ତାଳଚେର: ତାଳଚେରସ୍ଥିତ ବଳରାମ କୋଇଲା ଖଣିରେ ଆଜି ଏକ ହୃଦୟ ବିଦାରକ ଦୁର୍ଘଟଣା ଘଟିଛି। ଏମସିଏଲ୍ରେ କାର୍ଯ୍ୟରତ ଜଣେ କର୍ମଚାରୀ ଡ୍ୟୁଟିକୁ ଯାଉଥିବା ସମୟରେ ଏକ ଭାରୀ ଚେନ୍ ଡୁଜର୍ ମେସିନ୍ ତାଙ୍କ ଉପରେ ଚଢ଼ିଯିବାରୁ ତାଙ୍କ ଗୋଡ଼ ଦୁଇ ଖଣ୍ଡ ହୋଇଯାଇଛି। ତେବେ ଗୁରୁତର ଆହତ ଅବସ୍ଥାରେ ସମ୍ପୃକ୍ତ କର୍ମଚାରୀ ଜଣକ ନିଜର କଟା ଗୋଡ଼କୁ ଧରି ହିଁ ହସ୍ପିଟାଲରେ ପହଞ୍ଚିଥିଲେ, ଯାହା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି।
ସୂଚନା ଅନୁସାରେ, ଅନନ୍ତବେରଣୀ ଗାଁର କାର୍ତ୍ତିକ ବେହେରା ଆଜି ବଳରାମ କୋଇଲା ଖଣିରେ ନିଜ ଡ୍ୟୁଟିକୁ ଯାଉଥିଲେ। ସେହି ସମୟରେ ଏକ ଚେନ୍ ଡୁଜର୍ ମେସିନ୍ ଦୁର୍ଘଟଣାବଶତଃ ତାଙ୍କ ଉପରେ ଚଢ଼ିଯାଇଥିଲା। ଫଳରେ ଘଟଣାସ୍ଥଳରେ ହିଁ ତାଙ୍କ ଗୋଡ଼ଟି ଶରୀରରୁ ଅଲଗା ହୋଇଯାଇ ଦୁଇ ଖଣ୍ଡ ହୋଇଯାଇଥିଲା। ପ୍ରାଥମିକ ଚିକିତ୍ସା ପାଇଁ କର୍ମଚାରୀମାନେ ତାଙ୍କୁ ଗୁରୁତର ଅବସ୍ଥାରେ କଟା ଗୋଡ଼ ସହିତ ସ୍ଥାନୀୟ ପବିତ୍ରମୋହନ ପ୍ରଧାନ ସରକାରୀ ଚିକିତ୍ସାଳୟରେ ଭର୍ତ୍ତି କରିଥିଲେ। ପରେ ତାଙ୍କର ଅଧିକ ଚିକିତ୍ସା ପାଇଁ ତାଙ୍କୁ ଭୁବନେଶ୍ୱରର ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଇଛି।
ବର୍ତ୍ତମାନ ତାଳଚେର ଅଞ୍ଚଳରେ ଥିବା ସମସ୍ତ କୋଇଲା ଖଣିରେ ସୁରକ୍ଷା ପକ୍ଷ ପାଳନ କରାଯାଉଛି। ଏହି ସମୟରେ ଶ୍ରମିକମାନେ କିପରି ସୁରକ୍ଷିତ ଭାବେ କାମ କରିବେ, ତାହା ଉପରେ ବିଶେଷ ଗୁରୁତ୍ୱ ଦିଆଯାଉଛି। ତେବେ ଏହି ସୁରକ୍ଷା ପକ୍ଷ ଚାଲିଥିବା ସମୟରେ ବଳରାମ କୋଇଲା ଖଣିରେ ଏଭଳି ଏକ ବଡ଼ ଦୁର୍ଘଟଣା ଘଟିବା ଏକ ବ୍ୟତିକ୍ରମ ଭାବେ ଦେଖାଦେଇଛି।
ଏହି ଦୁର୍ଘଟଣାକୁ ନେଇ ବିଭିନ୍ନ ଶ୍ରମିକ ସଂଗଠନ ପକ୍ଷରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ସଂଗଠନଗୁଡ଼ିକ ଅଭିଯୋଗ କରିଛନ୍ତି ଯେ ବଳରାମ ଖଣି କର୍ତ୍ତୃପକ୍ଷଙ୍କ ଅବହେଳା କାରଣରୁ ହିଁ ଜଣେ କର୍ମଚାରୀ ଆଜି ତାଙ୍କ ଗୋଡ଼ ହରାଇଛନ୍ତି। ଖଣିରେ ଶ୍ରମିକଙ୍କ ସୁରକ୍ଷା ନିମନ୍ତେ କର୍ତ୍ତୃପକ୍ଷ ଉଚିତ ପଦକ୍ଷେପ ନେବାରେ ବିଫଳ ହୋଇଥିବା ସେମାନେ ଅଭିଯୋଗ କରିଛନ୍ତି ଏବଂ ଉକ୍ତ କର୍ମଚାରୀଙ୍କୁ ଉପଯୁକ୍ତ କ୍ଷତିପୂରଣ ପ୍ରଦାନ ପାଇଁ ଦାବି କରିଛନ୍ତି।