ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ଅଞ୍ଚଳରେ ଜଣେ ପାଦ୍ରୀଙ୍କୁ ଧର୍ମାନ୍ତିକରଣ କରାଉଥିବା ଅଭିଯୋଗରେ ଅମାନୁଷିକ ଅତ୍ୟାଚାର ହୋଇଥିବା ଅଭିଯୋଗ ହୋଇଛି। ଏ ନେଇ ପରଜଙ୍ଗ ଥାନାରେ ଲିଖିତ ଅଭିଯୋଗ କରଛନ୍ତି ପାଦ୍ରୀଙ୍କ ସ୍ତ୍ରୀ ବନ୍ଦନା ନାଏକ। ତାଙ୍କ ସ୍ୱାମୀଙ୍କୁ ଗାଁ ଦାଣ୍ଡରେ ଚପଲ ମାଳ ପିନ୍ଧାଇ ମାଡ଼ ମରାଯାଇଥିବା ସେ ଅଭିଯୋଗ କରିଛନ୍ତି। ସେପଟେ ଗାଁ ଗାଁ ବୁଲି ଲୋଭ ଦେଖାଇ ଧର୍ମାନ୍ତିକରଣ କରାଯାଉଥିବା ଅଭିଯୋଗ ହୋଇଛି। ଥାନାରେ ଅଭିଯୋଗ ପରେ ପୋଲିସ୍ ଏହି ଘଟଣାର ଅଧିକ ଛାନଭିନ କରି ଚାରି ଜଣଙ୍କୁ ଅଟକ ରଖିଛି। ଅଭିଯୋଗ ମୁତାବକ ବିପିନ ନାଏକ ପରଜଙ୍ଗ ଅଞ୍ଚଳରେ ଜଣଙ୍କହିନ୍ଦୁ ଘରକୁ ଯାଇ ତାଙ୍କ ପରିବାରର ସ୍ୱାସ୍ଥ୍ୟ ଭଲ ରହିବା କହି ପ୍ରାର୍ଥନା କରାଉଥିଲେ। ଏହି ସମୟରେ ପରଜଙ୍ଗ ଅଞ୍ଚଳର କିଛି ଯୁବକ ଖବର ପାଇ ତାଙ୍କ ଘରେ ପଶି ଧର୍ମାନ୍ତିକରଣ କରାଉଥିବା ନେଇ ପାଦ୍ରିଙ୍କୁ ଅତର୍କିତ ଆକ୍ରମଣ କରିଥିଲେ। ଯାହା ବିପିନଙ୍କ ସ୍ତ୍ରୀ ବନ୍ଦନା ନିଜ ଅଭିଯୋଗ ପତ୍ରରେ ଦର୍ଶାଇଛନ୍ତି। ଏପରିକି ପାଦ୍ରୀ ବିପିନଙ୍କୁ ଚପଲ ପିନ୍ଧାଇ ଗାଁରେ ବୁଲାଉଥିବାର କିଛି ଫଟୋ ମଧ୍ୟ ଭାଇରଲ ହୋଇଛି। ମାତ୍ର ଧର୍ମାନ୍ତୀକରଣକୁ ନେଇ ପ୍ରତିକ୍ରିୟା ରଖିଛନ୍ତି ସ୍ଥାନୀୟ ବାସିନ୍ଦା। ସେମାନଙ୍କୁ ଲୋଭ ଦେଖାଇ ବଶବତୀ କରାଯାଉଥିବା ଅଭିଯୋଗ ହୋଇଛି। ଯାହାକୁ ନେଇ ସମଗ୍ର ଢେଙ୍କାନାଳ ଜିଲ୍ଲାରେ ଏବେ ଚର୍ଚ୍ଚା ଜୋର ଧରିଛି। ଏ ନେଇ ତୁରନ୍ତ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଢେଙ୍କାନାଳ ଏସପି ଅଭିନବ ସୋନକର ପ୍ରତିକ୍ରିୟା ରଖିଛନ୍ତି।