ଗାନ୍ଧୀ ପରିବାରରୁ ଆସିଲା ଖୁସି ଖବର । କଂଗ୍ରେସ ମହାସଚିବ ତଥା ସାଂସଦ ପ୍ରିୟଙ୍କା ଗାନ୍ଧୀଙ୍କ ଘରେ ବାଜିବ ସାହାନାଇ । ପ୍ରିୟଙ୍କା ଏବଂ ତାଙ୍କ ଶିଳ୍ପପତି ସ୍ୱାମୀ ରବର୍ଟ ଭଦ୍ରାଙ୍କ ପୁଅ ରେହାନ ଭଦ୍ରାଙ୍କର ବାହାଘର ହେବାକୁ ଯାଉଛି । ଦୀର୍ଘ ଦିନର ଗର୍ଲଫ୍ରେଣ୍ଡ ଅବିବା ବେଗଙ୍କ ସହିତ ରେହାନଙ୍କର ନିର୍ବନ୍ଧ ସରିଛି । ପରିବାର ଲୋକ ଓ କିଛି ଘନିଷ୍ଠ ବନ୍ଧୁଙ୍କ ଉପସ୍ଥିତିରେ ରେହାନ ୭ ବର୍ଷର ପ୍ରେମ ସମ୍ପର୍କକୁ ନେଇ ଗୋଟିଏ ପାହାଚ ଆଗକୁ ବଢିଛନ୍ତି । କିଛି ଦିନ ତଳେ ରେହାନ, ଅବିବାଙ୍କୁ ବିବାହ ପାଇଁ ପ୍ରସ୍ତାବ ଦେବା ପରେ ସେ ଏହି ପ୍ରସ୍ତାବକୁ ଗ୍ରହଣ କରିଥିଲେ । ପରେ ଉଭୟ ପରିବାର ରାଜି ହେବାରୁ ଉଭୟଙ୍କ ନିର୍ବନ୍ଧ ହୋଇଛି ।

ସାଂସଦ ପ୍ରିୟଙ୍କା ଗାନ୍ଧୀଙ୍କ ପୁଅ ରେହାନଙ୍କୁ ଏବେ ୨୫ ବର୍ଷ । ରେହାନ୍ ସାଧାରଣତଃ ଲୋକ ଲୋଚନକୁ ଆସିନଥାନ୍ତି । ତାଙ୍କୁ ରାହୁଲ ଗାନ୍ଧୀଙ୍କ ସହ ୨ରୁ୩ ଥର ଦେଖିବାକୁ ମିଳିଛି । କିଛି ଦିନ ତଳେ ତାଙ୍କୁ ରାହୁଲଙ୍କ ସହ ଦେଖି ଅନୁମାନ କରାଯାଉଥିଲା କି ତାଙ୍କର ରାଜନୀତିରେ ଏଣ୍ଟ୍ରୀ ହେବ । ହେଲେ ସେପରି କିଛି ହେଲା ନାହିଁ । ରେହାନ ଜଣେ ଇନଷ୍ଟାଲେସନ ଏବଂ ଭିଜୁଆଲ ଆଟିଷ୍ଟ । ତାଙ୍କର ଏକାଧିକ ପ୍ରଦର୍ଶନୀ ପଡି ସାରିଛି । ତାଙ୍କର ପ୍ରଥମ ପ୍ରଦର୍ଶନୀ ଆୟୋଜନ କରିଥିଲେ, ଯାହାର ଶୀର୍ଷକ ଥିଲା ‘ଡାର୍କ ପର୍ସେପ୍ସନ୍’। ଏହା ବ୍ୟତୀତ, ରେହାନ ପିଲାଦିନରୁ ବନ୍ୟପ୍ରାଣୀ ଫଟୋଗ୍ରାଫି ପ୍ରତି ଆଗ୍ରହୀ ଏବଂ କମର୍ସିଆଲ ଫଟୋଗ୍ରାଫି ମଧ୍ୟ କରନ୍ତି । ରେହାନ ଡେରାଡୁନର ପ୍ରସିଦ୍ଧ ଡୁନ୍ ସ୍କୁଲରେ ପାଠପଢ଼ିଥିଲେ, ଯେଉଁଠାରେ ରାଜୀବ ଗାନ୍ଧୀ ଏବଂ ରାହୁଲ ଗାନ୍ଧୀ ମଧ୍ୟ ପାଠ ପଢ଼ିଥିଲେ। ଅଧିକ ଅଧ୍ୟୟନ ପାଇଁ ଲଣ୍ଡନ ଯାଇଥିଲେ ରେହାନ । SOAS ବିଶ୍ୱବିଦ୍ୟାଳୟରେ ଉଚ୍ଚଶିକ୍ଷା ସମାପ୍ତ କରିଥିଲେ ।

ଅବିବା ବେଗ୍ ଦିଲ୍ଲୀର ବାସିନ୍ଦା । ତାଙ୍କ ପରିବାର ସହ ଭଦ୍ରା ପରିବାରର ସମ୍ପର୍କ ପୂର୍ବରୁ ବହୁତ ନିବିଡ଼ । ଅବିବା ଦିଲ୍ଲୀର ପ୍ରତିଷ୍ଠିତ ମଡର୍ଣ୍ଣ ସ୍କୁଲରେ ତାଙ୍କର ପ୍ରାରମ୍ଭିକ ଶିକ୍ଷା ସମାପ୍ତ କରିଥିଲେ ଏବଂ ତା’ପରେ ଓପି ଜିନ୍ଦଲ ଗ୍ଲୋବାଲ ବିଶ୍ୱବିଦ୍ୟାଳୟରୁ ମିଡିଆ ଯୋଗାଯୋଗ ଏବଂ ସାମ୍ବାଦିକତାରେ ଡିଗ୍ରୀ ହାସଲ କରିଥିଲେ । ଅବିବା କେବଳ ବଡ଼ ପରିବାର ନୁହେଁ ତାଙ୍କର ମଧ୍ୟ ସ୍ୱତନ୍ତ୍ର ପରିଚୟ ରହିଛି । ତାଙ୍କର ବୃତ୍ତିଗତ ଜୀବନ ଏବଂ ସଫଳତା ବିଷୟରେ କହିବାକୁ ଗଲେ ଅବିବା ଜଣେ ଭଲ ଫଟୋଗ୍ରାଫର ଏବଂ ପ୍ରଯୋଜକ ମଧ୍ୟ । ତାଙ୍କର ଫଟୋଗୁଡ଼ିକ ଜାତୀୟ ଏବଂ ଅନ୍ତର୍ଜାତୀୟ ପୋର୍ଟାଲ୍ ଏବଂ ପ୍ରକାଶନରେ ପ୍ରଦର୍ଶିତ ହୋଇସାରିଛି । ସେ ‘ୟୁ କାଣ୍ଟ ମିସ୍ ଦିସ୍’ ଏବଂ ‘ଦି ଇଲ୍ୟୁସରି ୱାର୍ଲ୍ଡ’ ଭଳି ଅନେକ ସଫଳ ପ୍ରଦର୍ଶନୀରେ ତାଙ୍କର କଳା ପ୍ରଦର୍ଶନ କରିଛନ୍ତି । ତାଙ୍କର ମୁଖ୍ୟ ଲକ୍ଷ୍ୟ ହେଉଛି ଫଟୋଗ୍ରାଫି ମାଧ୍ୟମରେ ସାମାଜିକ ସମସ୍ୟାଗୁଡ଼ିକୁ ଉଠାଇବା ଏବଂ ସମାଜରେ ସକାରାତ୍ମକ ପରିବର୍ତ୍ତନ ଆଣିବା । ଅବିବା ଜଣେ ଜାତୀୟସ୍ତରରେ ଫୁଟବଲ ପ୍ଲେୟାର ସହ ପ୍ରକୃତିପ୍ରେମୀ ମଧ୍ୟ ।