କାଲିଫର୍ନିଆର ବେଭର୍ଲି ହିଲ୍ସସ୍ଥିତ ବେଭର୍ଲି ହିଲଟନ୍ ହୋଟେଲରେ ଆୟୋଜିତ ୮୩ତମ ଗୋଲ୍ଡେନ୍ ଗ୍ଲୋବ୍ ପୁରସ୍କାର ସମାରୋହରେ ଚମକିଛନ୍ତି ବଲିଉଡ୍ ତଥା ହଲିଉଡ୍ ଅଭିନେତ୍ରୀ ପ୍ରିୟଙ୍କା ଚୋପ୍ରା। ଏହି ଆନ୍ତର୍ଜାତୀୟ ମଞ୍ଚରେ ପ୍ରେଜେଣ୍ଟର ଭାବେ ଯୋଗ ଦେଇ ପ୍ରିୟଙ୍କା କେବଳ ଭାରତ ପାଇଁ ଗର୍ବ ଆଣିନାହାନ୍ତି, ବରଂ ନିଜର ଗ୍ଲାମରସ୍ ଅନ୍ଦାଜରେ ସମସ୍ତଙ୍କ ନଜର ଅଟକାଇ ଦେଇଛନ୍ତି।
ଏହି ଭବ୍ୟ କାର୍ଯ୍ୟକ୍ରମରେ ପ୍ରିୟଙ୍କା ଏକା ନୁହେଁ, ବରଂ ସ୍ୱାମୀ ନିକ୍ ଜୋନାସଙ୍କ ହାତ ଧରି ରାଜକୀୟ ଢଙ୍ଗରେ ପ୍ରବେଶ କରିଥିଲେ। ରେଡ୍ କାର୍ପେଟରେ ଦୁହିଁଙ୍କ ରୋମାଣ୍ଟିକ କେମେଷ୍ଟ୍ରି ଏବଂ ପରସ୍ପର ପ୍ରତି ଥିବା ଭଲପାଇବା ସ୍ପଷ୍ଟ ବାରି ହୋଇ ପଡ଼ୁଥିଲା। ଏହି ଷ୍ଟାର୍ ଦମ୍ପତିଙ୍କ ଫଟୋ ଓ ଭିଡିଓ ଏବେ ସୋସିଆଲ ମିଡିଆରେ ନିଆଁ ଭଳି ଭାଇରାଲ ହେବାରେ ଲାଗିଛି।
ପ୍ରିୟଙ୍କାଙ୍କ ଲୁକ୍ ବିଷୟରେ କହିବାକୁ ଗଲେ, ସେ ଏକ ଗାଢ଼ ନୀଳ ରଙ୍ଗର ଅଫ-ଦି-ଶୋଲ୍ଡର ଗାଉନ୍ ପିନ୍ଧିଥିଲେ, ଯେଉଁଥିରେ ସେ କୌଣସି ସ୍ୱପ୍ନର ପରୀଠାରୁ କମ୍ ଦେଖାଯାଉ ନଥିଲେ।
ସ୍ମୋକି ବ୍ରାଉନ୍ ଆଇସାଡୋ, ଗ୍ଲସି ନ୍ୟୁଡ୍ ଲିପଷ୍ଟିକ୍ ଏବଂ ହାଇଲାଇଟରର ସଠିକ୍ ବ୍ୟବହାର ତାଙ୍କ ସୌନ୍ଦର୍ଯ୍ୟକୁ ଦ୍ୱିଗୁଣିତ କରିଥିଲା।
ଖୋଲା କେଶରେ ସେ ବେଶ୍ ଆକର୍ଷଣୀୟ ଲାଗୁଥିଲେ।
ଅନ୍ୟପଟେ, ନିକ୍ ଜୋନାସ୍ ଏକ କଳା ରଙ୍ଗର କ୍ଲାସିକ୍ ଟକ୍ସେଡୋରେ ବେଶ୍ ହ୍ୟାଣ୍ଡସମ୍ ଦେଖାଯାଉଥିଲେ।
କେବଳ ରେଡ୍ କାର୍ପେଟ୍ ନୁହେଁ, କାର୍ଯ୍ୟକ୍ରମ ପୂର୍ବରୁ ନିକ୍ ଜୋନାସ୍ ଏକ ମଜାଦାର ଭିଡିଓ ସେୟାର କରିଛନ୍ତି। ଏହି ଭିଡିଓରେ ଦୁହେଁ ଖୁସିରେ ନାଚୁଥିବାର ଦେଖିବାକୁ ମିଳିଛି। ପ୍ରଶଂସକମାନେ ଏହି ଯୋଡ଼ିଙ୍କୁ ‘ପରଫେକ୍ଟ କପଲ୍’ ବୋଲି କହିବା ସହ ସେମାନଙ୍କ ଷ୍ଟାଇଲକୁ ଭରପୂର ପ୍ରଶଂସା କରୁଛନ୍ତି। ୮୩ତମ ଗୋଲ୍ଡେନ୍ ଗ୍ଲୋବ୍ସର ଏହି ରୋମାଣ୍ଟିକ ମୁହୂର୍ତ୍ତ ଏବେ ସାରା ବିଶ୍ୱରେ ଚର୍ଚ୍ଚାର ବିଷୟ ପାଲଟିଛି।