ଭାରତ ଆସୁଛନ୍ତି ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ । ୨୩ତମ ଭାରତ-ଋଷ ବାର୍ଷିକ ଶିଖର ସମ୍ମିଳନୀରେ ସେ ଯୋଗ ଦେବେ । ୟୁକ୍ରେନ ଯୁଦ୍ଧ ଓ ବିଶ୍ୱରେ ବଢ଼ୁଥିବା ଉତ୍ତେଜନା ସମୟରେ ପୁଟିନଙ୍କ ଏହି ଗସ୍ତ ଦ୍ୱିପାକ୍ଷିକ ସମ୍ପର୍କକୁ ଆହୁରି ମଜବୁତ କରିବ ବୋଲି ଆଶା କରାଯାଉଛି ।
ସମ୍ମିଳନୀ ବେଳେ ବାଣିଜ୍ୟ ଓ ପ୍ରତିରକ୍ଷା କ୍ଷେତ୍ରକୁ କେନ୍ଦ୍ର କରି ଗୁରୁତ୍ୱପୂର୍ଣ୍ଣ ଚୁକ୍ତି ହେବାର ଅପେକ୍ଷା । ଭାରତ ଏସ-୪୦୦ ଏୟାର ଡିଫେନ୍ସ ସିଷ୍ଟମ ଯୋଗାଣ ତ୍ୱରାନ୍ବିତ କରିବାକୁ ଋଷ ସହ ଆଲୋଚନା କରିବ । ୨୦୧୮ରେ ୪୫ ହଜାର କୋଟି ଟଙ୍କାରେ ୫ଟି ସ୍କ୍ୱାଡ୍ରନ ପାଇଁ ଭାରତ ଚୁକ୍ତି କରିଥିଲା । ୩ଟି ସ୍କ୍ୱାଡ୍ରନ ମିଳିସାରିଛି, ଅବଶିଷ୍ଟ ୨ଟି ୨୦୨୬ ମସିହା ସୁଦ୍ଧା ମିଳିବ ।
ସେହିପରି ଭାରତରେ ଅତ୍ୟାଧୁନିକ ପଞ୍ଚମ ପୀଢିର ସୁଖୋଇ-୫୭ ସ୍ଟିଲଥ ଫାଇଟର ଜେଟ HAL ନାସିକ କାରଖାନାରେ ନିର୍ମାଣ ପାଇଁ ମଧ୍ୟ ଦୁଇ ଦେଶ ଆଲୋଚନା କରିବେ । ବ୍ରହ୍ମୋସ ମିସାଇଲର ବିକାଶ ଓ ରପ୍ତାନୀ ନେଇ ମଧ୍ୟ ଆଲୋଚନା ହେବ ।
ଉଭୟ ଦେଶର ସେନା ଘାଟି ପରସ୍ପର ବ୍ୟବହାର ପାଇଁ RELOS ଚୁକ୍ତି ସ୍ୱାକ୍ଷର ହେବାର ସମ୍ଭାବନା ରହିଛି । ୨୦୨୧ ପରେ ପ୍ରଥମଥର ପାଇଁ ପୁଟିନଙ୍କ ଭାରତ ଗସ୍ତ ହେବ ।