ବ୍ରହ୍ମପୁରରେ ବିଜେପି ନେତା ଓ ଆଇନଜୀବୀ ପୀତବାସ ପଣ୍ଡାଙ୍କୁ ଗୁଳି ମାରି ହତ୍ୟା ଘଟଣା ପ୍ରତିବାଦରେ ଆଜି ସାରା ଓଡ଼ିଶାରେ ଆଇନଜୀବୀମାନେ କଲମ ଛାଡ଼ ଆନ୍ଦୋଳନ କରୁଛନ୍ତି।
ବାର୍ କାଉନସିଲ ଏହି ହତ୍ୟାକୁ ଦୃଢ ନିନ୍ଦା କରିଥିବା ସହ ସ୍ବତନ୍ତ୍ର ତଦନ୍ତ ପାଇଁ SIT ଗଠନ ଦାବି କରିଛି। କାଉନସିଲ ପକ୍ଷରୁ କୁହାଯାଇଛି ଯେ, ତଦନ୍ତ ଏକ ବରିଷ୍ଠ ଆଇପିଏସ୍ ଅଧିକାରୀଙ୍କ ନିୟନ୍ତ୍ରଣରେ ହେବା ଉଚିତ ଓ ସମୟସୀମା ମଧ୍ୟରେ ସମାପ୍ତ ହେବା ଆବଶ୍ୟକ।
ସମସ୍ତ ଅପରାଧୀ, ଷଡ଼ଯନ୍ତ୍ରକାରୀ ଓ ସହଯୋଗୀଙ୍କୁ ଶୀଘ୍ର ଗିରଫ କରିବାକୁ ବାର୍ କାଉନସିଲ ଦାବି କରିଛି। ସେହିପରି, ୪୮ ଘଣ୍ଟା ମଧ୍ୟରେ ରାଜ୍ୟର ସମସ୍ତ କୋର୍ଟ ପରିସରରେ CCTV କ୍ୟାମେରା ସ୍ଥାପନ କରିବାକୁ ଓ ଆଇନଜୀବୀମାନଙ୍କ ସୁରକ୍ଷା ନିଶ୍ଚିତ କରିବାକୁ ସରକାରକୁ ଆହ୍ୱାନ କରାଯାଇଛି।
ଏହାସହିତ, ମୃତ ଆଇନଜୀବୀ ପୀତବାସ ପଣ୍ଡାଙ୍କ ପରିବାରକୁ କୋଟିଏ ଟଙ୍କାର ଆର୍ଥିକ ସାହାଯ୍ୟ ଦେବା ପାଇଁ ମଧ୍ୟ ବାର୍ କାଉନସିଲ ରାଜ୍ୟ ସରକାରଙ୍କୁ ନିବେଦନ କରିଛି।