ବରଗଡ଼ ଜିଲ୍ଲାରେ ଖରିଫ୍ ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହେବାର ପ୍ରାୟ ଦୁଇ ମାସ ପୂରିବାକୁ ଥିଲେ ମଧ୍ୟ ମଣ୍ଡି ଅବ୍ୟବସ୍ଥା ଦୂର ହେବାର ନାମ ନେଉନାହିଁ। ଧାନ ବିକ୍ରି ପାଇଁ ଅନେକ ଚାଷୀ ଏପର୍ଯ୍ୟନ୍ତ ପଞ୍ଜୀକରଣରୁ ବାଦ୍ ପଡ଼ିଥିବା ବେଳେ ବହୁ ସଂଖ୍ୟକ ଚାଷୀଙ୍କୁ ଟୋକନ ମିଳିପାରି ନାହିଁ। ଏହା ସହିତ ମଣ୍ଡିରେ ଧାନ ଉଠାଣରେ ବିଳମ୍ବ ଏବଂ ଅହେତୁକ ‘କଟ୍ନୀଛଟ୍ନୀ’କୁ ନେଇ ଚାଷୀମାନେ ତାତି ଉଠିଛନ୍ତି। ଏହି ସମସ୍ୟାର ପ୍ରତିବାଦରେ ଶନିବାର ‘ଜୟ କିଷାନ ଆନ୍ଦୋଳନ’ ପକ୍ଷରୁ ଅତାବିରା ମଣ୍ଡି ସମ୍ମୁଖ ୫୩ ନମ୍ବର ଜାତୀୟ ରାଜପଥକୁ ଅବରୋଧ କରାଯାଇଥିଲା।
ଶନିବାର ପୂର୍ବାହ୍ନରେ ଅତାବିରା ମଣ୍ଡି ପରିସରରେ ଆୟୋଜିତ ଏକ ବୈଠକରେ ଚାଷୀ ନେତାମାନେ ସରକାରଙ୍କ ନୀତିକୁ କଡ଼ା ସମାଲୋଚନା କରିଥିଲେ। ପଶ୍ଚିମ ଓଡ଼ିଶା କୃଷକ ସଙ୍ଗଠନ ସମନ୍ବୟ ସମିତିର ଆବାହକ ଲିଙ୍ଗରାଜ କହିଛନ୍ତି ଯେ, ମିଲର୍ସମାନଙ୍କ ମନମୁଖୀ କାର୍ଯ୍ୟ ଏବଂ ସରକାରଙ୍କ ଉଦାସୀନତା ଯୋଗୁଁ ଚାଷୀ ଏବେ ନିଜ ଅମଳ ଧାନ ବିକ୍ରି କରିବା ନେଇ ସନ୍ଦେହରେ ରହିଛି। ମିଲର୍ସମାନେ ସରକାରଙ୍କୁ ୧୫ ଦିନର ମହଲତ ଦେଇଥିବାରୁ ଆଗକୁ ଧାନ ସଂଗ୍ରହ ସମ୍ପୂର୍ଣ୍ଣ ବନ୍ଦ ହେବାର ଆଶଙ୍କା ଦେଖାଦେଇଛି। ଏହି ପରିସ୍ଥିତିରେ ଚାଷୀଙ୍କୁ ନ୍ୟାୟ ନମିଳିଲେ ୨୦୦୧ ମସିହା ଭଳି ଏକ ବଡ଼ ଧରଣର ଆନ୍ଦୋଳନ କରାଯିବ ବୋଲି ସେ ଆହ୍ୱାନ ଦେଇଛନ୍ତି।
ରାଜପଥ ଅବରୋଧ ସମୟରେ ପୋଲିସ ପ୍ରାୟ ୬୦ ଜଣ ଚାଷୀଙ୍କୁ ଉଠାଇ ନେଇ ଥାନାରେ ଅଟକ ରଖିଥିଲା ଏବଂ ସନ୍ଧ୍ୟାରେ ସେମାନଙ୍କୁ ଛାଡ଼ିଥିଲା। ଆସନ୍ତା ୭ ଦିନ ମଧ୍ୟରେ ଯଦି ସମସ୍ତ ଚାଷୀଙ୍କୁ ଟୋକନ ପ୍ରଦାନ ଏବଂ ଧାନ କିଣା ପ୍ରକ୍ରିୟା ତ୍ୱରାନ୍ୱିତ କରାନଯାଏ, ତେବେ ଆନ୍ଦୋଳନ ଆଗକୁ ଆହୁରି ତୀବ୍ର ରୂପ ଧାରଣ କରିବ ବୋଲି ଚାଷୀ ସଙ୍ଗଠନ ପକ୍ଷରୁ ଚେତାବନୀ ଦିଆଯାଇଛି।