କେନ୍ଦ୍ରାପଡ଼ା ଜିଲ୍ଲା ରାଜକନିକା ବ୍ଲକ ଅନ୍ତର୍ଗତ ନମତରା ବୀଣାପାଣି ଉଚ୍ଚ ପ୍ରାଥମିକ ବିଦ୍ୟାଳୟରେ ଅଘଟଣ ଘଟିଛି । ଜଣେ ଛାତ୍ରୀ ଗରମ ପାଣିରେ ପଡି ଆହତ ହୋଇଛନ୍ତି । ମିଳିଥିବା ତଥ୍ୟ ଅନୁସାରେ, ଛାତ୍ରୀ ଜଣକ ମଧ୍ୟାହ୍ନ ଭୋଜନ ଖାଇବା ପରେ ସ୍କୁଲ ପରିସରରେ ଥିବା ନଳକୂପ ପାଖକୁ ହାତ ଧୋଇବାକୁ ଯାଇଥିଲେ । ଏହି ସମୟରେ ଅଘଟଣଟି ଘଟିଛି । ଛାତ୍ରୀଙ୍କ ଅବସ୍ଥା ଭଲ ଥିବା ଖବର ମିଳିଛି ।
ନଳକୂଅ ପାଖରେ ଜନୈକ ବ୍ୟକ୍ତି ଗରମ ପାଣି ରଖିଥିଲେ । ଛାତ୍ରୀ ଜଣଙ୍କ ଅସାବଧାନତା ବସତଃ ଝୁଣ୍ଟି ପଡି ସେଇ ପାଣି ବାଲଟି ଉପରେ ପଡିଯିବାରୁ ଏଭଳି ଅଘଟଣ ଘଟିଛି । ଛାତ୍ରୀଙ୍କୁ ସଙ୍ଗେ ସଙ୍ଗେ ସ୍ଥାନୀୟ ମେଡିକାଲକୁ ନିଆଯାଇ ଚିକିତ୍ସା କରାଯାଇଛି । ଘଟଣାକୁ ନେଇ ସକାଳେ ପିଲାଙ୍କ ଅଭିଭାବକ, ଗ୍ରାମବାସୀ ସ୍କୁଲରେ ପହଞ୍ଚି ପ୍ରଧାନ ଶିକ୍ଷକଙ୍କ ସହିତ ଆଲୋଚନା କରିଥିବା ଜଣାପଡିଛି । ଏହାକୁ ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି । ନଳକୂପ ପାଖକୁ ପିଲାମାନେ ଯିବା ଆସିବା କରୁଥିବାବେଳେ କିପରି ଏମିତି ଖାମଖିଆଲି ଭାବେ ଗରମ ପାଣି ରଖାଯାଇଥିଲା ତାକୁ ନେଇ ପ୍ରଶ୍ନ ଉଠିଛି ।