ବିଶ୍ୱର ସବୁଠାରୁ ପ୍ରତିଷ୍ଠିତ ଏବଂ ପ୍ରତୀକ୍ଷିତ ନୋବେଲ ପୁରସ୍କାର ଆସନ୍ତା ସପ୍ତାହରେ ଘୋଷଣା ହେବାକୁ ଯାଉଛି । ଏହି ପୁରସ୍କାର ଗୁଡ଼ିକ ଚିକିତ୍ସା, ପଦାର୍ଥ ବିଜ୍ଞାନ, ରସାୟନ ବିଜ୍ଞାନ, ସାହିତ୍ୟ, ଅର୍ଥନୀତି ଏବଂ ଶାନ୍ତି କ୍ଷେତ୍ରରେ ଉଲ୍ଲେଖନୀୟ ସଫଳତା ପାଇଁ ପ୍ରଦାନ କରାଯାଇଥାଏ । ଏହାକୁ ବିଶ୍ୱର ସବୁଠାରୁ ପ୍ରତିଷ୍ଠିତ ସମ୍ମାନ ମଧ୍ୟରେ ବିବେଚନା କରାଯାଏ। ତେବେ ଆସନ୍ତା ସପ୍ତାହରେ ବିଜେତାଙ୍କ ଘୋଷଣା ପୂର୍ବରୁ, ଏବେ ସମସ୍ତଙ୍କ ନଜର ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଉପରେ । ତେବେ କିଛି ଦିନ ହେବ ଟ୍ରମ୍ପ ନିଜକୁ ନୋବେଲ ପୁରସ୍କାର ପାଇଁ ଜଣେ ଦୃଢ଼ ଦାବିଦାର ବୋଲି ଘୋଷଣା କରି ଆସୁଛନ୍ତି । ଅନେକ ଦେଶ ମଧ୍ୟରେ ଯୁଦ୍ଧକୁ ରୋକିଛନ୍ତି ବୋଲି ସେ ଦାବି କରିଆସୁଛନ୍ତି।
୨୦୨୫ ନୋବେଲ ପୁରସ୍କାର ପାଇଁ ପାକିସ୍ତାନ ଏବଂ ଆର୍ମେନିଆ ଭଳି ଦେଶ ଗୁଡ଼ିକ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ମନୋନୀତ କରିଛନ୍ତି । ଟ୍ରମ୍ପଙ୍କୁ ପୂର୍ବରୁ ଅନେକ ଥର ପୁରସ୍କାର ପାଇଁ ମନୋନୀତ କରାଯାଇଛି, ହେଲେ ଏପର୍ଯ୍ୟନ୍ତ ତାହା ଗ୍ରହଣ କରିନାହାଁନ୍ତି । ୨୦୧୮ ପରଠାରୁ ଟ୍ରମ୍ପଙ୍କୁ ଅନେକ ଥର ନୋବେଲ ଶାନ୍ତି ପୁରସ୍କାର ପାଇଁ ମନୋନୀତ କରାଯାଇଛି।
ତେବେ ଏହି ନୋବେଲ୍ ପୁରସ୍କାର କ’ଣ ….? ନୋବେଲ ପୁରସ୍କାର ୧୯ ଶତାବ୍ଦୀର ସ୍ୱିଡେନ ବ୍ୟବସାୟୀ ତଥା ବୈଜ୍ଞାନିକ ଆଲଫ୍ରେଡ୍ ନୋବେଲଙ୍କ ଦ୍ୱାରା ଆରମ୍ଭ କରାଯାଇଥିଲା। ତାଙ୍କ ପାଖରେ ୩ ଶହରୁ ଅଧିକ ପେଟେଣ୍ଟ ଥିଲା, କିନ୍ତୁ ତାଙ୍କର ପ୍ରସିଦ୍ଧି ଡାଇନାମାଇଟ୍ ଉଦ୍ଭାବନର କାରଣ ଥିଲା । ଯାହାକୁ ସେ ନାଇଟ୍ରୋଗ୍ଲିସେରିନ୍ ସହିତ ସ୍ଥିର ଯୌଗିକକୁ ମିଶ୍ରଣ କରି ସୃଷ୍ଟି କରିଥିଲେ। ଏହି ବିସ୍ଫୋରକ ଖଣି, ନିର୍ମାଣ ଏବଂ ଅସ୍ତ୍ରଶସ୍ତ୍ର ଶିଳ୍ପରେ ଲୋକପ୍ରିୟ ହୋଇ ନୋବେଲଙ୍କୁ ବହୁତ ଧନୀ କରିଥିଲା। ତାଙ୍କ ଜୀବନର ଶେଷ ବର୍ଷ ଗୁଡ଼ିକରେ, ନୋବେଲ ମାନବତା ପାଇଁ ଅବଦାନ ପାଇଁ ବାର୍ଷିକ ପୁରସ୍କାର ପାଣ୍ଠି ପାଇଁ ତାଙ୍କର ସମ୍ପତ୍ତି ଦାନ କରିବାକୁ ନିଷ୍ପତ୍ତି ନେଇଥିଲେ। ପ୍ରଥମ ନୋବେଲ ପୁରସ୍କାର ୧୯୦୧ ମସିହାରେ ଔଷଧ, ପଦାର୍ଥ ବିଜ୍ଞାନ, ରସାୟନ ବିଜ୍ଞାନ, ସାହିତ୍ୟ ଏବଂ ଶାନ୍ତି କ୍ଷେତ୍ରରେ ପ୍ରଦାନ କରାଯାଇଥିଲା।
ଏହି ବର୍ଷର ନୋବେଲ ପୁରସ୍କାର ସମାରୋହ ସୋମବାରରୁ ଆରମ୍ଭ ହେଉଛି। ଷ୍ଟକହୋମର କାରୋଲିନ୍ସକା ଇନଷ୍ଟିଚ୍ୟୁଟରେ ଔଷଧ ପୁରସ୍କାର ଘୋଷଣା କରାଯିବ। ଏହା ପରେ ପଦାର୍ଥ ବିଜ୍ଞାନ (ମଙ୍ଗଳବାର), ରସାୟନ ବିଜ୍ଞାନ (ବୁଧବାର), ସାହିତ୍ୟ (ଗୁରୁବାର), ଶାନ୍ତି ପୁରସ୍କାର (ଶୁକ୍ରବାର) ଏବଂ ଅର୍ଥନୈତିକ ବିଜ୍ଞାନ ପୁରସ୍କାର (ଅକ୍ଟୋବର ୧୩) ପାଇଁ ଘୋଷଣା କରାଯିବ।
ଅକ୍ଟୋବରରେ ବିଜେତାମାନଙ୍କୁ ଘୋଷଣା କରାଯିବ। ତା’ପରେ ଡିସେମ୍ବର ୧୦ ତାରିଖରେ, ଆଲଫ୍ରେଡ ନୋବେଲଙ୍କ ମୃତ୍ୟୁ ବାର୍ଷିକୀରେ ପୁରସ୍କାର ପ୍ରଦାନ କରାଯିବ। ପ୍ରତ୍ୟେକ ପୁରସ୍କାରରେ ପ୍ରାୟ ୧.୧ ସ୍ୱିଡିସ୍ କ୍ରୋନର (ପ୍ରାୟ ୧୨ ଲକ୍ଷ ଆମେରିକୀୟ ଡଲାର) ନଗଦ ପୁରସ୍କାର, ୧୮ କ୍ୟାରେଟ ସ୍ୱର୍ଣ୍ଣ ପଦକ ଏବଂ ଏକ ପ୍ରଶଂସା ପତ୍ର ସହିତ ପ୍ରଦାନ କରାଯାଏ।