ଅନୁଗୋଳ ଜିଲ୍ଲା କିଆକଟା ଥାନା ଅନ୍ତର୍ଗତ ରେଢ଼ାଖୋଲ-ବୌଦ୍ଧ ରାସ୍ତାର ପନ୍ଥେଇ ନିକଟରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏକ ଗୋରୁ ବୋଝେଇ କଣ୍ଟେନର ଭାରସାମ୍ୟ ହରାଇ ରାସ୍ତା କଡ଼ ବୁଲାଣିରେ ଓଲଟି ପଡ଼ିଛି। ଏହି ଦୁର୍ଘଟଣାରେ ଗାଡ଼ି ଭିତରେ ଡ୍ରାଇଭର ଜଣକ ଗୁରୁତର ଭାବେ ଚାପି ହୋଇ ରହିଥିବା ବେଳେ ଅନେକ ଗୋରୁଙ୍କର ପ୍ରାଣହାନି ଘଟିଛି।
ଦୁର୍ଘଟଣା ସମ୍ପର୍କରେ ଖବର ପାଇ କିଆକଟା ଥାନା ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଛି। ଗାଡ଼ିର କ୍ୟାବିନ୍ ଭିତରେ ଡ୍ରାଇଭର ଜଣକ ଫସି ରହିଥିବାରୁ ତାଙ୍କୁ ବାହାର କରିବା ପାଇଁ ପୋଲିସ ଗ୍ୟାସ୍ କଟରର ସାହାଯ୍ୟ ନେଉଛି। ଡ୍ରାଇଭରଙ୍କୁ ଜୀବନ୍ତ ଉଦ୍ଧାର କରିବା ପାଇଁ ପୋଲିସ ଓ ସ୍ଥାନୀୟ ଲୋକେ ପ୍ରାଣପଣେ ଚେଷ୍ଟା କରୁଛନ୍ତି।
ସୂଚନା ଅନୁଯାୟୀ, କଣ୍ଟେନରଟି ବୌଦ୍ଧ ପଟୁ ୫୦ରୁ ଅଧିକ ଗୋରୁ ବୋଝେଇ କରି ରାଜ୍ୟ ବାହାରକୁ ଯାଉଥିଲା। ଗାଡ଼ିଟି ଓଲଟି ପଡ଼ିବା ଫଳରେ ଗାଡ଼ି ଭିତରେ ଥିବା ଏକାଧିକ ଗୋରୁଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ କେତେକ ଗୋରୁ ଗୁରୁତର ଆହତ ହୋଇଛନ୍ତି। ପୋଲିସ ଦୁର୍ଘଟଣାଗ୍ରସ୍ତ ଗାଡ଼ିକୁ ଜବତ କରିବା ସହ ଏହା ବେଆଇନ ଗୋରୁ ଚାଲାଣ କି ନୁହେଁ, ସେ ଦିଗରେ ତଦନ୍ତ ଆରମ୍ଭ କରିଛି।