କେନ୍ଦ୍ର ସରକାରଙ୍କ ତଦନ୍ତକାରୀ ସଂସ୍ଥା ‘ଇଡି’ (ED) ର କାର୍ଯ୍ୟାନୁଷ୍ଠାନକୁ ବିରୋଧ କରି ଆଜି ଦିଲ୍ଲୀରେ ତୃଣମୂଳ କଂଗ୍ରେସ (TMC) ପକ୍ଷରୁ ଏକ ବଡ଼ ଧରଣର ପ୍ରତିବାଦ ପ୍ରଦର୍ଶନ କରାଯାଇଛି। କୋଲକାତାର ରାଜନୈତିକ ପରାମର୍ଶଦାତା ସଂସ୍ଥା ଆଇ-ପିଏସି (I-PAC) କାର୍ଯ୍ୟାଳୟ ଏବଂ ଏହାର ମୁଖ୍ୟ ପ୍ରତୀକ ଜୈନଙ୍କ ବାସଭବନରେ ଗୁରୁବାର ଇଡି ଚଢାଉ କରିବା ପରେ ଆଜି ଟିଏମସି ସାଂସଦମାନେ ଦିଲ୍ଲୀରେ ଗୃହ ମନ୍ତ୍ରଣାଳୟ ବାହାରେ ଧାରଣା ଦେଇଥିଲେ।
ପ୍ରତିବାଦ ବେଳେ ଦିଲ୍ଲୀ ପୋଲିସ ଡେରେକ ଓ’ବ୍ରାଏନ, ମହୁଆ ମୋଇତ୍ରା, ଶତାବ୍ଦୀ ରାୟ, ସାକେତ ଗୋଖଲେ ଏବଂ କୀର୍ତ୍ତି ଆଜାଦଙ୍କ ସମେତ ୮ ଜଣ ସାଂସଦଙ୍କୁ ଜୋରଜବରଦସ୍ତ ଟେକି ନେଇ ଅଟକ ରଖିଛି।
ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଅଭିଯୋଗ କରିଛନ୍ତି ଯେ, ଇଡି ତଦନ୍ତ ବାହାନାରେ ଆସନ୍ତା ନିର୍ବାଚନ ପାଇଁ ଦଳର ପ୍ରସ୍ତୁତ କରିଥିବା ଗୁପ୍ତ ରଣନୀତି, ହାର୍ଡ ଡିସ୍କ ଏବଂ ପ୍ରାର୍ଥୀ ତାଲିକା ଚୋରି କରିବାକୁ ଚେଷ୍ଟା କରୁଛି।
ଏହି ଘଟଣାକୁ ନେଇ ଏବେ ମାମଲା କଲିକତା ହାଇକୋର୍ଟରେ ପହଞ୍ଚିଛି। ଇଡି ପକ୍ଷରୁ ଅଭିଯୋଗ କରାଯାଇଛି ଯେ ମୁଖ୍ୟମନ୍ତ୍ରୀ ନିଜେ ଚଢାଉ ସ୍ଥଳରେ ପହଞ୍ଚି ତଦନ୍ତରେ ବାଧା ସୃଷ୍ଟି କରିଛନ୍ତି।
ଅଟକ ହେବା ସମୟରେ ମହୁଆ ମୋଇତ୍ରା କହିଛନ୍ତି, “ଗଣତନ୍ତ୍ରକୁ ହତ୍ୟା କରାଯାଉଛି। ବିଜେପି ନିର୍ବାଚନ ହାରିବା ଭୟରେ କେନ୍ଦ୍ରୀୟ ସଂସ୍ଥାକୁ ଅସ୍ତ୍ର ଭାବେ ବ୍ୟବହାର କରୁଛି।” ଅନ୍ୟପଟେ କୀର୍ତ୍ତି ଆଜାଦ ଏହାକୁ ‘ଅଗଣତାନ୍ତ୍ରିକ’ ବୋଲି ଦର୍ଶାଇଛନ୍ତି।
ସୂଚନାଯୋଗ୍ୟ ଯେ, ପଶ୍ଚିମବଙ୍ଗର ଆସନ୍ତା ବିଧାନସଭା ନିର୍ବାଚନ ପୂର୍ବରୁ ଏହି ରାଜନୈତିକ ଉଷ୍ଣତା ଶିଖରରେ ପହଞ୍ଚିଛି। ପୋଲିସ ସମସ୍ତ ସାଂସଦଙ୍କୁ ପାର୍ଲାମେଣ୍ଟ ଷ୍ଟ୍ରିଟ ପୋଲିସ ଷ୍ଟେସନକୁ ନେଇଛି ଏବଂ ସେଠାରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି।