କେରଳର ନାମ ପରିବର୍ତ୍ତନ କରିବାକୁ ପ୍ରଧାନମନ୍ତ୍ରୀଙ୍କୁ ଚିଠି । କେରଳ ବିଜେପି ରାଜ୍ୟ ସଭାପତି ରାଜୀବ ଚନ୍ଦ୍ରଶେଖର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏହି ଚିଠି ଲେଖିଛନ୍ତି । ରାଜ୍ୟର ନାମକୁ କେରଳମ ପରିବର୍ତ୍ତନ କରିବା ପାଇଁ ପିଏମ ମୋଦୀଙ୍କ ହସ୍ତକ୍ଷେପ ଲୋଡିଛନ୍ତି ସେ । ତାଙ୍କ ଚିଠିରେ ସେ ଜୁନ୍ ୨୦୨୪ ରେ କେରଳ ବିଧାନସଭା ଦ୍ୱାରା ସରକାରୀ ରେକର୍ଡରେ କେରଳରୁ କେରଲମ ପରିବର୍ତ୍ତନ କରିବା ପାଇଁ ଗୃହୀତ ବିଲକୁ ଉଦ୍ଧୃତ କରିଛନ୍ତି। ସେ ବିଧାନସଭାର ନିଷ୍ପତ୍ତିକୁ ସ୍ୱୀକାର କରି ମୁଖ୍ୟମନ୍ତ୍ରୀ ପିନାରାଇ ବିଜୟନଙ୍କୁ ଚିଠିର ଏକ କପି ମଧ୍ୟ ପଠାଇଛନ୍ତି।
ବିଜେପି ନେତା ଚନ୍ଦ୍ରଶେଖର କହିଛନ୍ତି ଯେ, ବିଜେପି ଏହି ମହାନ ରାଜ୍ୟକୁ “କେରଳମ” ନାମରେ ସର୍ବୋତ୍ତମ ଭାବରେ ପରିଚିତ କରିବ, ଯାହା ଏହାର ଐତିହ୍ୟ ଏବଂ ସଂସ୍କୃତିକୁ ପ୍ରତିନିଧିତ୍ୱ କରେ। ପ୍ରଧାନମନ୍ତ୍ରୀଙ୍କୁ ଲେଖିଥିବା ଚିଠିରେ ସେ ଆଶା ପ୍ରକାଶ କରିଛନ୍ତି ଯେ ସମସ୍ତ ରାଜନୈତିକ ଦଳ କେରଳର ସମୃଦ୍ଧ ପରମ୍ପରାକୁ ପୁନରୁଦ୍ଧାର ଏବଂ ସଂରକ୍ଷଣ ପାଇଁ ଏକାଠି କାମ କରିବେ।
ସେ କହିଛନ୍ତି ଯେ, ସମସ୍ତ ଧାର୍ମିକ ସମ୍ପ୍ରଦାୟର ବିଶ୍ୱାସ ଏବଂ ରୀତିକୁ ସମ୍ମାନ ଏବଂ ସୁରକ୍ଷା ଦେଇ ଏକ ବିକଶିତ ଏବଂ ସୁରକ୍ଷିତ କେରଳ ସୃଷ୍ଟି କରାଯାଇ ପାରିବ । ସେ କହିଛନ୍ତି ଯେ, ଆନୁଷ୍ଠାନିକ ଭାବରେ କେରଳମ ନାମ ଗ୍ରହଣ କରିବା ଦ୍ୱାରା ଚରମପନ୍ଥି ଗୋଷ୍ଠୀ ଗୁଡ଼ିକର ପ୍ରୟାସକୁ ପ୍ରତିହତ କରିବାରେ ସାହାଯ୍ୟ ମିଳିବ। ଏମାନେ ସେହି ଲୋକ ଯେଉଁମାନେ ରାଜ୍ୟକୁ ବିଭାଜିତ କରିବାକୁ ଚାହାଁନ୍ତି। ସେମାନେ ଧର୍ମ ଆଧାରରେ ପୃଥକ ଜିଲ୍ଲା ଦାବି କରୁଛନ୍ତି।
କେରଳର ବିଜୟନ ସରକାର ରାଜ୍ୟର ନାମ ପରିବର୍ତ୍ତନ ପାଇଁ ବିଧାନସଭାରେ ସର୍ବସମ୍ମତିକ୍ରମେ ଏକ ପ୍ରସ୍ତାବ ପାରିତ କରିଛନ୍ତି। ଏହି ପ୍ରସ୍ତାବକୁ ବିରୋଧୀ କଂଗ୍ରେସ ନେତୃତ୍ୱାଧୀନ ୟୁଡିଏଫ୍ ଏବଂ ବିଧାନସଭାରେ ଶାସକ ଦଳ ସର୍ବସମ୍ମତିକ୍ରମେ ଗ୍ରହଣ କରିଥିଲେ। ମୁଖ୍ୟମନ୍ତ୍ରୀ ପିନାରାଇ ବିଜୟନ କେନ୍ଦ୍ର ସରକାରଙ୍କୁ ସମ୍ବିଧାନରେ ରାଜ୍ୟର ନାମ ‘କେରଳମ’ କରିବାକୁ ଅନୁରୋଧ କରି ଏକ ପ୍ରସ୍ତାବ ଆଗତ କରିଥିଲେ।
କେରଳ ଶବ୍ଦର ଆଉ ଏକ ଅର୍ଥ ଅଛି। ଏହା ସମୁଦ୍ରରୁ ବାହାରିଥିବା ଭୂମିକୁ ବୁଝାଏ। ସମୁଦ୍ର ଏବଂ ପର୍ବତ ଗୁଡ଼ିକର ସଙ୍ଗମକୁ କେରଳ ମଧ୍ୟ କୁହାଯାଏ। ପ୍ରାଚୀନ ପରିଦର୍ଶକ ମାନେ ଏହି ଅଞ୍ଚଳକୁ ମାଲବାର ମଧ୍ୟ କହିଥିଲେ। ଦୀର୍ଘ ସମୟ ଧରି ଏହି ଅଞ୍ଚଳ ଚେରା ରାଜାମାନଙ୍କ ଅଧୀନରେ ଥିଲା। ଏହି କାରଣରୁ ଏହାର ନାମ ଚେରଲମ୍ ଏବଂ ପରେ କେରଳମ୍ ରଖାଯାଇଥିବ।