ଆର୍ଜେଣ୍ଟିନାର ଫୁଟବଲ୍ ଲିଜେଣ୍ଡ ଲିଓନେଲ୍ ମେସିଙ୍କ ଭାରତ ଗସ୍ତକୁ ନେଇ କୋଲକାତାରେ ପ୍ରବଳ ଉତ୍ସାହ ଦେଖାଦେଇଛି। ନିଜର ୩ ଦିନିଆ ‘G.O.A.T ଇଣ୍ଡିଆ ଟୁର’ ଅବସରରେ ମେସିଙ୍କ ସମ୍ମାନାର୍ଥେ କୋଲକାତାରେ ଏକ ବିଶାଳ ୭୦ ଫୁଟ ଉଚ୍ଚର ବ୍ରୋଞ୍ଚ ପ୍ରତିମୂର୍ତ୍ତି ଉନ୍ମୋଚିତ ହୋଇଛି। ଏହି ପ୍ରତିମୂର୍ତ୍ତିକୁ ନିଜେ ମେସି ଭର୍ଚୁଆଲ୍ ମାଧ୍ୟମରେ ଉନ୍ମୋଚନ କରିଥିଲେ। ମେସିଙ୍କୁ ସ୍ୱାଗତ କରିବାକୁ କୋଲକାତାର ନେତାଜୀ ସୁବାସ ଚନ୍ଦ୍ର ବୋଷ ଏୟାରପୋର୍ଟରେ ଫ୍ୟାନ୍ ମାନେ ଘଣ୍ଟା ଘଣ୍ଟା ଧରି ଅପେକ୍ଷା କରିଥିଲେ। ତାଙ୍କର ଗୋଟିଏ ଝଲକ ପାଇଁ ପ୍ରଶଂସକଙ୍କ ମଧ୍ୟରେ ଉତ୍ସୁକତା ଚରମ ସୀମାରେ ପହଞ୍ଚିଥିଲା।
ତେବେ, ସଲ୍ଟ ଲେକ ଷ୍ଟାଡିୟମରେ ମେସିଙ୍କୁ ଦେଖିବାକୁ ଆସିଥିବା ପ୍ରଶଂସକମାନେ ତୀବ୍ର ନିରାଶ ହେବା ପରେ ପରିସ୍ଥିତି ଅଶାନ୍ତ ହୋଇଥିଲା। ଖବର ଅନୁଯାୟୀ, ମେସି କେବଳ ମାତ୍ର ୧୦ ମିନିଟ୍ ପାଇଁ ପଡ଼ିଆକୁ ଆସିଥିଲେ। ଏହି ସ୍ୱଳ୍ପ ସମୟ ମଧ୍ୟରେ ତାଙ୍କୁ ସ୍ଥାନୀୟ ନେତା ଓ ମନ୍ତ୍ରୀମାନେ ଘେରି ରହିଥିଲେ, ଯାହା ଫଳରେ ସାଧାରଣ ଦର୍ଶକମାନେ ତାଙ୍କୁ ଠିକ୍ ଭାବରେ ଦେଖିପାରି ନଥିଲେ।
ନିଜ ପ୍ରିୟ ତାରକାଙ୍କୁ ନ ଦେଖିପାରିବାରୁ ଉତ୍ୟକ୍ତ ପ୍ରଶଂସକମାନେ ହଙ୍ଗାମା ସୃଷ୍ଟି କରିଥିଲେ। ଅନେକ ଦର୍ଶକ ପାଞ୍ଚ ହଜାରରୁ ଅଧିକ ଟଙ୍କା ଦେଇ ଟିକେଟ୍ କିଣିଥିଲେ। ଏପରିକି କେତେକ ପ୍ରଶଂସକ ୨,୦୦୦ ରୁ ୧୦,୦୦୦ ଟଙ୍କା ପର୍ଯ୍ୟନ୍ତ ଖର୍ଚ୍ଚ କରି ଷ୍ଟାଡିୟମରେ ପହଞ୍ଚିଥିଲେ। ତେଣୁ, ନିରାଶ ହେବା ପରେ ସେମାନେ ପଡ଼ିଆ ଭିତରକୁ ଧସେଇ ପଶିବାକୁ ଚେଷ୍ଟା କରିଥିଲେ ଏବଂ ବ୍ୟାପକ ଭଙ୍ଗାରୁଜା କରିଥିଲେ। ପରିସ୍ଥିତି ନିୟନ୍ତ୍ରଣ ବାହାରକୁ ଯିବାରୁ ପୋଲିସକୁ ବାଧ୍ୟ ହୋଇ ଲାଠିମାଡ଼ କରିବାକୁ ପଡ଼ିଥିଲା। ଆର୍ଜେଣ୍ଟିନାର ଏହି କିମ୍ବଦନ୍ତୀ ଖେଳାଳିଙ୍କୁ ଦେଖିବାକୁ ଘଣ୍ଟା ଘଣ୍ଟା ଅପେକ୍ଷା କରିଥିବା ଅନେକ ପ୍ରଶଂସକ ଶେଷରେ ଗୋଟିଏ ଝଲକ ମଧ୍ୟ ନ ପାଇ ନିରାଶ ହୋଇ ଫେରିଛନ୍ତି।