ରବିବାର ବିଳମ୍ଵିତ ରାତିରେ ଭୟାବହ ଅଗ୍ନିକାଣ୍ଡ। ଜଳିଗଲା ୬ ପରିବାରର ୧୬ ବଖରା ଘର। ପୋଡ଼ି ପାଉଁଶ ହୋଇଗଲା ଧାନ, ଚାଉଳ, ରାସନ କାର୍ଡ ଓ ପିଲାଙ୍କ ବହିପତ୍ର। ପିନ୍ଧା ଲୁଗା ଛଡ଼ା ନିଆଁର ଆଁରୁ କାଢି ପାରିଲେନି କିଛି। ୮ ଗୋରୁ ଓ ୩ ଛେଳି ଜୀବନ୍ତ ଦଗ୍ଧ। ପାଉଁଶ ତଳୁ ଅଣ୍ଡାଳୁଛନ୍ତି ବର୍ଷ ବର୍ଷର ସାଇତା ଧନ। ଭଦ୍ରକ ଜିଲ୍ଲା ପୀରହାଟ ଥାନା ନରେନ୍ଦ୍ରପୁର ପଞ୍ଚାୟତର ଛତ୍ରପଦା ଗାଁରେ ଏଭଳି ଭୟାବହ ଅଗ୍ନିକାଣ୍ଡ ଘଟିଛି। ଅଗ୍ନିଶମ ଗାଡି ବିଳମ୍ଵରେ ପହଞ୍ଚିବାରୁ ସବୁ କିଛି ଜଳିପୋଡ଼ି ଛାରଖାର ହୋଇଯାଇଛି।
ସୂଚନାନୁଯାୟୀ, ରବିବାର ବିଳମ୍ଵିତ ରାତିରେ ପୀରହାଟ ଥାନା ଛତ୍ରପଦା ଗାଁର ପଣ୍ଡିତ ସାହିରେ ନିଆଁ ଲାଗିଥିଲା। ଦେଖୁ ଦେଖୁ ସାହିରେ ନିଆଁ ବ୍ୟାପିଯାଇଥିଲା। ନିଆଁର ପ୍ରକୋପ ଏତେ ଭୟଙ୍କର ଥିଲା ଯେ ୬ଟି ପରିବାରର ୧୬ ବଖରା ଘର ଜଳିପୋଡ଼ି ଛାରଖାର ହୋଇଯାଇଥିଲା। ୮ ଗୋରୁ ଓ ୩ ଛେଳି ସମେତ ଘରର ସମସ୍ତ ଆସବାବପତ୍ର ଜଳି ଯାଇଥିଲା। ବିଳମ୍ଵରେ ଅଗ୍ନିଶମ ଗାଡ଼ି ପହଞ୍ଚିବାରୁ ସବୁ କିଛି ଜଳି ସାରିଥିଲା। ଚାରିଆଡ଼େ ନିଆଁ ବ୍ୟାପି ଯାଇଥିବାରୁ ନିଆଁକୁ ଆୟତ୍ତ କରିବା କଷ୍ଟକର ହୋଇଥିଲା।
ଏହି ଖବର ପାଇବା ପରେ ଜିଲ୍ଲା ପରିଷଦ ପହଞ୍ଚି କ୍ଷତିଗ୍ରସ୍ତ ପରିବାରକୁ ସାନ୍ତ୍ଵନା ଦେଇଛନ୍ତି। ଗ୍ରାମର କିଛି ଯୁବକମାନେ ସେମାନଙ୍କୁ ଶୁଖିଲା ଖାଦ୍ୟ ବଣ୍ଟନ କରିଛନ୍ତି। ଅଗ୍ନି ବିପନ୍ନଙ୍କୁ ସରକାରୀ ସହାୟତା ଯୋଗାଇ ଦେବାକୁ ଦାବି ହୋଇଛି।