କାହାର ଏ ଖପୁରୀ ? ବସ୍ତା ଭିତରେ ଖପୁରୀ ପୁରାଇ କିଏ ଫୋପାଡ଼ିଥିଲା କେନାଲ ଭିତରେ । ଗଗୁଆ ନିକଟ କେନାଲରୁ ଦୁଇଟି ମଣିଷ ଖପୁରୀ ଉଦ୍ଧାର ପରେ ଚାରିଆଡ଼େ ଖେଳିଯାଇଛି ଚାଞ୍ଚଲ୍ୟ । ଘଟଣା ସ୍ଥଳରେ ପଟ୍ଟାମୁଣ୍ଡାଇ ପୋଲିସ ପହଞ୍ଚି ଖପୁରୀକୁ ଜବତ କରିଛି । ଖପୁରୀ ନିକଟରେ କଳସ ସିନ୍ଦୁର ପଡ଼ିଥିବା ହେତୁ ଗୁଣି ଗାରେଡି ସନ୍ଦେହ କରାଯାଉଛି । ଗୁଣି ଗାରେଡି ପାଇଁ ଖପୁରୀ ବ୍ୟବହାର କରାଯାଇଛି ବୋଲି ଅନୁମାନ କରାଯାଉଥିବା ବେଳେ ଦୁଇଟି ଖପୁରୀକୁ ପୋଲିସ ଉଦ୍ଧାର କରି ଅଧିକ ତଦନ୍ତ ଚଳାଇଛି ।
ସୂଚନା ମୁତାବକ ୨୪ ତାରିଖ ଅପରାହ୍ନ ୪ ଘଟିକା ସମୟରେ କେନ୍ଦ୍ରାପଡ଼ା ବ୍ଲକ ଓ ଚୌଦକୁଲାଟ ଫାଣ୍ଡି ଅଧୀନରେ ଥିବା ଗଗୁଆ ଛକ ନିକଟ ଦେଇ ବହି ଯାଇଥିବା ଦୋବନ୍ଦା ପାଟଣାଳୀ କେନାଲରେ କିଛି ଯୁବକ ପାଣି ଭିତରେ ମାଛଧରୁଥିବା ବେଳେ ଗୋଟିଏ ଅଖା ପାଇଥିଲେ । ଆଉ ସେହି ଅଖାକୁ ଯେତେବେକେ ସେମାନେ ଉପରକୁ ଆଣନ୍ତି ସେଥିରୁ ବାହାରିଥିଲା ଦୁଇଗୋଟି ମଣିଷ ମୁଣ୍ଡର ଖପୁରି । ତେବେ ସାଙ୍ଗେ ସାଙ୍ଗେ ପିଲାମାନେ ଘଟଣା ସମ୍ପର୍କରେ ଗାଗୁଆ ଛକରେ ପ୍ରକାଶ କରିବା ପରେ ଘଟଣା ସମ୍ପର୍କରେ ପୋଲିସକୁ ସ୍ଥାନୀୟ ଲୋକେ ଖବର ଦେଇଥିଲେ । ପରେ ଘଟଣାସ୍ଥଳରେ ରୁଣ୍ଡ ହୋଇଥିଲେ ଶହ ଶହ ଲୋକେ ।
ଅନ୍ୟପକ୍ଷରେ ଏପରି ଘଟଣା ଅଞ୍ଚଳରେ ପ୍ରଥମ ଦେଖିବାକୁ ମିଳିଥିବାରୁ ଅଞ୍ଚଳରେ ଭୟର ବାତାବରଣ ଖେଳିଯାଇଛି । ମଣିଷ ମୁଣ୍ଡର ଖପୁରୀ କୋଉଠୁ ଆସିଲା ତାହା ତଦନ୍ତ କଲେ ସବୁ ସତ ସାମ୍ନାକୁ ଆସିବ ।