ମାଲକାନଗିରି ଜିଲ୍ଲା ଏମଭି-୨୬ ଗ୍ରାମରେ ଶାନ୍ତି ଫେରାଇବା ପାଇଁ ଜିଲ୍ଲା ପୁଲିସ ପକ୍ଷରୁ ବ୍ୟାପକ ପଦକ୍ଷେପ। ରଖେଲଗୁଡା ଗ୍ରାମର ମହିଳାଙ୍କ ମୃତ୍ୟୁକୁ ନେଇ ଦୁଇ ଗାଁ ଭିତରେ ଅଶାନ୍ତି ଉପୁଜିଥିଲା। ଏହି ଘଟଣାର ତଦନ୍ତ କରି ଏଥିରେ ସମ୍ପୃକ୍ତ ଅଭିଯୁକ୍ତ ସୁକରଞ୍ଜନ ମଣ୍ଡଳଙ୍କୁ ୩ ଦିନ ପୂର୍ବେ ପୁଲିସ ସମସ୍ତ ଆଇନଗତ ପ୍ରକ୍ରିୟା ପାଳନ କରିବା ପରେ ତୁରନ୍ତ ଗିରଫ କରି କୋର୍ଟ ଚାଲାଣ କରିଛି। ଅପରାଧରେ ବ୍ୟବହୃତ ଅସ୍ତ୍ରକୁ ପୁଲିସ ଜବତ କରିଛି। ମୃତ ଶରୀରର ମୁଣ୍ଡ ପୁଲିସ ଉପସ୍ଥିତିରେ ଜବତ କରି ସମ୍ମାନ ସହିତ ସଠିକ୍ ଭାବରେ ସତ୍କାର କରାଯାଇଛି। ଲୋକଙ୍କ ମଧ୍ୟରେ ବିଶ୍ୱାସ ସୃଷ୍ଟି କରିବା ପାଇଁ ବିଏସଏଫ, ସିଆରପିଏଫ, ସିଏପିଏଫ ସହ ପୁଲିସ ଫୋର୍ସ ବ୍ୟାପକ ଭାବେ ମୁତୟନ କରାଯାଇଛି ଏବଂ ଫ୍ଲାଗ ମାର୍ଚ୍ଚ କରାଯାଉଛି। ଏହା ସହ ପୁଲିସ ଷ୍ଟେସନ ସ୍ତରରେ ଶାନ୍ତି ବୈଠକ କରାଯାଉଛି।
ଶାନ୍ତି ପାଇଁ ଜିଲ୍ଲା ପୁଲିସ ପକ୍ଷରୁ ଜନସାଧାରଣଙ୍କୁ ଅପିଲ କରାଯାଇଛି। ଏହି ମାମଲାରେ କଠୋର ଏବଂ ପ୍ରଭାବଶାଳୀ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ବୋଲି ମାଲକାନଗିରି ପୁଲିସ ଜନସାଧାରଣଙ୍କୁ ଆଶ୍ୱାସନା ଦେଇଛି। ନ୍ୟାୟ ପ୍ରଦାନ କରିବା ପାଇଁ ତଦନ୍ତ ଗୁରୁତର ସହିତ ଚାଲିଛି। ଅଞ୍ଚଳରେ ଶାନ୍ତି, ଆଇନ ଏବଂ ଶୃଙ୍ଖଳା ବଜାୟ ରଖନ୍ତୁ। ସାମାଜିକ ଗଣମାଧ୍ୟମରେ କିମ୍ବା କୌଣସି ଗୁଜବ ଓ ଅପ୍ରମାଣିତ ସୂଚନା ଉପରେ ବିଶ୍ୱାସ ନକରିବା ଓ ପ୍ରସାର ନକରିବାକୁ ନିବେଦନ କରାଯାଇଛି। କୌଣସି ସ୍ପଷ୍ଟୀକରଣ ପାଇଁ କିମ୍ବା ସନ୍ଦେହଜନକ କାର୍ଯ୍ୟକଳାପ ରିପୋର୍ଟ କରିବାକୁ, ସ୍ଥାନୀୟ ପୁଲିସ ଷ୍ଟେସନ ସହିତ ସିଧାସଳଖ ଯୋଗାଯୋଗ କରିବାକୁ କୁହାଯାଇଛି। ଜରୁରୀକାଳୀନ ହେଲ୍ପଲାଇନ୍ ୧୧୨କୁ ଡାଏଲ୍ କରିବାକୁ ଏସପି ବିନୋଦ ପାଟିଲ ଏଚ ଗଣମାଧ୍ୟମକୁ ସୂଚନା ଦେଇଛନ୍ତି।