ପାକିସ୍ତାନୀ ସେନା ଆଫଗାନିସ୍ତାନର ଖୋସ୍ତ ଓ ପକ୍ତିକା ପ୍ରାନ୍ତରେ ଭୟଙ୍କର ଏୟାରଷ୍ଟ୍ରାଇକ୍ କରିଛି, ଯେଉଁଥିରେ ୯ ଜଣ ଶିଶୁଙ୍କ ସମେତ ଜଣେ ମହିଳାଙ୍କର ମୃତ୍ୟୁ ଘଟିଛି। ତାଲିବାନ ସରକାର ଏହି ମୃତାହତ ଖବରକୁ ନିଶ୍ଚିତ କରିଛି।
ତାଲିବାନ ସରକାରର ମୁଖପାତ୍ର ଜବୀହୁଲ୍ଲାହ ମୁଜିହାଦ ଏହି ଆକ୍ରମଣକୁ ତୀବ୍ର ନିନ୍ଦା କରିଛନ୍ତି। ସେ ଚେତାବନୀ ଦେଇ କହିଛନ୍ତି ଯେ ଏହାର ଜବାବ ଦିଆଯିବ। ଏହି ସିରିଏଲ୍ ଆକ୍ରମଣରେ ଅନେକ ନାଗରିକଙ୍କ ଘର ଭାଙ୍ଗିଯାଇଥିବା ତାଲିବାନ ପକ୍ଷରୁ କୁହାଯାଇଛି।
ଯଦିଓ ଘଟଣାକୁ ନେଇ ପାକିସ୍ତାନ ଓ ଆଫଗାନିସ୍ତାନର ବୈଦେଶିକ ମନ୍ତ୍ରାଳୟ ପକ୍ଷରୁ କୌଣସି ବିଧିବଦ୍ଧ ବୟାନ ଜାରି ହୋଇନାହିଁ, ଏହି ଆକ୍ରମଣ ପାକିସ୍ତାନର ପେଶାୱରରେ ହୋଇଥିବା ବିସ୍ଫୋରଣ ପରେ ହୋଇଛି। ଗତକାଲି ପେଶାୱରରେ ଅର୍ଦ୍ଧସାମରିକ ବିଲ୍ଡିଂର ମୁଖ୍ୟ ଫାଟକରେ ଦୁଇଟି ବିସ୍ଫୋରଣ ଫଳରେ ୬ ଜଣ କମାଣ୍ଡୋ ପ୍ରାଣ ହରାଇଥିଲେ। ପାକିସ୍ତାନ ସରକାର ଏଥିପାଇଁ ଆଫଗାନିସ୍ତାନକୁ ଦାୟୀ କରିଥିଲେ।
ଦୀର୍ଘ ଦିନ ଧରି ଦୁଇ ଦେଶ ମଧ୍ୟରେ ସମ୍ପର୍କ ଖରାପ ରହିଛି ଏବଂ ପୂର୍ବରୁ ଅକ୍ଟୋବର ମାସରେ ମଧ୍ୟ ଉଭୟ ଦେଶର ସେନା ମୁହାଁମୁହିଁ ହୋଇଥିଲେ।