ରାଉରକେଲା ସହରରେ ଗୋଠଛଡ଼ା ଦନ୍ତା ଉତ୍ପାତ। ବୃଦ୍ଧାଙ୍କୁ କଚାଡ଼ି ମାରିଲା ହାତୀ। ମଙ୍ଗଳବାର ଭୋର୍ ୩ଟା ସମୟରେ ଏକ ଗୋଠଛଡ଼ା ଦନ୍ତା ବନ୍ଧମୁଣ୍ଡା ଡ଼ୁମେର୍ତ୍ତାରୁ ବାହାରି ସେକ୍ଟର-୧ ସ୍ଥିତ କଲ୍ୟାଣୀ ବସ୍ତି ଆଡ଼କୁ ଯାଇଥିଲା। ପରେ ଦିଗ ବଦଳାଇ ସେକ୍ଟର-୧ ରାସ୍ତା ଦେଇ ଶକ୍ତିନଗର ଅଞ୍ଚଳ ହୋଇ କୋଏଲନଗର ଆଡ଼କୁ ଆସିଥିଲା। ସେଠାରେ ବୃଦ୍ଧା ଜଣଙ୍କ ହାତୀ ହାବୁଡ଼ରେ ପଡ଼ିବାରୁ ସେ କଚାଡ଼ି ମାରି ଦେଇଥିଲା। ଘଟଣାସ୍ଥଳରେ ପୁଲିସ ପହଞ୍ଚି ବୃଦ୍ଧାଙ୍କୁ ରାଉରକେଲା ଇସ୍ପାତ ଜେନେରାଲ ହସ୍ପିଟାଲ ନେବା ପରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି।
ଦନ୍ତା ହାତୀଟି ଏଭଳି ନାରକୀୟ କାଣ୍ଡ ଘଟାଇବା ପରେ ଜେନା ବସ୍ତି ଆଡ଼କୁ ଚାଲି ଯାଇଥିଲା । ବନବିଭାଗ ଖବର ପାଇବା ପରେ ପାନପୋଷ ବନଖଣ୍ଡ ରେଞ୍ଜରଙ୍କ ନେତୃତ୍ୱରେ ଏକ ୩୦ଜଣିଆ ଟିମ୍ ଘଟଣାସ୍ଥଳରେ ପହଞ୍ଚି ଦନ୍ତାର ଗତିବିଧି ଉପରେ ନଜର ରଖିଛି। ସହର ଭିତରେ ହାତୀ ବୁଲୁଥିବାରୁ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି।