ଦୁବାଇରେ ଚାଲୁଥିବା ଏୟାର ସୋ’ରେ ଶୁକ୍ରବାର ଏକ ହୃଦୟବିଦାରକ ଘଟଣା ଘଟିଛି । ପ୍ରଦର୍ଶନୀ ସମୟରେ ଭାରତୀୟ ବାୟୁସେନାର ତେଜସ୍ ଯୁଦ୍ଧ ବିମାନ ଦୁର୍ଘଟଣାଗ୍ରସ୍ତ ହୋଇଛି । ଏହି ଘଟଣାରେ ପାଇଲଟଙ୍କ ମୃତ୍ୟୁ ଘଟିଛି ବୋଲି ସୂଚନା ମିଳିଛି ।
ସୋସିଆଲ୍ ମିଡିଆରେ ଭାଇରାଲ୍ ହୋଇଥିବା ଭିଡିଓରେ ଦେଖାଯାଉଛି, ତେଜସ୍ ଜେଟ୍ ଏକ ଏରୋବାଟିକ୍ ମୋଡ଼ ନେବା ସମୟରେ ହଠାତ୍ ନିୟନ୍ତ୍ରଣ ହରାଇ ତଳକୁ ଖସିପଡ଼ିଥିଲା । ଭୂମିକୁ ସ୍ପର୍ଶ କରିବା ସହିତ ବିମାନଟିରେ ଭୟାବହ ବିସ୍ଫୋରଣ ହୋଇଥିଲା ।
ଘଟଣାଟି ଅପରାହ୍ନ ୨.୧୦ ସମୟରେ ଘଟିଥିବା କୁହାଯାଉଛି । ସେତେବେଳେ ହଜାର ହଜାର ଦର୍ଶକ ଆକାଶୀୟ କୋଶଳ ପ୍ରଦର୍ଶନ ଦେଖୁଥିଲେ । ବିମାନଟି ବାୟୁରେ ଚକିତକାରୀ କାରନାମା କରୁଥିବା ବେଳେ ହଠାତ୍ ନିୟନ୍ତ୍ରଣ ହରାଇଥିଲା ଓ କିଛି ସେକେଣ୍ଡ ମଧ୍ୟରେ ତଳକୁ ଖସି ଦୁର୍ଘଟଣା ଘଟିଥିଲା ।
ଘଟଣାସ୍ଥଳରେ ଉଦ୍ଧାରକାରୀ ଦଳ ପହଞ୍ଚି ଅଗ୍ନିନିର୍ବାପଣ ଓ ମୃତ ପାଇଲଟଙ୍କ ଶବ ଉଦ୍ଧାର କାମ ଆରମ୍ଭ କରାଯାଇଥିଲା ।