ଶନିବାର ବିଳମ୍ବିତ ରାତିରେ ଏକ ଶକ୍ତିଶାଳୀ ଭୂମିକମ୍ପ ଝଟକାରେ ଥରିଉଠିଛି ଦ୍ୱୀପରାଷ୍ଟ୍ର ତାଇୱାନ। ରିକ୍ଟର ସ୍କେଲରେ ଏହାର ତୀବ୍ରତା ୭.୦ ରେକର୍ଡ କରାଯାଇଛି। ରାଜଧାନୀ ତାଇପେଇ ସମେତ ସମଗ୍ର ଉତ୍ତର-ପୂର୍ବ ଉପକୂଳ ଅଞ୍ଚଳରେ ଏହି କମ୍ପନ ଅନୁଭୂତ ହୋଇଛି। ଭୂମିକମ୍ପର କେନ୍ଦ୍ରସ୍ଥଳ ୟିଲାନ୍ ଜିଲ୍ଲାରୁ ପ୍ରାୟ ୩୦ କିଲୋମିଟର ଦୂର ସମୁଦ୍ର ଗର୍ଭରେ ଥିବା ଜଣାପଡ଼ିଛି।
ଭୂମିକମ୍ପ ଯୋଗୁଁ ଅନେକ ସ୍ଥାନରେ କୋଠାଘର ଗୁଡ଼ିକ ଦୋହଲି ଯାଇଥିଲା, ଯାହାଫଳରେ ଲୋକେ ଭୟଭୀତ ହୋଇ ରାତି ଅଧରେ ଘରୁ ବାହାରକୁ ପଳାଇ ଆସିଥିଲେ। ପ୍ରଭାବିତ ଅଞ୍ଚଳରେ ବିଦ୍ୟୁତ ସେବା ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଥିବା ବେଳେ ପ୍ରାୟ ୩,୦୦୦ରୁ ଅଧିକ ପରିବାର ଅନ୍ଧାରରେ ରହିଛନ୍ତି। ବିଶ୍ୱର ବୃହତ୍ତମ ସେମିକଣ୍ଡକ୍ଟର ନିର୍ମାତା କମ୍ପାନୀ ‘TSMC’ ର କାର୍ଯ୍ୟ କିଛି ସମୟ ପାଇଁ ବନ୍ଦ ରହିଥିଲା ଏବଂ କର୍ମଚାରୀମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଥିଲା। ତେବେ କୌଣସି ବଡ଼ ଧରଣର ଭିତ୍ତିଭୂମି ନଷ୍ଟ ହୋଇନଥିବା କମ୍ପାନୀ ପକ୍ଷରୁ କୁହାଯାଇଛି।
ଜାତୀୟ ଅଗ୍ନିଶମ ସଂସ୍ଥାର ସୂଚନା ଅନୁଯାୟୀ, ବର୍ତ୍ତମାନ ସୁଦ୍ଧା କୌଣସି ମୃତାହତ କିମ୍ବା ବଡ଼ କ୍ଷୟକ୍ଷତିର ଖବର ହସ୍ତଗତ ହୋଇନାହିଁ। ଭୂମିକମ୍ପର ତୀବ୍ରତା ଅଧିକ ଥିଲେ ମଧ୍ୟ ସମୁଦ୍ର ମଧ୍ୟରେ ଏହାର ଗଭୀରତା ପ୍ରାୟ ୭୩ କିଲୋମିଟର ଥିବାରୁ ସୁନାମିର ଆଶଙ୍କା ନାହିଁ ବୋଲି ସ୍ପଷ୍ଟ କରାଯାଇଛି। ସୂଚନାଯୋଗ୍ୟ ଯେ, ମାତ୍ର ତିନି ଦିନ ପୂର୍ବରୁ ବୁଧବାର ଦିନ ତାଇୱାନର ତାଇତୁଙ୍ଗରେ ୬.୧ ତୀବ୍ରତାର ଏକ ଭୂମିକମ୍ପ ଅନୁଭୂତ ହୋଇଥିଲା।
ବାରମ୍ବାର ଆସୁଥିବା ଏହି ପୁନଃ-କମ୍ପନ (Aftershocks) କୁ ଦୃଷ୍ଟିରେ ରଖି ତାଇୱାନ ସରକାର ଓ ପ୍ରଶାସନ ଲୋକଙ୍କୁ ସତର୍କ ରହିବାକୁ ପରାମର୍ଶ ଦେଇଛନ୍ତି। ବିଶେଷ କରି ପୁରୁଣା କୋଠା ଓ ପାହାଡ଼ିଆ ଅଞ୍ଚଳରେ ରହୁଥିବା ଲୋକଙ୍କୁ ସୁରକ୍ଷିତ ରହିବା ପାଇଁ କୁହାଯାଇଛି।