ସମଗ୍ର ବିଶ୍ୱକୁ ଦୋହଲାଇ ଦେଇଛି ଅଷ୍ଟ୍ରେଲିଆ ସିଡନୀର ବଣ୍ଡି ବିଚ୍ରେ ହୋଇଥିବା ଭୟଙ୍କର ଆତଙ୍କବାଦୀ ଆକ୍ରମଣ । ବୋଣ୍ଡି ବିଚ୍ ଆକ୍ରମଣରେ ମୃତ୍ୟୁ ସଂଖ୍ୟା ୧୬କୁ ବୃଦ୍ଧି ପାଇଛି । ଆକ୍ରମଣକାରୀଙ୍କର ଇସଲାମିକ୍ ଷ୍ଟେଟ୍ ସହ ସମ୍ପର୍କ ଥିଲା ! ପୋଲିସ ଏହାକୁ ଆତଙ୍କବାଦୀ ଆକ୍ରମଣ ଘୋଷଣା କରିଛି । ଜଣେ ଆକ୍ରମଣକାରୀର ମୃତ୍ୟୁ ଘଟିଥିବା ବେଳେ ଆଉ ଜଣେ ଗୁରୁତର ରହିଛି । ଆକ୍ରମଣକାରୀମାନେ ବାପା-ପୁଅ ଥିଲେ । ୫୦ ବର୍ଷୀୟ ସାଜିଦ୍ ଅକ୍ରମ ଓ ୨୪ ବର୍ଷୀୟ ନବୀଦ ଅକ୍ରମ । ଘଟଣାସ୍ଥଳରୁ ସାଜିଦ ନାଁରେ ପଞ୍ଜିକୃତ ଥିବା ୬ଟି ବନ୍ଧୁକ ଜବତ କରାଯାଇଛି । ଯାହା ଏହି ଆକ୍ରମଣରେ ବ୍ୟବହୃତ ହୋଇଥିଲା ।
ସିଡନୀ କର୍ତ୍ତୃପକ୍ଷ ଏହାକୁ ଏକ ଉଦ୍ଦେଶ୍ୟମୂଳକ ୟିହୁଦୀ-ବିରୋଧୀ ଆତଙ୍କବାଦୀ ଘଟଣା ବୋଲି ଘୋଷଣା କରିଛନ୍ତି । ୧୯୯୬ ମସିହା ପରେ ଏହା ଅଷ୍ଟ୍ରେଲିଆର ସବୁଠାରୁ ଭୟଙ୍କର ଗଣହତ୍ୟା । ନିକଟରେ ଥିବା ଏକ ଗାଡ଼ିରୁ ବିସ୍ଫୋରକ ସାମଗ୍ରୀ ମିଳିଥିଲା । ଯାହାକୁ ବୋମା ନିଷ୍କ୍ରିୟକାରୀ ଦଳ ସୁରକ୍ଷିତ ଭାବେ ନିଷ୍କ୍ରିୟ କରିଥିଲେ । ଜଣେ ସାଧାରଣ ନାଗରିକ ସାହସିକତା ଦେଖାଇ ଜଣେ ବନ୍ଧୁକଧାରୀକୁ କାବୁ କରି ନେଇଥିଲେ ଏବଂ ତାଙ୍କ ହାତରୁ ବନ୍ଧୁକ ଛଡ଼ାଇ ନେଇଥିଲେ । ସେ ହିଁ ଏହି ଅପରେସନର ହିରୋ ପାଲଟିଛନ୍ତି । ଏହି ବର୍ବର ଆକ୍ରମଣରେ ପୋଲିସ ଅଧିକାରୀଙ୍କ ସମେତ ୪୦ରୁ ଅଧିକ ଲୋକ ଆହତ ହୋଇଛନ୍ତି । ସିଡନୀ ପୋଲିସର ସୂଚନା ଅନୁଯାୟୀ, ପୀଡିତଙ୍କ ବୟସ ୧୦ ରୁ ୮୭ ବର୍ଷ ମଧ୍ୟରେ ଥିଲା, ଯେଉଁଥିରେ ପିଲା, ମହିଳା ଏବଂ ବୃଦ୍ଧ ସାମିଲ ଥିଲେ । ସେମାନଙ୍କ ମଧ୍ୟରୁ କେତେକଙ୍କ ଅବସ୍ଥା ଗୁରୁତର ଅଛି । ପ୍ରଧାନମନ୍ତ୍ରୀ ଆନ୍ଥୋନୀ ଆଲବାନିଜ୍ ଏହାକୁ ନିନ୍ଦା କରିଛନ୍ତି । ଜଣେ ଆକ୍ରମଣକାରୀର IS ସେଲ୍ ସହିତ ସମ୍ପର୍କ ଥିବା ନେଇ ପୂର୍ବରୁ କର୍ତ୍ତୃପକ୍ଷଙ୍କ ନିକଟରେ ଖବର ଥିଲା ।
ବୋଣ୍ଡି ବିଚ୍ ରେ ଉତ୍ସବ ଚାଲିଥିବା ବେଳେ ଆକ୍ରମଣ ହୋଇଥିଲା । ପ୍ରାୟ ୧୦ ମିନିଟ ଧରି ଆକ୍ରମଣ ହୋଇଥିଲା । ଇହୁଦୀ ପର୍ବ ପାଳନ କରିବାକୁ ଶତାଧିକ ଲୋକ ଏକାଠି ହୋଇଥିଲେ । ସେହି ସମୟରେ ସିଡନୀର ବଣ୍ଡି ବିଚରେ ୨ ଜଣ ବନ୍ଧୁକଧାରୀ ଆଖିବୁଜା ଫାୟାରିଂ କରିଥିଲେ । ୨ ବନ୍ଧୁକଧାରୀ ପ୍ରାୟ ୫୦ ରାଉଣ୍ଡ ଗୁଳି ଫୁଟାଇଥିଲେ । ତେଣୁ ଭୟରେ ଲୋକମାନେ ବେଳାଭୂମିରୁ ଦୌଡ଼ିବାକୁ ଆରମ୍ଭ କରିଥିଲେ ।
ଲୋକମାନଙ୍କୁ ସେହି ସ୍ଥାନୀୟ ଅଞ୍ଚଳରୁ ଦୂରେଇ ରହିବାକୁ ଅନୁରୋଧ କରିଛନ୍ତି କର୍ତ୍ତୃପକ୍ଷ । ପୀଡିତ ଏବଂ ସେମାନଙ୍କ ପରିବାର ପ୍ରତି ସମବେଦନା ମଧ୍ୟ ଜଣାଇଛନ୍ତି । ଏହା ବ୍ୟତୀତ ପୋଲିସ ତଦନ୍ତ ପ୍ରକ୍ରିୟା ଆରମ୍ଭ କରିଛି । ଏହି ଆତଙ୍କବାଦୀ ଆକ୍ରମଣ ପରେ ସମଗ୍ର ଅଷ୍ଟ୍ରେଲିଆରେ ଶୋକାକୁଳ ପରିବେଶ ରହିଛି, ୟିହୂଦୀ ଅଞ୍ଚଳରେ ସୁରକ୍ଷା ବ୍ୟବସ୍ଥା ବୃଦ୍ଧି କରାଯାଇଛି ।