ଜର୍ମାନୀ ଗସ୍ତରେ ଅଛନ୍ତି କଂଗ୍ରେସ ନେତା ତଥା ଲୋକସଭା ସାଂସଦ ରାହୁଲ ଗାନ୍ଧୀ । ସେଠାରେ ଏକ କାର୍ଯ୍ୟକ୍ରମରେ ଭାଷଣ ଦେଇ କଂଗ୍ରେସ ନେତା ରାହୁଲ ଗାନ୍ଧୀ ଦାବି କରିଛନ୍ତି ଯେ, ଭାରତ ଏବଂ ପଶ୍ଚିମ ଦେଶମାନେ ସାମଗ୍ରୀ ଉତ୍ପାଦନ ଦାୟିତ୍ୱ ଚୀନକୁ ଦେଇଛନ୍ତି । “ମେଡ୍ ଇନ୍ ଚାଇନା” ସାମଗ୍ରୀ ଗଣତନ୍ତ୍ର ପାଇଁ ବିପଦ । ଏହା ନିଯୁକ୍ତି ସୃଷ୍ଟି କରିବାର କ୍ଷମତାକୁ ଦୁର୍ବଳ କରିଛି, ଯାହା ଭାରତ, ଆମେରିକା ଏବଂ ୟୁରୋପରେ ରାଜନୈତିକ ଅସ୍ଥିରତାର କାରଣ ହୋଇଛି । ଗଣତନ୍ତ୍ର ପାଇଁ ନିଜ ପ୍ରଡକ୍ସନ ଜରୁରୀ ବୋଲି କହିଛନ୍ତି ରାହୁଲ ।
ଜର୍ମାନୀର ବର୍ଲିନରେ ହର୍ଟି ସ୍କୁଲରେ ଏକ କାର୍ଯ୍ୟକ୍ରମକୁ ସମ୍ବୋଧନ କରି ବିରୋଧୀ ଦଳ ନେତା ଲୋକତାନ୍ତ୍ରିକ ମାହୋଲରେ ପ୍ରଡକ୍ସନ ବିଷୟରେ କହିଛନ୍ତି । ଯୁକ୍ତି ବାଢିଛନ୍ତି କି, ଲୋକତନ୍ତ୍ର ପାଇଁ ନିଜ ସାମଗ୍ରୀ ଉତ୍ପାଦନ ଜରୁରୀ । ଭାରତ ଓ ପଶ୍ଚିମ ଦେଶ କିଛି ପରିମାଣରେ ଭାରତ ଚୀନ୍କୁ ଉତ୍ପାଦନ ହସ୍ତାନ୍ତର କରିଛି । ଆଜି ଚୀନ୍ ଉତ୍ପାଦନରେ ପ୍ରାଧାନ୍ୟ ବିସ୍ତାର କରୁଛି, ଯାହାର ଅର୍ଥ ହେଉଛି ବହୁ ସଂଖ୍ୟକ ଲୋକଙ୍କୁ ନିଯୁକ୍ତି ଯୋଗାଇବା କଷ୍ଟକର । ଭାରତ, ଆମେରିକା ଏବଂ ଜର୍ମାନୀ ଭଳି ଦେଶଗୁଡ଼ିକ ସେବା ଉପରେ ସେମାନଙ୍କର ନିଯୁକ୍ତି ବ୍ୟବସ୍ଥାକୁ ଆଧାର କରି ପାରିବେ ନାହିଁ । ଏହି ପରିବର୍ତ୍ତନରେ ଗଣତନ୍ତ୍ର କିପରି ଉତ୍ପାଦନ କରେ ? କେଉଁ ମଡେଲଗୁଡ଼ିକ ଆବଶ୍ୟକ, ଏକ ଗଣତାନ୍ତ୍ରିକ ପରିବେଶରେ ଉତ୍ପାଦନ ବିଷୟରେ ଆପଣ କିପରି ଭାବନ୍ତି, ଏବଂ ଭାରତ, ଆମେରିକା ଏବଂ ୟୁରୋପ ଉତ୍ପାଦନ ପାଇଁ କି ପ୍ରକାରର ସହଭାଗୀତା ନିର୍ମାଣ କରିପାରିବେ ? ଯଦି ଆମେ ଉତ୍ପାଦନ କରିପାରିବୁ ନାହିଁ, ତେବେ ଗଣତନ୍ତ୍ର ପାଇଁ ନିଜକୁ ବଜାୟ ରଖିବା ବହୁତ କଷ୍ଟକର ହେବ । ନିଜସ୍ୱ ସାମଗ୍ରୀ ଉତ୍ପାଦନ ବଢାଇବାକୁ ହେବ । ୟୁରୋପ, ଭାରତ ଏବଂ ଆମେରିକାରେ ଆମେ ଯେଉଁ ଅଶାନ୍ତି ଦେଖୁଛୁ ତାହାର ଏକ ପ୍ରମୁଖ କାରଣ ହେଉଛି ଆମେ ଆମର ଲୋକଙ୍କୁ ଚାକିରି ଯୋଗାଇ ପାରିବୁ ନାହିଁ । “
ସେହିପରି ବିଦେଶରୁ ଭାରତୀୟ ନିର୍ବାଚନ ନିରପେକ୍ଷତା ଉପରେ ପ୍ରଶ୍ନ ଉଠାଇଛନ୍ତି ରାହୁଲ ଗାନ୍ଧୀ । ଗଣତନ୍ତ୍ର ଉପରେ ଆକ୍ରମଣ କରୁଛି ବିଜେପି । ନିର୍ବାଚନ କମିସନ, ଗୁପ୍ତଚର ସଂସ୍ଥା ଠାରୁ ନେଇ ସିବିଆଇ ଏବଂ ଇଡି ଭଳି ସଂସ୍ଥାକୁ ଅସ୍ତ୍ର ଭାବରେ ବ୍ୟବହାର କରୁଛି ଶାସକ ଦଳ । କଂଗ୍ରେସ ଶାସନ ସମୟରେ ଏସବୁ ଅନୁଷ୍ଠାନର ଦୁରୁପଯୋଗ କରାଯାଇନଥିଲା । କିନ୍ତୁ ବିଜେପି ନିଜର ରାଜନୈତିକ ଶକ୍ତି ବୃଦ୍ଧି କରିବା ପାଇଁ ଏଗୁଡ଼ିକୁ ବ୍ୟବହାର କରୁଛି ବୋଲି ଜର୍ମାନୀ ରାଜଧାନୀ ବର୍ଲିନରୁ କହିଛନ୍ତି ରାହୁଲ ଗାନ୍ଧୀ ।