ଦିଲ୍ଲୀର ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ ବିମାନ ଉଡାଣ ଓ ଅବତରଣରେ ବ୍ୟାଘାତ ସୃଷ୍ଟି ହୋଇଛି। ସର୍ଭରରେ ଯାନ୍ତ୍ରିକ ତ୍ରୁଟି ହେତୁ ଅନେକ ବିମାନ ଉଡାଣ ବିଳମ୍ବ ହୋଇଥିବା ସୂଚନା ମିଳିଛି। ଅନ୍ୟପଟେ, ଏହି ତ୍ରୁଟି ସାଇବର ଆକ୍ରମଣ ହୋଇପାରେ ବୋଲି ମଧ୍ୟ ସନ୍ଦେହ ପ୍ରକାଶ କରାଯାଇଛି।
ସପ୍ତାହେ ଧରି ଏଭଳି ସମସ୍ୟା ଚାଲିଥିବା ବେଳେ ବିମାନ ଟ୍ରାଫିକ୍ ନିୟନ୍ତ୍ରଣ ବ୍ୟବସ୍ଥାରେ ଯାନ୍ତ୍ରିକ ବିକଳ ଚଳାଚଳକୁ ଗୁରୁତର ଭାବରେ ପ୍ରଭାବିତ କରିଛି। ଫ୍ଲାଇଟ୍ ରାଡାର ଅନୁଯାୟୀ ଅତିକମରେ ୭୦୦ ବିମାନ ପ୍ରଭାବିତ ହୋଇଛି ଓ ଅନେକ ବିମାନ ରନୱେରେ ଫସି ରହିଛି।
ଏହି ପରିସ୍ଥିତିରେ ଆଇଜିଆଇ ବିମାନବନ୍ଦର କର୍ତ୍ତୃପକ୍ଷ ଯାତ୍ରୀମାନଙ୍କ ପାଇଁ ଏକ ପରାମର୍ଶ ଜାରି କରିଛନ୍ତି। ସେମାନଙ୍କ ଅନୁସାରେ, ଯାନ୍ତ୍ରିକ ତ୍ରୁଟିଟି “ଅଟୋମେଟିକ୍ ମେସେଜ୍ ସ୍ୱିଚିଂ ସିଷ୍ଟମ” (Automatic Message Switching System) କୁ ପ୍ରଭାବିତ କରିଛି, ଯାହା ଏୟାର ଟ୍ରାଫିକ୍ ନିୟନ୍ତ୍ରଣ ଓ ଉଡାଣ ଯୋଜନା ପାଇଁ ବ୍ୟବହୃତ ହୁଏ।
ସମ୍ପୃକ୍ତ କର୍ତ୍ତୃପକ୍ଷ ଯାନ୍ତ୍ରିକ ସମସ୍ୟାର ସମାଧାନ ପାଇଁ କାମ କରୁଛନ୍ତି। ଯାତ୍ରୀମାନଙ୍କୁ ସଂଶୋଧିତ ବିମାନ ସମୟସୂଚୀ ଶୀଘ୍ର ଦିଆଯିବ ବୋଲି ସୂଚନା ଦିଆଯାଇଛି ଓ ସେମାନଙ୍କୁ ଧୈର୍ଯ୍ୟ ଧରି ଅପେକ୍ଷା କରିବାକୁ ଅନୁରୋଧ କରାଯାଇଛି।