ପିକନିକ୍ର ଆନନ୍ଦ ପାଲଟିଗଲା ବିଷାଦ। ଗଜପତି ଜିଲ୍ଲା ଆର୍.ଉଦୟଗିରି ଥାନା ଅନ୍ତର୍ଗତ ପ୍ରସିଦ୍ଧ ମାଙ୍କଡ଼ଡିଆଁ ଜଳପ୍ରପାତରେ ଘଟିଛି ଏକ ଅଭାବନୀୟ ଘଟଣା। ଜଳପ୍ରପାତରେ ଗାଧୋଇବା ସମୟରେ ବୁଡ଼ିଯାଇ ଜଣେ ଯୁବକଙ୍କ ପ୍ରାଣହାନି ଘଟିଛି। ମୃତ ଯୁବକ ଜଣକ ପାରଳାଖେମୁଣ୍ଡି ସହରର ସତୀଶ ବୋଲି ଜଣାପଡ଼ିଛି। ପ୍ରାୟ ୧୮ ଘଣ୍ଟାର ଅକ୍ଳାନ୍ତ ପରିଶ୍ରମ ପରେ ଆଜି ତାଙ୍କର ମୃତଦେହକୁ ଉଦ୍ଧାର କରାଯାଇଛି।
ସୂଚନା ଅନୁଯାୟୀ, ଗତକାଲି ସତୀଶ ତାଙ୍କର କିଛି ସାଙ୍ଗମାନଙ୍କ ସହ ମାଙ୍କଡ଼ଡିଆଁ ଜଳପ୍ରପାତକୁ ପିକନିକ୍ କରିବା ପାଇଁ ଯାଇଥିଲେ। ସମସ୍ତେ ମିଶି ଭୋଜିଭାତ କରିବା ସହ ଜଳପ୍ରପାତର ମଜା ନେଉଥିଲେ। ଏହି ସମୟରେ ସତୀଶ ଓ ତାଙ୍କ ସାଙ୍ଗମାନେ ପାଣିରେ ଗାଧୋଇବାକୁ ଓହ୍ଲାଇଥିଲେ। ତେବେ ଗାଧୋଇବା ସମୟରେ ହଠାତ୍ ସତୀଶ ଗଭୀର ଜଳକୁ ଚାଲିଯାଇ ନିଖୋଜ ହୋଇଯାଇଥିଲେ। ସାଙ୍ଗମାନେ ତାଙ୍କୁ ତୁରନ୍ତ ଖୋଜାଖୋଜି କରିଥିଲେ ମଧ୍ୟ ପାଣିର ସୁଅ ଅଧିକ ଥିବାରୁ ତାଙ୍କର କୌଣସି ପତ୍ତା ମିଳିନଥିଲା।
ଘଟଣା ସମ୍ପର୍କରେ ସ୍ଥାନୀୟ ପୋଲିସ ଓ ଅଗ୍ନିଶମ ବାହିନୀକୁ ଖବର ଦିଆଯାଇଥିଲା। ଗତକାଲି ବିଳମ୍ବିତ ରାତି ପର୍ଯ୍ୟନ୍ତ ଉଦ୍ଧାର କାର୍ଯ୍ୟ ଜାରି ରହିଥିଲେ ମଧ୍ୟ ଅନ୍ଧାର ଯୋଗୁଁ ସଫଳତା ମିଳିନଥିଲା। ଆଜି ସକାଳୁ ପୁଣି ଥରେ ଅଗ୍ନିଶମ ବାହିନୀ ପକ୍ଷରୁ ସର୍ଚ୍ଚ ଅପରେସନ ଆରମ୍ଭ କରାଯାଇଥିଲା। ଦୀର୍ଘ ୧୮ ଘଣ୍ଟାର ଖୋଜାଖୋଜି ପରେ ଶେଷରେ ଜଳପ୍ରପାତ କୁଣ୍ଡ ମଧ୍ୟରୁ ସତୀଶଙ୍କ ମୃତଦେହ ଉଦ୍ଧାର କରାଯାଇଛି।
ସତୀଶଙ୍କ ମୃତ୍ୟୁ ଖବର ପ୍ରଚାରିତ ହେବା ପରେ ପାରଳାଖେମୁଣ୍ଡି ଅଞ୍ଚଳରେ ଶୋକର ଛାୟା ଖେଳିଯାଇଛି। ପରିବାର ଲୋକଙ୍କ କାନ୍ଦବୋବାଳିରେ ସାରା ପରିବେଶ ଫାଟି ପଡୁଛି। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଜାରି ରଖିଛି।
ଜଳପ୍ରପାତ ଭଳି ବିପଜ୍ଜନକ ସ୍ଥାନରେ ସତର୍କତା ଅବଲମ୍ବନ କରିବାକୁ ପ୍ରଶାସନ ପକ୍ଷରୁ ବାରମ୍ବାର ସଚେତନ କରାଯାଉଥିଲେ ମଧ୍ୟ ଏଭଳି ଦୁର୍ଘଟଣା ସାଧାରଣ ଜନତାଙ୍କ ମନରେ ପ୍ରଶ୍ନବାଚୀ ସୃଷ୍ଟି କରିଛି।