ପ୍ରବଳ ବର୍ଷା ଯୋଗୁଁ ବନ୍ୟା ଏବଂ ଭୂସ୍ଖଳନ ହେବାରୁ ଭିଏତନାମରେ ଲୋକଙ୍କ ଜୀବନ ସଙ୍କଟାପନ୍ନ ସ୍ଥିତିରେ ରହିଛି । ଏପର୍ଯ୍ୟନ୍ତ ଏହି ବିପର୍ଯ୍ୟୟ ଯୋଗୁଁ ୪୧ ଜଣଙ୍କର ମୃତ୍ୟୁ ଘଟିଛି । ଏଥିସହ ପ୍ରାୟ ୫୨ହଜାର ଘର ବୁଡ଼ି ଯାଇଛି । ଏହି ବିପର୍ଯ୍ୟୟ କାରଣରୁ ପ୍ରାୟ ୬୨ ହଜାର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି । ଭିଏତନାମରେ ଏତେ ବଡ଼ ବିପର୍ଯ୍ୟୟ ଘଟିବା ପରେ ସମସ୍ତଙ୍କ ମନରେ ଏବେ ଭୟ ସୃଷ୍ଟି କରିଛି ।
ସୂଚନାନୁଯାୟୀ, ଉଦ୍ଧାରକାରୀ ଟିମ୍ ପ୍ରଭାବିତ ହୋଇଥିବା ଅଞ୍ଚଳରେ ରିଲିଫ୍ କାର୍ଯ୍ୟ କରୁଛନ୍ତି । ଏହା ସହିତ ପାଣି ଘେରରେ ଫସି ରହିଥିବା ଲୋକଙ୍କ ଉଦ୍ଧାର ପାଇଁ ପ୍ରୟାସ ଜାରି ରହିଛି । ଆହୁରି ନଅ ଜଣ ନିଖୋଜ ଅଛନ୍ତି ଏବଂ ସେମାନଙ୍କୁ ଖୋଜାଖୋଜି ଜାରି ରହିଛି । ଗତ ତିନି ଦିନ ମଧ୍ୟରେ ଅଞ୍ଚଳର ଅନେକ ସ୍ଥାନରେ ୧୫୦ ସେଣ୍ଟିମିଟରରୁ ଅଧିକ ବର୍ଷା ହୋଇଛି ବୋଲି ସୂଚନା ମିଳିଛି ।
ବନ୍ୟାଗ୍ରସ୍ତ ଅଞ୍ଚଳଟି ଏକ ପ୍ରମୁଖ କଫି ଉତ୍ପାଦନକାରୀ ଅଞ୍ଚଳ, ଯାହା ଏହାର ବେଳାଭୂମି ଏବଂ ପର୍ଯ୍ୟଟନ ପାଇଁ ଜଣାଶୁଣା। ଭିଏତନାମ ପରିବେଶ ମନ୍ତ୍ରଣାଳୟ ଅନୁଯାୟୀ, ଛଅଟି ପ୍ରଦେଶରେ ମୋଟ ୪୧ ଜଣଙ୍କର ମୃତ୍ୟୁ ହୋଇଛି। ବନ୍ୟା ଯୋଗୁଁ ୫୨,୦୦୦ ରୁ ଅଧିକ ଘର ବୁଡ଼ି ଯାଇଛି। ପ୍ରାୟ ୬୨,୦୦୦ ଲୋକଙ୍କୁ ଉଦ୍ଧାର କରିବାକୁ ପଡ଼ିଛି। ପ୍ରବଳ ବର୍ଷା ଏବଂ ଭୂସ୍ଖଳନ ଯୋଗୁଁ ଅନେକ ରାସ୍ତା ଅବରୋଧ ହେବା ସହିତ ପ୍ରାୟ ୧୦ ଲକ୍ଷ ଘରୁ ବିଦ୍ୟୁତ୍ ସଂଯୋଗ ବିଚ୍ଛିନ୍ନ ହୋଇଛି ।
ଅନ୍ୟପଟେ ହ୍ୟୁ ସିଟିରୁ ଡାକ୍ ଲାକ୍ ପ୍ରଦେଶ ପର୍ଯ୍ୟନ୍ତ ଉପକୂଳବର୍ତ୍ତୀ ଅଞ୍ଚଳରେ ଜଳସ୍ତର ବଢିପାରେ ବୋଲି ଭିଏତନାମ ପାଣିପାଗ ବିଭାଗ ସତର୍କ କରିଛି ।