ଢେଙ୍କାନାଳ ଜିଲ୍ଲା ମହାବିରୋଡ ଥାନା ବିରିବୋଲେଇ ଗାଁ ନିକଟରେ ଭୟଙ୍କର ସଡ଼କ ଦୁର୍ଘଟଣା ଘଟିଛି। ଦୁର୍ଘଟଣାରେ ଜଣେ ବରଯାତ୍ରୀ ମୃତ୍ୟୁ ବରଣ କରିଥିବା ବେଳେ ୫ ଜଣ ଗୁରୁତର ହୋଇଛନ୍ତି। ମୃତକ ଜଣଙ୍କ ପରଜଙ୍ଗ ଥାନା ବସୁଲେଇ ଗାଁର ଭ୍ରମର ବେହେରା। ଅନ୍ୟ ଗୁରୁତର ୫ ଜଣ ହେଲେ ବସୁଲେଇ ଗାଁର କମଳ ବେହେରା,ନିଧି ବେହେରା,ବିନୟ ବେହେରା,ପବିତ୍ର ବେହେରା, ଏବଂ କାର ଡ୍ରାଇଭର ତପୁ ରାଉତ।ସମସ୍ତଙ୍କୁ ମହାବିରୋଡ ଥାନା ଗାଡ଼ିରେ ପରଜଙ୍ଗ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ସେମାନଙ୍କ ମଧ୍ୟରୁ ୩ ଜଣଙ୍କ ଅବସ୍ଥା ସଂକଟାପନ୍ନ ରହିଛି।ତେବେ ବସୁଲେଇ ଗାଁରୁ ଏକ ବିବାହ ପଙ୍ଗାତିରା ଗାଁକୁ ଯାଇଥିଲା। ସେଠାରେ ବିବାହ ସାରି ଏକ ହୋଣ୍ଡା ସିଟି ଗାଡି ବସୁଲେଇ ଗାଁକୁ ଫେରୁଥିବା ବେଳେ ଅସାବଧାନତା କାରଣରୁ ରାସ୍ତା କଡରେ ଥିବା ଏକ ବଡ଼ ଶାଳ ଗଛରେ ପିଟି ହୋଇ ଯାଇଥିଲେ। ଘଟଣା ସ୍ଥଳରେ ରକ୍ତ ଜୁଡୁବୁଡୁ ଅବସ୍ଥାରେ ବରଯାତ୍ରୀ ମାନେ ପଡ଼ିଥିବା ନେଇ ସ୍ଥାନୀୟ ଲୋକମାନେ ପୋଲିସକୁ ଖବର ଦେଇଥିଲେ। ତେବେ ୧୦୮ ଆମ୍ବୁଲାନ୍ସ ଆସିବାରେ ବିଳମ୍ବ ହେବାରୁ ସମସ୍ତଙ୍କୁ ପୋଲିସ ଗାଡି ସହାୟତାରେ ପରଜଙ୍ଗ ମେଡିକାଲରେ ଭର୍ତ୍ତି କରାଯାଇଥିଲା।