ଦକ୍ଷିଣ ଆଣ୍ଡାମାନ ସାଗର ଉପରେ ସ୍ପଷ୍ଟ ଚିହ୍ନିତ ଲଘୁଚାପ ସୃଷ୍ଟି ହୋଇଛି । ସୋମବାର ଏହା ଅବପାତ ଓ ୨୬ ତାରିଖ ସୁଦ୍ଧା ବାତ୍ୟାରେ ପରିଣତ ହୋଇପାରେ । ସମ୍ଭାବ୍ୟ ବାତ୍ୟା ଓଡ଼ିଶା ଆସିବା ଆଗରୁ ଦିଗ ବଦଳାଇ ମିଆଁମାର ପଳାଇବ । ଓଡ଼ିଶାରେ ବିଶେଷ ପ୍ରଭାବ ପକାଇବନି ଓ କମ୍ ବର୍ଷା ହେବ । ସମୁଦ୍ର ଭିତରେ ଥିବା ସମୟରେ ହିଁ ଏହା ଦୁର୍ବଳ ହୋଇଯିବ । ଏକାଧିକ ପାଣିପାଗ ମଡେଲ ନିଜ ପୂର୍ବାନୁମାନରେ ଏଭଳି ଚିତ୍ର ଦେଖାଇଛନ୍ତି ।
ଭାରତୀୟ ପାଣିପାଗ ବିଭାଗ କହିଛି, ଦକ୍ଷିଣ ପୂର୍ବ ବଙ୍ଗୋପସାଗର ଉପରେ ଅବପାତ ସୃଷ୍ଟି ପରେ ଏହା ପଶ୍ଚିମ-ଉତ୍ତର ପଶ୍ଚିମ ଦିଗରେ ଗତି କରି ପରବର୍ତ୍ତୀ ୪୮ ଘଣ୍ଟାରେ ଅବପାତରେ ପରିଣତ ହେବ । ପରେ ଏହା ଅଧିକ ଘନୀଭୂତ ହୋଇ ୨ ତାରିଖରେ ବାତ୍ୟା ରୂପ ନେଇପାରେ । ତେବେ ୨୫ ତାରିଖରେ କମୋରିନ୍ ଓ ସଂଲଗ୍ନ ଦକ୍ଷିଣ ପଶ୍ଚିମ ବଙ୍ଗୋପସାଗର ଓ ଶ୍ରୀଲଙ୍କା ଉପରେ ଆଉ ଏକ ଲଘୁଚାପ ସୃଷ୍ଟି ହୋଇପାରେ ବୋଲି ପୂର୍ବାନୁମାନ କରାଯାଇଛି ।
ଜିଏଫଏସ୍ ମଡେଲ ଆକଳନ ଅନୁସାରେ, ୨୪ ବା ୨୫ ତାରିଖରେ ଅବପାତ ହେବ । ୨୬ ଓ ୨୭ ତାରିଖ ବେଳକୁ ବାତ୍ୟାରେ ପରିଣତ ହେବ । ୩୦ ତାରିଖ ଯାଏ ଉତ୍ତର-ଉତ୍ତର ପଶ୍ଚିମ ଦିଗରେ ଗତି କରିବ । ପରେ ଏହା ଦିଗ ବଦଳାଇ ଉତ୍ତର ପୂର୍ବ ଦିଗକୁ ଯିବ ।
ଇସିଏମଡବ୍ଲ୍ୟୁଏଫ୍ ମଡେଲ କହୁଛି, ସୋମବାର ଅବପାତ ପରେ ଏହା ଅଧିକ ଘନୀଭୂତ ହେବ । କିନ୍ତୁ ୨ ତାରିଖ ସୁଦ୍ଧା ଦକ୍ଷିଣ ଆଣ୍ଡାମାନ ସାଗରରେ ଏହା ଦୁର୍ବଳ ହୋଇଯିବ । ତେବେ ବିଭିନ୍ନ ମଡେଲ ସମ୍ଭାବ୍ୟ ବାତ୍ୟାର ତୀବ୍ରତା ଓ ଗତିପଥକୁ ନେଇ ଭିନ୍ନ ଭିନ୍ନ ଆକଳନ କରୁଛନ୍ତି ।