୨୦୧୧ରୁ ଅନ୍ଲାଇନ୍ରେ ଚାଲି ଆସୁଥିବା ଜନ୍ମ ମୃତ୍ୟୁ ପଞ୍ଜୀକରଣ ବ୍ୟବସ୍ଥା ତଥା ଓଡ଼ିଶା ବାର୍ଥ ଡେଥ୍ ରେଜିଷ୍ଟ୍ରେସନ ସିଷ୍ଟମରେ ଗତମାସରୁ ପରିବର୍ତ୍ତନ ହୋଇଛି । ଓଡ଼ିଶା ବାର୍ଥ ଡେଥ୍ ରେଜିଷ୍ଟ୍ରେସନ ସିଷ୍ଟମ-୨ କାର୍ଯ୍ୟକାରୀ ହେଲା ଦିନଠାରୁ ବିଭ୍ରାଟ ଲାଗି ରହିଛି । ଏହି ନୂତନ ବ୍ୟବସ୍ଥା ବ୍ୟବହାରରେ ସରଳୀକରଣ ହେବା ବଦଳରେ ଅଧିକ ଜଟିଳ ହୋଇଛି । ଫଳରେ ନୂଆ ବ୍ୟବସ୍ଥାରେ ଆବେଦନକାରୀମାନେ ଜନ୍ମ ଓ ମୃତ୍ୟୁ ପ୍ରମାଣପତ୍ର ପାଇବା ପାଇଁ ଅନ୍ଲାଇନ୍ର ଆବେଦନ କରୁଥିଲେ ହେଁ ତାହା ଅଡ଼ୁଆ ସୃଷ୍ଟି କରୁଛି । ବ୍ୟବହାର ସରଳୀକରଣ ଥିବାରୁ ପୂର୍ବରୁ ଲୋକେ ଘରେ ବସି ନିଜ ମୋବାଇଲ୍ରେ ଜନ୍ମ ମୃତ୍ୟୁ ପଞ୍ଜୀକରଣ ପାଇଁ ସହଜରେ ଆବେଦନ କରିପାରୁଥିଲେ । ମାତ୍ର ଏବେ ଆଉ ତାହା ହେଉନାହିଁ ।
କଟକ ମହାନଗର ନିଗମ ଓ କଟକ ଜିଲ୍ଲାର ସମସ୍ତ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ସମେତ ରାଜ୍ୟବ୍ୟାପୀ ଗାଁଠୁ ସହରାଞ୍ଚଳ ଲୋକଙ୍କ ପାଇଁ ଏହି ସମସ୍ୟା ଲାଗି ରହିଛି । ବିଡ଼ମ୍ବନା ହେଉଛି, ଏହି ନୂଆ ବ୍ୟବସ୍ଥାକୁ କାର୍ଯ୍ୟକାରୀ କରିବା ଆଗରୁ ଜନ୍ମ ମୃତ୍ୟୁ ପଞ୍ଜୀକରଣ ସାର୍ଟିଫିକେଟ୍ ପ୍ରଦାନ ଦାୟିତ୍ୱରେ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଓ ପୌରାଞ୍ଚଳରେ ନିୟୋଜିତ ପଞ୍ଜୀକରଣ ଅଧିକାରୀ ଓ ଜନ୍ମ ମୃତ୍ୟୁ ସହାୟକମାନଙ୍କୁ ଆବଶ୍ୟକ ତାଲିମ୍ ପ୍ରଦାନ କରାଯାଇନଥିବା ସୂଚନା ମିଳିଛି । ଫଳରେ ଏହି ନୂତନ ବ୍ୟବସ୍ଥାରେ ପଞ୍ଜୀକରଣ କରିବାରେ କର୍ମଚାରୀଙ୍କର ମଧ୍ୟ ବହୁ ସମୟ ଅପଚୟ ହେଉଛି । ପୂର୍ବରୁ ଏହି ଅନ୍ଲାଇନ୍ ପଞ୍ଜୀକରଣ ବ୍ୟବସ୍ଥା ଗୋଟିଏ ପୃଷ୍ଠା (ପେଜ୍)ରେ ସୀମିତ ଥିଲା । ଜନ୍ମ ହେଉ କିମ୍ବା ମୃତ୍ୟୁ ପଞ୍ଜୀକରଣ ପାଇଁ ତଥ୍ୟ ପ୍ରଦାନ ଲାଗି ଗୋଟିଏ ପୃଷ୍ଠାରେ ୨୧ ଟି ସାରଣୀ (କଲମ) ଥିଲା । ଏବେ ତଥ୍ୟ ପ୍ରଦାନ ଲାଗି କଲମ ସଂଖ୍ୟା ୫ ଗୁଣା ବଢ଼ିଯାଇଛି । ଗୋଟିଏ ପେଜ୍ ପରିବର୍ତ୍ତେ ୪ ପେଜ୍ ରହିଛି । ପ୍ରଥମ ପେଜ୍ରେ ୩୪ଟି କଲମ୍ ରହିଥିବା ବେଳେ ଦ୍ୱିତୀୟ ପେଜ୍ରେ ୩୯ ଟି କଲମ୍, ତୃତୀୟ ପେଜ୍ରେ ୩୩ ଟି କଲମ୍ ଏବଂ ୪ର୍ଥ ପେଜ୍ରେ ସେଭ୍ ମାରି ସବମିଟ୍ କରିବାକୁ ପଡ଼ୁଛି । କେତେକ କଲମରେ ରିପିଟ୍ ତଥ୍ୟ ମଗାଯାଇଛି । ଏସବୁ ବାଦ୍ ପୂର୍ବ ଅପେକ୍ଷା ଏବେ ସାର୍ଟିଫିକେଟ୍ ଆକାର ମଧ୍ୟ ଛୋଟ କରାଯାଇଛି ।
ପୂର୍ବରୁ ଏ-୪ ସାଇଜ୍ ସାର୍ଟିଫିକେଟ୍ ମିଳୁଥିବା ବେଳେ ଏବେ ଉକ୍ତ ଆକାର ଛୋଟ ହୋଇଛି । ସେହିପରି ଅକ୍ଷର ଆକାର(ଲେଟର ସାଇଜ୍) ୧୨ ମିଲିମିଟର (ଏମ୍ଏମ୍) ଥିବା ବେଳେ ଏବେ ତାହା ୧୦ ଏମ୍ଏମ୍ ରହିଛି । ସୂଚନାଯୋଗ୍ୟ, ୨୦୧୧ରୁ କାର୍ଯ୍ୟକାରୀ ହୋଇଆସୁଥିବା ଅନ୍ଲାଇନ୍ ଜନ୍ମମୃତ୍ୟୁ ପଞ୍ଜୀକରଣ ବ୍ୟବସ୍ଥା-୧ ଗତ ମାସ ୧୦ ତାରିଖରେ ଜନ୍ମମୃତ୍ୟୁ ପରିସଂଖ୍ୟାନ ବିଭାଗ ବନ୍ଦ କରିଦେଇଥିଲା । ନୂଆ ପଞ୍ଜୀକରଣ ବ୍ୟବସ୍ଥା-୨ ସେହିଦିନଠାରୁ ରାଜ୍ୟରେ ଏକ ସମୟରେ ୨୯ଟି ଜିଲ୍ଲାରେ ଆରମ୍ଭ ହୋଇଥିଲା । ଏହି ନୂତନ ପଞ୍ଜୀକରଣ ବ୍ୟବସ୍ଥା ପରୀକ୍ଷାମୂଳକ ଭାବେ କେବଳ ପୁରୀ ଜିଲ୍ଲାରୁ ୮ ମାସ ତଳେ ଆରମ୍ଭ ହୋଇଥିଲା । ପୁରୀ ଜିଲ୍ଲାରେ ଏହି ବ୍ୟବସ୍ଥା ଆରମ୍ଭରୁ ବାଟବଣା ହୋଇଥିଲେ ମଧ୍ୟ ଏଥିରେ ଜନ୍ମମୃତ୍ୟୁ ପରିସଂଖ୍ୟାନ ବିଭାଗ ଚେତି ନଥିଲା । ଅନ୍ୟପକ୍ଷରେ ନଭେମ୍ବରରୁ ନୂଆ ବ୍ୟବସ୍ଥା ଲାଗୁ କରିଥିଲେ ହେଁ ଏହା ପୂର୍ବରୁ ଏହି କାର୍ଯ୍ୟ କରୁଥିବା ସହାୟକମାନଙ୍କୁ ଆବଶ୍ୟକ ତାଲିମ ପ୍ରଦାନ କରାଯାଇନାହିଁ । ବ୍ୟବସ୍ଥାରେ ବିଭ୍ରାଟ ହେବାରୁ କଟକ ଜିଲ୍ଲାରେ ଗତ ଶୁକ୍ରବାର ଦିନ ଜନ୍ମମୃତ୍ୟୁ ସହାୟକମାନଙ୍କୁ ଟ୍ରେନିଂ ଦେବାକୁ ବାଧ୍ୟ ହୋଇଥିଲେ । ଏବେ ବି ୨୮ ଜିଲ୍ଲାରେ ତାଲିମ କାର୍ଯ୍ୟକ୍ରମ ଆରମ୍ଭ ହୋଇପାରିନାହିଁ । ଅନ୍ୟପକ୍ଷରେ ଦାୟିତ୍ୱରେ ଥିବା ଆଇଟି ସଂସ୍ଥାର କର୍ମଚାରୀମାନେ ଜନ୍ମ ମୃତ୍ୟୁ ସହାୟକମାନଙ୍କୁ ସହଯୋଗ କରିବା ତ ଦୂରର କଥା ଧରାଛୁଆଁ ଦେଉନଥିବା ଅଭିଯୋଗ ହେଉଛି । ସମ୍ପୃକ୍ତ କନସଲଟାନ୍ସି ସଂସ୍ଥାର ମନମାନି ବଢୁଥିଲେ ହେଁ ଏ ଦିଗରେ ଜନ୍ମ ମୃତ୍ୟୁ ପରିସଂଖ୍ୟାନ ବିଭାଗ ପକ୍ଷରୁ ପଦକ୍ଷେପ ଶୂନ । ତେବେ ଏ ସମ୍ପର୍କରେ ଜନ୍ମମୃତ୍ୟୁ ପରିସଂଖ୍ୟାନ ଅଧିକାରୀ ଡାକ୍ତର ପ୍ରଦୀପ ଗୁରୁଙ୍କ ପ୍ରତିକ୍ରିୟା ନେବାକୁ ଯୋଗାଯୋଗ କରାଯାଇଥିଲେ ହେଁ ତାହା ସମ୍ଭବ ହୋଇପାରିନଥିଲା ।