କରିଥିଲା। ଏହି ମାମଲା ଥାନା କେଶ ନମ୍ବର ୨୪୧/୨୫ ରେ ରୁଜୁ କରାଯାଇଛି।
ଥାନାଧିକାରୀ ସମରଜିତ ନାୟକ ଗଣମାଧ୍ୟମକୁ କହିଛନ୍ତି ଯେ, ଗିରଫ ବେପାରୀଙ୍କୁ ଆସନ୍ତା କାଲି କୋର୍ଟ ଚାଲାଣ କରାଯିବ।
ଏହା ସହିତ, ମହାଦେଇପୁର ଦଳେଇ ସାହିରେ ୭ ଜଣ ବ୍ୟକ୍ତି ଚୋରା ମଦ ବେପାର କରୁଥିବା ନେଇ, ଗତ ୨୭ ତାରିଖରେ ୩୦ରୁ ଅଧିକ ମହିଳା ଥାନାକୁ ଯାଇ ଲିଖିତ ଅଭିଯୋଗ କରିଥିଲେ ଏବଂ ଅଞ୍ଚଳକୁ ମଦମୁକ୍ତ କରିବାକୁ ଦାବି କରିଥିଲେ।