ଇକ୍ଟ୍ରୋନିକ୍ସ ଓ ଆଇଟି ବିଭାଗ ପକ୍ଷରୁ ଆଜିଠାରୁ ୩ ଦିନ ବ୍ୟାପି ଓଡ଼ିଶା ଆଞ୍ଚଳିକ ଏଆଇ ଇମ୍ପାକ୍ଟ ସମ୍ମିଳନୀ ଅନୁଷ୍ଠିତ ହେବାକୁ ଯାଉଛି । ସରକାରୀ ବିଧି ବ୍ୟବସ୍ଥାରେ କୃତ୍ରିମ ବୁଦ୍ଧିମତା ଗ୍ରହଣୀୟତାରେ ଓଡ଼ିଶାକୁ ଏକ ଅଗ୍ରଣୀ ରାଜ୍ୟ ଭାବେ ଗଢ଼ି ତୋଳିବାରେ ଏହା ଢ଼ାଞ୍ଚା ପ୍ରସ୍ତୁତ କରିବ । ଇଣ୍ଡିଆ ଏଆଇ ଇମ୍ପାକ୍ଟ ୨୦୨୬ କାର୍ଯ୍ୟକ୍ରମକୁ ନଜରରେ ରଖି ଓଡ଼ିଶା ଏଭଳି ବିଶେଷ କାର୍ଯ୍ୟକ୍ରମ ଆୟୋଜନ କରୁଛି । ଏ ନେଇ ରାଜ୍ୟ କନ୍ଭେସନଠାରେ ବୁଧବାର କର୍ଟେନ ରେଜର କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି ।
ଆଞ୍ଚଳିକ ଏଆଇ ପ୍ରଭାବ ସମ୍ମିଳନୀ ପୂର୍ବରୁ ଇଣ୍ଡିଆ ଏଆଇ କାର୍ଯ୍ୟକାରୀ ଗ୍ରୁପ୍ ବୈଠକ ରାଜ୍ୟ ଆଇଟି ବିଭାଗ ଏବଂ ସୂଚନା ପ୍ରଯୁକ୍ତି ମନ୍ତ୍ରଣାଳୟର ମିଳିତ ଉଦ୍ୟମରେ ୧୮ ତାରିଖରେ ମେଫେୟାର କନ୍ଭେନସନଠାରେ ଅନୁଷ୍ଠିତ ହେବ । ଏହି ଅଧିବେସନ କେନ୍ଦ୍ର ଓ ରାଜ୍ୟ ସରକାର, ଶିକ୍ଷାବିତ, ଶିଳ୍ପ ଅଂଶୀଦାରଙ୍କୁ ଏକତ୍ର କରିବ । ଇଣ୍ଡିଆ ଏଆଇ ମିଶନକୁ କାର୍ଯ୍ୟକାରୀ କରିବା ଦିଗରେ ଏଠାରେ ବିଚାର ବିମର୍ଶ ହେବ । କାର୍ଯ୍ୟକ୍ରମରେ ରାଜ୍ୟ ଇଲେକ୍ଟ୍ରୋନିକ୍ସ ଓ ଆଇଟି ମନ୍ତ୍ରୀ ମୁକେଶ ମହାଲିଙ୍ଗ କହିଛନ୍ତି, ପ୍ରଯୁକ୍ତି ଆଧାରିତ ଅଭିବୃଦ୍ଧିକୁ ଧ୍ୟାନରେ ରଖି ଓଡ଼ିଶା ଭବିଷ୍ୟପନ୍ଥୀ କାର୍ଯ୍ୟକ୍ରମ ଗ୍ରହଣ କରୁଛି । ଓଡ଼ିଶା ଏଆଇ ନୀତି ୨୦୨୫ ସହ ଫିନ୍ଟେକ, ଗ୍ଲୋବାଲ କାପାବିଲିଟି ସେଣ୍ଟର, ଅତ୍ୟାଧୁନିକ ଇଲେକ୍ଟ୍ରୋନିକ୍ସ ଭଳି କ୍ଷେତ୍ରରେ ନିବେଶକ ଅନୁକୂଳ ନୀତି ସହ ଏଆଇ ଗ୍ରହଣୀୟତାକୁ ତ୍ୱରାନ୍ୱିତ କରାଯାଉଛି । ଦୃଢ଼ ଭିତ୍ତିଭୂମି, ନବସୃଜନକୁ ପ୍ରୋତ୍ସାହନ, ବିଶ୍ୱସ୍ତରୀୟ ଡିଜିଟାଲ କ୍ଷମତା ପ୍ରଦାନ ସହ ଓଡ଼ିଶାରେ କମ୍ପାନିଗୁଡ଼ିକୁ ସ୍ଥାପନା ସହ ଅଭିବୃଦ୍ଧି କରିବାରେ ପ୍ରୋତ୍ସାହିତ କରାଯିବ । ଇଲେକ୍ଟ୍ରୋନିକ୍ସ ଓ ଆଇଟି ସଚିବ ବିଶାଳ କୁମାର ଦେବ କହିଲେ, ଏଆଇ ସମିଟ ପ୍ଲାଟଫର୍ମଗୁଡ଼ିକ ପ୍ରକୃତ ଅଭିବୃଦ୍ଧିକୁ ପ୍ରଦର୍ଶନ କରିବାରେ ସହାୟକ ହେବ । ଅଗ୍ରାଧିକାର କ୍ଷେତ୍ରରେ ସରକାର ଏଆଇକୁ ସମନ୍ୱିତ କରୁଛନ୍ତି । ଅନୁଷ୍ଠାନ ଗୁଡ଼ିକୁ ଏ ନେଇ ପ୍ରସ୍ତୁତ କରାଯିବା ସହ ଭିତ୍ତିଭୂମି ଦୃଢ଼ୀକରଣ ଦିଗରେ ମଧ୍ୟ ନିବେଶ କରାଯାଉଛି । ଏହି ସମ୍ମିଳନୀ ସରକାରଙ୍କ ବିଭିନ୍ନ ବିଭାଗ, ଅଂଶୀଦାର, ନବପ୍ରବର୍ତ୍ତକଙ୍କୁ ଗୋଟିଏ ପ୍ଲାଟ୍ଫର୍ମକୁ ଆଣି ଉତ୍ତରଦାୟୀ ଏବଂ ଅଭିବୃଦ୍ଧିଶୀଳ ଏଆଇ ରୋଡମ୍ୟାପ୍ ଗଠନ କରିବ । ଏ ଅବସରରେ ଏଆଇ କ୍ଷେତ୍ରରେ ଏମ୍ଓୟୁ ସ୍ୱାକ୍ଷରିତ ହେବ । ସରକାରୀ ବିଭାଗ, ଶିଳ୍ପ, ଶିକ୍ଷାନୁଷ୍ଠାନ, ଗବେଷଣା ପ୍ରତିଷ୍ଠାନ ଗୁଡ଼ିକରେ ଦୀର୍ଘମିଆଦୀ ଭିତ୍ତିରେ ଏଆଇ ଗ୍ରହଣୀୟତା ବୃଦ୍ଧି ଉପରେ ଫୋକସ କରାଯିବ ।