ମସ୍ଜିଦରେ ନମାଜ ପାଠ ସମୟରେ ବଡ଼ ବିସ୍ଫୋରଣ। ଘଟଣାସ୍ଥଳରେ ୧୦ ଜଣଙ୍କ ମୃତ୍ୟୁ ହୋଇଛି। ତେବେ ନାଇଜେରିଆର ମୈଦୁଗୁରିରେ ସନ୍ଧ୍ୟା ପ୍ରାର୍ଥନା ସମୟରେ ଏହି ଘଟଣା ସାମ୍ନାକୁ ଆସିଛି। ବୁଧବାର ସନ୍ଧ୍ୟାରେ ଘଟିଥିବା ଏହି ଘଟଣା ବର୍ଷ ବର୍ଷ ଧରି ବିଦ୍ରୋହଗ୍ରସ୍ତ ଅଞ୍ଚଳରେ ପୁନର୍ବାର ଆତଙ୍କବାଦୀ ହିଂସାର ଆଶଙ୍କା ସୃଷ୍ଟି କରିଛି।
ବିସ୍ଫୋରଣ ପାଇଁ ଏପର୍ଯ୍ୟନ୍ତ କୌଣସି ସଶସ୍ତ୍ର ଗୋଷ୍ଠୀ ନିଜକୁ ଦାୟୀ କରିନାହାଁନ୍ତି। ମିଲିସିଆ ନେତା ବାବାକୁରା କୋଲୋ ଏହି ଘଟଣାକୁ ଏକ ସନ୍ଦେହଜନକ ବୋମା ବିସ୍ଫୋରଣ ବୋଲି ବର୍ଣ୍ଣନା କରିଛନ୍ତି। ଅନ୍ୟପଟେ ଅଧିକାରୀମାନେ କହିଛନ୍ତି ଯେ, ଆତଙ୍କବାଦୀମାନେ ପୂର୍ବରୁ ମୈଦୁଗୁରିରେ ମସଜିଦ ଏବଂ ଜନଗହଳିପୂର୍ଣ୍ଣ ସାର୍ବଜନୀନ ସ୍ଥାନଗୁଡ଼ିକୁ ଆତ୍ମଘାତୀ ବୋମା ଏବଂ ବିସ୍ଫୋରକ ଉପକରଣ ବ୍ୟବହାର କରି ଟାର୍ଗେଟ କରିଥିଲେ।ପ୍ରତ୍ୟକ୍ଷଦର୍ଶୀଙ୍କ ଅନୁସାରେ, ଗାମ୍ବୋରୁ ମାର୍କେଟ୍ ଅଞ୍ଚଳର ଏକ ଜନଗହଳିପୂର୍ଣ୍ଣ ମସଜିଦ ଭିତରେ ବିସ୍ଫୋରଣ ଘଟିଥିଲା, ଯେଉଁଠାରେ ମୁସଲମାନମାନେ ସନ୍ଧ୍ୟା ପ୍ରାର୍ଥନା ପାଇଁ ଏକତ୍ରିତ ହୋଇଥିଲେ।ହଠାତ୍ ବିସ୍ଫୋରଣ ହେବାରୁ ଆତଙ୍କ ଖେଳିଯାଇଥିଲା।ପ୍ରାରମ୍ଭିକ ରିପୋର୍ଟରୁ ଜଣାପଡିଛି ଯେ, ବିସ୍ଫୋରକ ଉପକରଣଟି ମସଜିଦ ଭିତରେ ରଖାଯାଇଥାଇପାରେ ଏବଂ ପ୍ରାର୍ଥନା ସମୟରେ ବିସ୍ଫୋରଣ କରାଯାଇଥାଇପାରେ।
ପ୍ରକାଶ ଥାଉକି, ମୈଦୁଗୁରି ହେଉଛି ବୋର୍ନୋ ରାଜ୍ୟର ରାଜଧାନୀ। ଗତ କିଛି ବର୍ଷ ମଧ୍ୟରେ ମୈଦୁଗୁରିରେ କୌଣସି ବଡ଼ ଆକ୍ରମଣ ହୋଇନାହିଁ। ଏହି ଘଟଣା ବିଶେଷ ଭାବରେ ସ୍ଥାନୀୟ ବାସିନ୍ଦା ଏବଂ ସୁରକ୍ଷା ଏଜେନ୍ସି ପାଇଁ ଚିନ୍ତାଜନକ। ବୋକୋ ହାରାମ ୨୦୦୯ ମସିହାରେ ବୋର୍ନୋ ରାଜ୍ୟରେ ଏକ ଇସଲାମିକ୍ ଖଲିଫାତ ପ୍ରତିଷ୍ଠା କରିବା ଲକ୍ଷ୍ୟରେ ବିଦ୍ରୋହ ଆରମ୍ଭ କରିଥିଲା।ନାଇଜେରିଆ ୨୦୦୯ ମସିହାରୁ ଜେହାଦୀ ବିଦ୍ରୋହ ସହିତ ସଂଘର୍ଷ କରୁଛି। ଜାତିସଂଘର ଆକଳନ ଅନୁଯାୟୀ, ଦେଶର ଉତ୍ତର-ପୂର୍ବରେ ଏହି ସଂଘର୍ଷରେ ଅତି କମରେ ୪୦,୦୦୦ ଲୋକଙ୍କ ଜୀବନ ଯାଇଛି ଏବଂ ପ୍ରାୟ ୨୦ ଲକ୍ଷ ଲୋକଙ୍କୁ ବାସଚ୍ୟୁତ କରାଯାଇଛି।