ସ୍ୱାମୀ ଆରପାରିକୁ ଚାଲି ଯାଇଥିଲା । ଶ୍ୱଶୁର ଘର ଲୋକଙ୍କ ସହ ମନୋମାଳିନ୍ୟ ହେବାରୁ ପୁଅ ସହ ବାପଘରେ ରହୁଥିଲେ । ଆଜି ଜଙ୍ଗଲରୁ ମିଳିଲା ମହିଳାଙ୍କ ମୃତଦେହ । ଦେବଗଡ଼ ଜିଲ୍ଲା ଲୋଇମୁରା ଥାନା ଅନ୍ତର୍ଗତ ବଜାର ସାହି ଘର ନିକଟସ୍ଥ ଜଙ୍ଗଲରୁ ଜଣେ ମହିଳାଙ୍କର ମୃତଦେହ ଉଦ୍ଧାର ହୋଇଛି । ମହିଳା ଜଣଙ୍କ ହେଉଛନ୍ତି ୩୨ ବର୍ଷୀୟ ପ୍ରତିମା ମାଝୀ । ତାଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି ।
ଲଇମୁରା ଗାଁ ବଜାର ସାହିର କେଶନ ମାଝିଙ୍କ ଝିଅ ପ୍ରତିମା ମାଝୀ । ପ୍ରତିମାଙ୍କ ସ୍ୱାମୀଙ୍କର ମୃତ୍ୟୁ ପରେ ଶ୍ୱଶୁର ଘର ଲୋକଙ୍କ ସହ ମନୋମାଳିନ୍ୟ ହେବାରୁ ସେ ତାଙ୍କ ପୁଅକୁ ଧରି ବାପଘରକୁ ଚାଲି ଆସିଥିଲେ । ପ୍ରତିମା ନିକଟସ୍ଥ ଡୁରୀଜଙ୍ଗଲ ଗ୍ରାମରେ ବିବାହ କରିଥିଲେ । ପ୍ରାୟ ୫ ବର୍ଷ ହେଲା ଆସି ବାପା ଘରେ ରହୁଥିଲେ ପ୍ରତିମା । ଶନିବାର ପ୍ରତିମାଙ୍କ ମୃତଦେହ ତାଙ୍କ ଘର ପାଖ ଜଙ୍ଗଲରେ ପଡିଥିବାର ଦେଖି ଲୋକେ ପୁଲିସକୁ ସୂଚନା ଦେଇଥିଲେ ।
ପ୍ରତିମାଙ୍କ ମୋବାଇଲ ଫୋନ ତାଙ୍କ ପାଖରେ ନଥିବା ବେଳେ ସିମ୍ କାର୍ଡଟି ମୃତଦେହ ନିକଟରୁ ମିଳିଥିଲା । କେହି ତାଙ୍କୁ ଶ୍ବାସରୁଦ୍ଧ କରି ହତ୍ୟା କରିଥିବା ସନ୍ଦେହ କରାଯାଉଛି । ପରିବାର ପକ୍ଷରୁ ତାଙ୍କୁ ହତ୍ୟା କରାଯାଇଥିବା ନେଇ ଅଭିଯୋଗ ହୋଇଛି । ପୁଲିସ ମୃତଦେହ ଉଦ୍ଧାର କରିଥିବା ବେଳେ ଏନେଇ ଅଧିକ ତଦନ୍ତ ଜାରି ରଖିଛି । ପୁଲିସ୍ ସାଇଣ୍ଟିଫିକ ଟିମ୍ ସହ ଘଟଣାସ୍ଥଳରେ ପହଂଚି ଅଧିକ ତଦନ୍ତ କରିଛି । ମୃତଦେବ ବ୍ୟବଚ୍ଛେଦ ପାଇଁ ମୃତଦେହକୁ ଦେବଗଡ଼ ଅଣାଯାଇଛି ।