ପ୍ରକୃତିର କୋଳରେ ଥିବା ଶିମିଳିପାଳ ଅଭୟାରଣ୍ୟରୁ ଏକ ଖୁସି ଖବର ସାମ୍ନାକୁ ଆସିଛି। ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ ଅଞ୍ଚଳରେ ଚଳିତ ବର୍ଷ କୁମ୍ଭୀରଙ୍କ ସଂଖ୍ୟାରେ ବୃଦ୍ଧି ଘଟିଛି। ସଦ୍ୟ ପ୍ରକାଶିତ କୁମ୍ଭୀର ଗଣନା ରିପୋର୍ଟ ଅନୁଯାୟୀ, ଶିମିଳିପାଳରେ କୁମ୍ଭୀର ସଂଖ୍ୟା ୮୪କୁ ବୃଦ୍ଧି ପାଇଛି, ଯାହା ଗତବର୍ଷ ତୁଳନାରେ ୩ଟି ଅଧିକ। ଶିମିଳିପାଳ କର୍ତ୍ତୃପକ୍ଷଙ୍କ ସୂଚନା ଅନୁଯାୟୀ, ଗତ ଜାନୁଆରୀ ୬ ତାରିଖରୁ ୮ ତାରିଖ ପର୍ଯ୍ୟନ୍ତ ତିନି ଦିନ ଧରି ଏହି ଗଣନା କାର୍ଯ୍ୟ କରାଯାଇଥିଲା।
ଏହି ବୃହତ ଗଣନା କାର୍ଯ୍ୟ ପାଇଁ ଶିମିଳିପାଳ ଉତ୍ତର ଓ ଦକ୍ଷିଣ ବନଖଣ୍ଡର ମୋଟ ୧୬ଟି ରେଞ୍ଜକୁ ସାମିଲ କରାଯାଇଥିଲା। ଏଥିପାଇଁ ରେଞ୍ଜର, ଫରେଷ୍ଟର ଓ ବନ ବିଭାଗ କର୍ମଚାରୀଙ୍କୁ ନେଇ ମୋଟ ୩୦ଟି ସ୍ୱତନ୍ତ୍ର ଟିମ୍ ଗଠନ କରାଯାଇଥିଲା। ପ୍ରାୟ ୧୦୦ରୁ ଅଧିକ କର୍ମଚାରୀ ଏହି ଗଣନା ପ୍ରକ୍ରିୟାରେ ନିୟୋଜିତ ହୋଇ ଶିମିଳିପାଳର ବିଭିନ୍ନ ଜଳାଶୟ ଓ ନଦୀରେ କୁମ୍ଭୀରଙ୍କ ସ୍ଥିତି ଯାଞ୍ଚ କରିଥିଲେ। ବିଶେଷ କରି ଏହି ଅଞ୍ଚଳରେ ‘ଗୋମୁହାଁ’ ବା ‘ମଗର’ ପ୍ରଜାତିର କୁମ୍ଭୀର ଅଧିକ ସଂଖ୍ୟାରେ ଦେଖିବାକୁ ମିଳିଛନ୍ତି।
ରିପୋର୍ଟ ଅନୁଯାୟୀ, ଶିମିଳିପାଳ ଦକ୍ଷିଣ ବନଖଣ୍ଡରେ ସର୍ବାଧିକ ୭୮ଟି କୁମ୍ଭୀର ଥିବା ବେଳେ ଉତ୍ତର ବନଖଣ୍ଡରେ କେବଳ ଗୋଟିଏ କୁମ୍ଭୀର ଚିହ୍ନଟ ହୋଇଛି। ଏଥିସହିତ ରାମତୀର୍ଥ କୁମ୍ଭୀର ପ୍ରଜନନ କେନ୍ଦ୍ରରେ ୫ଟି କୁମ୍ଭୀର ରହିଛନ୍ତି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ପଶ୍ଚିମ ଦେଓ ନଦୀ କୁମ୍ଭୀରଙ୍କ ପାଇଁ ସବୁଠାରୁ ସୁରକ୍ଷିତ ସ୍ଥାନ ପାଲଟିଛି। ଏହି ଗୋଟିଏ ନଦୀରେ ହିଁ ସର୍ବାଧିକ ୬୦ଟି କୁମ୍ଭୀର ବାସ କରୁଥିବା ଗଣନାରୁ ସ୍ପଷ୍ଟ ହୋଇଛି। କୁମ୍ଭୀର ସଂଖ୍ୟାରେ ଏହି ଧୀର କିନ୍ତୁ ନିରନ୍ତର ବୃଦ୍ଧି ବନ୍ୟପ୍ରାଣୀ ପ୍ରେମୀ ଓ ପରିବେଶବିତଙ୍କ ମଧ୍ୟରେ ଉତ୍ସାହ ସୃଷ୍ଟି କରିଛି।