ବିଗତ କିଛି ବର୍ଷ ଧରି ଆର୍ଥିକ ଅନାଟନରେ ଗତି କରୁଥିବା ତାଳଚେରର ଟ୍ରକ୍ ମାଲିକମାନଙ୍କ ପାଇଁ ଶେଷରେ ସୁଖବର ଆସିଛି । କୋଇଲା ପରିବହନ କ୍ଷମତା ବୃଦ୍ଧି ପାଇଁ ଦୀର୍ଘ ଦିନରୁ ଲାଗି ରହିଥିବା ସମସ୍ୟାର ସମାଧାନ ହୋଇଥିବା ଟ୍ରକ୍ ମାଲିକ ସଂଘ ପକ୍ଷରୁ ଏକ ସାମ୍ବାଦିକ ସମ୍ମିଳନୀରେ ସୂଚନା ଦିଆଯାଇଛି । ଏହି ନିଷ୍ପତ୍ତି ପରେ ଟ୍ରକ୍ ମାଲିକ ଓ ଶ୍ରମିକମାନଙ୍କ ମଧ୍ୟରେ ଉତ୍ସାହର ବାତାବରଣ ଦେଖିବାକୁ ମିଳିଛି ।
ସୂଚନାଯୋଗ୍ୟ, ଟ୍ରକ ଯୋଗେ କୋଇଲା ପରିବହନରେ ସୁଯୋଗ ହ୍ରାସ ପାଇବା କାରଣରୁ ଅନେକ ଟ୍ରକ୍ ମାଲିକ ଆର୍ଥିକ ଦୁର୍ଦ୍ଦଶାର ସମ୍ମୁଖୀନ ହେଉଥିଲେ । ନିକଟରେ ନବନିର୍ବାଚିତ ଟ୍ରକ୍ ମାଲିକ ସଂଘର ପ୍ରତିନିଧିମାନେ ଏହି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଭେଟି ଆଲୋଚନା କରିଥିଲେ । ତାଳଚେର ଅଞ୍ଚଳରେ ଟ୍ରକ୍ ମାଧ୍ୟମରେ ଅଧିକ ପରିମାଣର କୋଇଲା ପରିବହନ କରିବା ପାଇଁ ସଂଘ ପକ୍ଷରୁ କେନ୍ଦ୍ରମନ୍ତ୍ରୀଙ୍କୁ ଅନୁରୋଧ କରାଯାଇଥିଲା ।
ଏହି ଅନୁରୋଧକୁ ବିଚାରକୁ ନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ତୁରନ୍ତ ମହାନଦୀ କୋଲଫିଲ୍ଡସ୍ ଲିମିଟେଡ୍ (MCL) ର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ (CMD) ଙ୍କ ସହିତ ଯୋଗାଯୋଗ କରିଥିଲେ । ମନ୍ତ୍ରୀଙ୍କ ହସ୍ତକ୍ଷେପ ପରେ MCL ପକ୍ଷରୁ ଏକ ବଡ଼ ଧରଣର ନିଷ୍ପତ୍ତି ନିଆଯାଇଛି । ବର୍ତ୍ତମାନ ସମୟରେ MCL ପ୍ରତି ମାସରେ ଟ୍ରକ୍ ଯୋଗେ କୋଇଲା ପରିବହନ କ୍ଷମତାକୁ ୧୫ ଲକ୍ଷ ଟନ୍କୁ ବୃଦ୍ଧି କରିବା ପାଇଁ ପ୍ରତିଶ୍ରୁତି ଦେଇଛି ।
MCLର ଏହି ପ୍ରତିଶ୍ରୁତି ଟ୍ରକ୍ ମାଲିକ ଓ ଏହା ଉପରେ ନିର୍ଭର କରୁଥିବା ହଜାର ହଜାର ଶ୍ରମିକ ପରିବାର ପାଇଁ ଆଶାର ଆଲୋକ ଆଣିଛି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଉଦ୍ୟମ ଯୋଗୁଁ ହିଁ ଏହି ସମସ୍ୟାର ସମାଧାନ ହୋଇପାରିଛି ବୋଲି ସଂଘ ପକ୍ଷରୁ କୃତଜ୍ଞତା ଜ୍ଞାପନ କରାଯାଇଛି । ଏହି ପରିବର୍ତ୍ତନ ତାଳଚେର ଅଞ୍ଚଳର ଅର୍ଥନୀତିକୁ ପୁଣିଥରେ ସୁଦୃଢ଼ କରିବାରେ ସହାୟକ ହେବ ବୋଲି ଆଶା କରାଯାଉଛି ।