ବାଂଲାଦେଶ ପରେ ଏବେ ପାକିସ୍ତାନକୁ ବଡ଼ ଝଟକା ଦେଇଛି ଆନ୍ତର୍ଜାତିକ କ୍ରିକେଟ୍ ପରିଷଦ (ICC) । ୨୦୨୬ ଟି-୨୦ ବିଶ୍ୱକପରୁ ଓହରିଯିବାକୁ ଧମକ ଦେଇଥିବା ପାକିସ୍ତାନକୁ ଆଇସିସି କଡ଼ା ଚେତାବନୀ ଶୁଣାଇଛି। ଯଦି ପାକିସ୍ତାନ ଏହି ବଡ଼ ଟୁର୍ଣ୍ଣାମେଣ୍ଟରୁ ନିଜ ନାମ ପ୍ରତ୍ୟାହାର କରେ, ତେବେ ତାହା କେବଳ ବିଶ୍ୱକପ ନୁହେଁ ବରଂ ପାକିସ୍ତାନ କ୍ରିକେଟର ଭବିଷ୍ୟତ ପାଇଁ ଅନ୍ଧକାରମୟ ହୋଇପାରେ ବୋଲି ସଙ୍କେତ ମିଳିଛି।
ସୂଚନାଯୋଗ୍ୟ ଯେ, ବାଂଲାଦେଶ କ୍ରିକେଟ ବୋର୍ଡ ଭାରତରେ ମ୍ୟାଚ୍ ଖେଳିବାକୁ ମନା କରିବା ପରେ ଆଇସିସି ସେମାନଙ୍କୁ ବିଶ୍ୱକପରୁ ବାଦ୍ ଦେଇ ସ୍କଟଲ୍ୟାଣ୍ଡକୁ ସ୍ଥାନ ଦେଇଛି। ଏହି ଘଟଣା ପରେ ପାକିସ୍ତାନ କ୍ରିକେଟ ବୋର୍ଡ (PCB) ଅଧ୍ୟକ୍ଷ ମୋହସିନ ନକଭି କ୍ଷୋଭ ପ୍ରକାଶ କରିବା ସହ ଆଇସିସିର ନୀତିକୁ ‘ଦୋମୁହାଁ’ ବୋଲି କହିଛନ୍ତି। ନକଭି ପ୍ରଶ୍ନ କରିଛନ୍ତି ଯେ, ଯଦି ପାକିସ୍ତାନ ଓ ଭାରତ ମଧ୍ୟରେ ମ୍ୟାଚ୍ ପାଇଁ ‘ହାଇବ୍ରିଡ୍ ମଡେଲ’ ଆପଣାଯାଇପାରୁଛି, ତେବେ ବାଂଲାଦେଶ କ୍ଷେତ୍ରରେ କାହିଁକି ସମାନ ବ୍ୟବସ୍ଥା କରାଗଲା ନାହିଁ? ସେ ଏହା ମଧ୍ୟ କହିଛନ୍ତି ଯେ ବିଶ୍ୱକପରେ ଅଂଶଗ୍ରହଣ କରିବା ନେଇ ଚୂଡ଼ାନ୍ତ ନିଷ୍ପତ୍ତି ପାକିସ୍ତାନ ସରକାର ନେବେ।
ତେବେ ଆଇସିସି ପକ୍ଷରୁ ସ୍ପଷ୍ଟ କରାଯାଇଛି ଯେ, ବିନା କୌଣସି ଯଥାର୍ଥ କାରଣରେ ବିଶ୍ୱକପରୁ ଓହରିଲେ ପାକିସ୍ତାନ ଉପରେ କଠୋର ପ୍ରତିବନ୍ଧକ ଲଗାଯିବ। ଏହି କାର୍ଯ୍ୟାନୁଷ୍ଠାନ ସ୍ୱରୂପ ପାକିସ୍ତାନକୁ ଆନ୍ତର୍ଜାତୀୟ କ୍ରିକେଟରୁ ବାସନ୍ଦ କରାଯିବା ସହ ଏସିଆ କପ୍ ଏବଂ ଦ୍ୱିପାକ୍ଷିକ ସିରିଜରୁ ମଧ୍ୟ ବାଦ୍ ଦିଆଯାଇପାରେ। ଏପରିକି ପାକିସ୍ତାନ ସୁପର ଲିଗ୍ (PSL) ପାଇଁ ବିଦେଶୀ ଖେଳାଳିଙ୍କୁ NOC ମିଳିବାରେ ମଧ୍ୟ ସମସ୍ୟା ଉପୁଜିପାରେ। ଏହା ଫଳରେ PCB ର ଆର୍ଥିକ ସ୍ଥିତି ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇଯିବାର ଆଶଙ୍କା ରହିଛି। ବର୍ତ୍ତମାନ ପାକିସ୍ତାନ ସରକାର ଓ PCB କି ପଦକ୍ଷେପ ନେଉଛନ୍ତି, ତାହା ଉପରେ ସାରା ବିଶ୍ୱର ନଜର ରହିଛି।