ଦକ୍ଷିଣ ପେରୁରେ ଭୟଙ୍କର ସଡ଼କ ଦୁର୍ଘଟଣା ଘଟିଛି । ଦୁର୍ଘଟଣାରେ ୩୭ ଜଣଙ୍କର ମୃତ୍ୟୁ ହୋଇଥିବା ବେଳେ ୨୪ ଜଣ ଆହତ ହୋଇଥିବା ସୂଚନା । ବୁଧବାର ଦକ୍ଷିଣ ପେରୁରେ ଏକ ଡବଲ୍-ଡେକର ବସ୍ ଏକ ପିକଅପ୍ ଟ୍ରକ୍ ସହିତ ଧକ୍କା ହୋଇ ଏକ ଘାଟିରେ ପଡ଼ିଯିବାରୁ ଏହି ଦୁର୍ଘଟଣା ଘଟିଥିଲା ବୋଲି ଅଧିକାରୀମାନେ କହିଛନ୍ତି । ଆରେକ୍ୱିପା ଅଞ୍ଚଳରେ ଘଟିଥିବା ଏହି ଦୁର୍ଘଟଣା ଦକ୍ଷିଣ ଆମେରିକୀୟ ଦେଶରେ ସବୁଠାରୁ ଭୟଙ୍କର ଦୁର୍ଘଟଣା ମଧ୍ୟରୁ ଗୋଟିଏ, ଯେଉଁଠାରେ ବାରମ୍ବାର ସଡ଼କ ଦୁର୍ଘଟଣା ଘଟୁଛି । ଏହି ଦୁର୍ଘଟଣା ପେରୁକୁ ଚିଲି ସହିତ ସଂଯୋଗ କରୁଥିବା ପ୍ୟାନଆମେରିକାନା ସୁର ରାଜପଥରେ ଘଟିଛି ।
ଆରେକ୍ୱିପା ଆଞ୍ଚଳିକ ସ୍ୱାସ୍ଥ୍ୟ ପରିଚାଳକ ୱାଲ୍ ଓପୋର୍ଟୋ ଏଏଫ୍ପିକୁ କହିଛନ୍ତି “ଆମ ପାଖରେ ୩୭ ଜଣଙ୍କ ମୃତ୍ୟୁ ହୋଇଥିବା ସୂଚନା ରହିଛି ଏବଂ ୨୪ ଜଣ ଆହତ ହୋଇଛନ୍ତି । ଦୁର୍ଘଟଣାରେ କିଛି ଲୋକ ଗୁରୁତର ଆହତ ହୋଇଛନ୍ତି, ତେଣୁ ମୃତ୍ୟୁ ସଂଖ୍ୟା ବୃଦ୍ଧି ପାଇପାରେ ।”
ଲାମୋସାସ୍ କମ୍ପାନୀ ଦ୍ୱାରା ପରିଚାଳିତ ଡବଲ୍-ଡେକର ବସ୍ ମଙ୍ଗଳବାର ରାତିରେ କାରାଭେଲି ପ୍ରଦେଶର ଚାଲା ସହରରୁ ବାହାରି ପେରୁର ଦ୍ୱିତୀୟ ବୃହତ୍ତମ ସହର ଆରେକ୍ୱିପା ଅଭିମୁଖେ ଯାତ୍ରା କରୁଥିଲା । ଏଥିରେ ପିଲା ଓ ବୃଦ୍ଧ ସମେତ ୬୦ରୁ ଅଧିକ ଯାତ୍ରୀ ଯାତ୍ରା କରୁଥିଲେ । ସ୍ଥାନୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ଅଗ୍ନିଶମ କର୍ମଚାରୀମାନେ କହିଛନ୍ତି ଯେ, ଟର୍ଣ୍ଣିରେ ଏକ ପିକଅପ୍ ଟ୍ରକ୍ ସହିତ ମୁହାଁମୁହିଁ ଧକ୍କା ହେବା ପରେ ଗାଡ଼ିଟି ୨୦୦ ମିଟର ଗଭୀର ଘାଟିରେ ପଡ଼ିଯାଇଥିଲା । ବସ୍ଟି ଘାଟିରେ ଗଡ଼ିଯାଇ ନଦୀକୂଳରେ ପଡ଼ିଥିଲା ।