ଶୀତ ଯାଇନି । ଅନେକ ସ୍ଥାନରେ ରାତି ତାପମାତ୍ରା ୧୦ ଡିଗ୍ରୀ ସେଲସିୟସ୍ ତଳେ କିମ୍ବା ପାଖାପାଖି ରହିଛି । ଏପଟେ ଡରାଇଲାଣି ଖରା ପ୍ରକୋପ । ରାଜ୍ୟର ଅଧିକାଂଶ ସ୍ଥାନରେ ଦିନ ତାପମାତ୍ରା ବୃଦ୍ଧି ପାଇଛି । ସ୍ୱାଭାବିକଠାରୁ ସାଢ଼େ ୩ ଡିଗ୍ରୀ ସେଲସିୟସ୍ ପର୍ଯ୍ୟନ୍ତ ଅଧିକ ରହିଛି ଦିନ ତାପମାତ୍ରା । ପାରଳାଖେମୁଣ୍ଡିରେ ଦିନର ସର୍ବୋଚ୍ଚ ତାପମାତ୍ରା ୩୨ ଡିଗ୍ରୀରେ ପହଞ୍ଚିଛି ।
ରାତିରେ ଥଣ୍ଡା ପ୍ରକୋପ କମିନାହିଁ । କିନ୍ତୁ, ଦିନ ୧୧ଟା ପରେ ଖରା ଟାଏଁଟାଏଁ ହେଲାଣି । ସୋମବାର ରାଜ୍ୟର ୧୨ଟି ସ୍ଥାନରେ ଦିନ ତାପମାତ୍ରା ୩୦ ଡିଗ୍ରୀ କିମ୍ବା ତା’ଠାରୁ ଅଧିକ ଥିଲା । ପାରଳାଖେମୁଣ୍ଡି ପଛକୁ ଝାରସୁଗୁଡ଼ାରେ ଦିନ ତାପମାତ୍ରା ୩୧.୮, ସୁନ୍ଦରଗଡ଼ ୩୧.୮, ସମ୍ବଲପୁର ୩୧.୮, ବଲାଙ୍ଗୀର ୩୧.୪, ହୀରାକୁଦ ୩୧.୨ ଡିଗ୍ରୀ ସେଲସିୟସ୍ ଛୁଇଁଥିଲା । ଟିଟିଲାଗଡ଼, ଭୁବନେଶ୍ୱର ଓ ଭବାନୀପାଟଣାରେ ପାରଦ ୩୧ ଡିଗ୍ରୀ ଥିବାବେଳେ ରାଉରକେଲା ୩୦.୫, ନବରଙ୍ଗପୁର ୩୦, ତାଳଚେର ୩୦ ଡିଗ୍ରୀ ଥିଲା । ଝାରସୁଗୁଡ଼ାରେ ଦିନ ତାପମାତ୍ରା ସ୍ୱାଭାବିକଠାରୁ ୩.୫ ଡିଗ୍ରୀ ଅଧିକ ଥିବା ବେଳେ ସମ୍ବଲପୁର ୩, ସୁନ୍ଦରଗଡ଼ ୨.୯, ବଲାଙ୍ଗୀର ୨.୯, ଭବାନୀପାଟଣା ୨.୧, ହୀରାକୁଦ ୨, ଭୁବନେଶ୍ୱର ୧.୫ ଡିଗ୍ରୀ ଅଧିକ ଥିଲା । ଅଧିକାଂଶ ସ୍ଥାନରେ ଦିନର ସର୍ବୋଚ୍ଚ ତାପମାତ୍ରା ୨୮ରୁ ୩୦ ଡିଗ୍ରୀ ଭିତରେ ରହିଥିଲା । ଦିନ ତାପମାତ୍ରା ୩୧ ଡିଗ୍ରୀ ପାଖାପାଖି ରହିବା ସମ୍ଭାବନା ଅଛି ।
ସୋଆ ଜଳବାୟୁ ଓ ପରିବେଶ କେନ୍ଦ୍ର ନିର୍ଦ୍ଦେଶକ କହିଛନ୍ତି, ସୂର୍ଯ୍ୟଙ୍କ ଉତ୍ତରାୟଣ ଗତି ସହ ଦିନ ତାପମାତ୍ରା ବଢ଼ିଛି । ଏବେ ଖରା ଏଭଳି ରହିବ । ରାତି ତାପମାତ୍ରା ବଢ଼ିବନି, କିନ୍ତୁ, ପ୍ରାୟତଃ ଏପରି ରହିବ । ଆଗକୁ ଦୁଇଟି ପଶ୍ଚିମା ଝଡ଼ ପ୍ରଭାବ ଯୋଗୁ ଉତ୍ତର ଆଭ୍ୟନ୍ତରୀଣରେ ସାମାନ୍ୟ କୁଆପଥର ସହ ବର୍ଷା ହୋଇପାରେ ।