ସାଧୁସନ୍ଥଙ୍କର ଲାଗିବ ଗହଳି । ହୋମ ଯଜ୍ଞରେ କମ୍ପିବ ଖଣ୍ଡମଣ୍ଡଳ । ଦୂରଦୂରାନ୍ତରରୁ ବେପାରୀ ଆସି ଖୋଲିବେ ଷ୍ଟଲ । ୨୦୨୬ ଜାନୁଆରୀ ୨୩ରେ ଆରମ୍ଭ ହେବ ଖଣ୍ଡଗିରିର ମହାକୁମ୍ଭମେଳା । ଯାହା ଫେବ୍ରୁଆରୀ ପହିଲାଯାଏ ଚାଲିବ । ଏହି ଉପଲକ୍ଷେ ପ୍ରକାଶ ପାଇବ ସ୍ମରଣିକା । ୧୪୪ଜଣଙ୍କୁ କୁମ୍ଭମେଳାର ସାଧୁସନ୍ଥ ବିଶିଷ୍ଟ ବ୍ୟକ୍ତିବିଶେଷଙ୍କୁ ସମ୍ବର୍ଦ୍ଧିତ କରାଯିବ । ଏ ବର୍ଷ କୁମ୍ଭମେଳାରେ ଭାରତର ବିଭିନ୍ନ ପ୍ରାନ୍ତରୁ ହଜାରରୁ ଊଦ୍ଧ୍ୱର୍ ସାଧୁସନ୍ଥ ଯୋଗଦେବେ । କାରଣ ମାଘ ପୂର୍ଣ୍ଣିମାରେ ରବି ପୁଷ୍ୟା ଯୋଗ ପଡ଼ୁଥିବାରୁ ଏହା ଏକ ମହାନ୍ ସଂଯୋଗ ବୋଲି ଖଣ୍ଡଗିରି ସ୍ଥିତ ପାଦୁକା ଆଶ୍ରମରେ ଆୟୋଜିତ ସାମ୍ବାଦିକ ସମ୍ମିଳନୀରେ କହିଛନ୍ତି ବିଶ୍ୱ ସନାତନ ବୈଦିକ ଧର୍ମ ପରିଷଦର ଅଧ୍ୟକ୍ଷ ତଥା କୁମ୍ଭମେଳାର ଆବାହକ ।
ଏ ସମ୍ପକରେ ସୂଚନା ଦେଇ ସେ କହିଛନ୍ତି ଯେ, ସନାତନ ବୈଦିକ ଧର୍ମ ନୀତି ଅନୁଯାୟୀ ପଞ୍ଚ ମହାଯଜ୍ଞ ପାଳନ କରାଯିବ । ଏଥର କୁମ୍ଭମେଳାରେ ସାଧୁସନ୍ଥମାନେ କୌଣସି ଗୁଣି, ଗାରେଡି, ଝଡ଼ା ଫୁଙ୍କା ରୋଗ ପ୍ରଭୃତି ଭଲ ହେବା ଅପସଂସ୍କୃତିକୁ ପ୍ରଶ୍ରୟ ଦେବେ ନାହିଁ । ଏହି ଅବସରରେ ବାବା ବିଶ୍ୱ ସନାତନ ବୈଦିକ ଧର୍ମ ପରିଷଦର ସୁବର୍ଣ୍ଣ ଜୟନ୍ତୀ ତଥା କଳି ପ୍ରବେଶ ୫୧୨୬ ବର୍ଷ ପୂର୍ତ୍ତି ପାଳନ କରାଯିବ ବୋଲି କହିଥିଲେ । ଭୁବନେଶ୍ୱର ମହାନଗର ନିଗମ ଓ ଓଡ଼ିଶା ସଂସ୍କୃତି ବିଭାଗ ଚଳିତ କୁମ୍ଭମେଳା-୨୦୨୫ ହାତକୁ ନେଇଛନ୍ତି । ପୂର୍ବତନ କର୍ପୋରେଟର ରଘୁନାଥ ମହାନ୍ତି, ବାବୁ ପ୍ରଧାନ, ଖଣ୍ଡଗିରିର ବିଶିଷ୍ଟ ବ୍ୟକ୍ତିବିଶେଷ ସାମ୍ବାଦିକ ସମ୍ମିଳନୀରେ ଯୋଗଦେଇଥିଲେ । ସଂଯୋଜକ ଆଶ୍ରମର ଶ୍ରଦ୍ଧାଳୁ, ସାଧୁସନ୍ଥଉପସ୍ଥିତ ଥିଲେ । ଶାନ୍ତିପାଠ ପୂର୍ବକ ସଭାକାର୍ଯ୍ୟ ସମାପ୍ତ କରାଯାଇଥିଲା ।