ଦ୍ବିତୀୟ ଟି୨୦ରେ ଭାରତକୁ ୪ ୱିକେଟରେ ହରାଇଲା ଅଷ୍ଟ୍ରେଲିଆ । ଆଜି ଖେଳା ଯାଇଥିବା ଏହି ମ୍ୟାଚରେ ପ୍ରଥମେ ବ୍ୟାଟିଂ କରି ବିପର୍ଯ୍ୟୟର ସାମନା କରିଥିବା ଭାରତୀୟ ଦଳ ମାତ୍ର ୧୨୫ ରନ୍ କରି ପାରିଥିଲା । ଜବାବରେ ଘରୋଇ ଅଷ୍ଟ୍ରେଲିଆ ଦଳ ୬ ୱିକେଟ୍ ହରାଇ ବିଜୟଲକ୍ଷ୍ୟ ହାସଲ କରି ନେଇଥିଲା ।
ଅଷ୍ଟ୍ରେଲିଆ ଦଳ ପକ୍ଷରୁ ଅଧିନାୟକ ତଥା ଓପ୍ନର ମିଚେଲ ମାର୍ଶ ଭାରତୀୟ ବୋଲରଙ୍କୁ ଖୁବ୍ ଧୁଲେଇ କରି ୨୬ ବଲରେ ୪୬ ରନ୍ କରିଥିଲେ । ଟ୍ରାଭିସ ହେଡ୍ ୧୫ ବଲରେ ୨୮, ଯୋଶ୍ ଇଂଲିଶ୍ ୨୦ ରନ୍ ସ୍କୋର କରିଥିଲେ । ୧୩.୨ ଓଭରରେ ଅଷ୍ଟେଲିଆ ଖେଳ ସାରି ଦେଇଥିଲା । ଭାରତ ପକ୍ଷରୁ ବୁମରା, ବରୁଣ, କୁଲଦୀପ ୨ଟି ଲେଖାଏଁ ୱିକେଟ୍ ନେଇଥିଲେ ।
ପୂର୍ବରୁ ଭାରତୀୟ ଦଳ ମାତ୍ର ୪୯ ରନରେ ୫ ୱିକେଟ୍ ହରାଇ ବିପଦରେ ପଡ଼ିଥିଲା । ତେବେ ଓପ୍ନର ଅଭିଷେକ ଶର୍ମା ୩୭ ବଲରେ ବିସ୍ଫୋରକ ୬୮ ରନ୍ କରିଥିବା ବେଳେ ହର୍ଷିତ ରାଣା ୩୫ ରନ୍ କରିବା ଫଳରେ ଦଳ ୧୨୫ ରନରେ ପହଞ୍ଚି ପାରିଥିଲା । ତେବେ ଭାରତୀୟ ଦଳ ପୂରା ୨୦ ଓଭର ଖେଳି ନପାରି ୧୮.୪ ଓଭରରେ ଅଲଆଉଟ୍ ହୋଇ ଯାଇଥିଲା । ଶୁବମନ ଗିଲ୍ ୫ ଓ ଅଧିନାୟକ ସୂର୍ଯ୍ୟ କୁମାର ଯାଦବ ମାତ୍ର ୧ ରନ୍ କରି ପାରିଥିଲେ ।
ଏହି ବିଜୟ ସହ ସିରିଜରେ ଅଷ୍ଟ୍ରେଲିଆ ୧-୦ରେ ଆଗୁଆ ରହିଛି । ପୂର୍ବରୁ ପ୍ରଥମ ମ୍ୟାଚ୍ ବର୍ଷା ଯୋଗୁଁ ବାତିଲ ହୋଇ ଯାଇଥିଲା । ତୃତୀୟ ମ୍ୟାଚ୍ ନଭେମ୍ବର ୨ ତାରିଖ ଦିନ ହୋବାର୍ଟ ଠାରେ ଖେଳା ଯିବ ।